Спорт деген — бір әлем

«Қазақстандағы 100 жаңа есім» жобасы – Тәуелсіздік жылдарында табысқа жеткен, еліміздің әр өңірінде тұратын түрлі жастағы, сан алуан этнос өкілдерінің тарихы.

«Ұстазы жақсының ұстанымы жақсы» дегендей, Қазақстан Республикасы білім беру ісінің үздігі, Қазақстан Республикасына еңбегі сіңген жаттықтырушысы, самбодан халықаралық дәрежедегі төрешісі Бақыт Жақетұлы Қоқыспековтың алдынан өткен көптеген шәкірттер бүгінде қазақ елінің көк туын желбіретіп, абыройын асқақтатуда. Оның спортсүйер шәкірттерінің бірі — Қызайбай Ақтөре Досымханұлы «Жүз жаңа есім» жобасына еніп отыр.

Ақтөре 1993 жылы маусым айында Қоянкөз ауылында Досымхан Жапаров пен Кәмшат Жалмұрзанованың отбасында дүниеге келді. 2000 жылы Д.Қонаев атындағы орта мектептің табалдырығын аттап, 2011 жылы он бір жылдықты ойдағыдай тәмамдады. Бұдан соң Алматы қаласындағы Қазақ спорт және туризм академиясының денешынықтыру факультеті, самбо бөлімін  аяқтады.

Бірінші сыныптан бастап аудандық балалар мен жасөспірімдер спорт мектебіне барған Ақтөре алдына қойған мақсатының жетегімен жаттығулардан қалмай, күрестің сан қилы әдіс-тәсілдерін меңгере бастады. Біртіндеп аудандық, облыстық, республикалық чемпионаттарға қатысып, жүлделі орындарды қанжығалап жүрді. Жігері мықты, іс-қимылы мығым ол  2006 жылы дзюдо күресінен Қазақстан Республикасының чемпионатында І орын, 2008 жылы мектеп және колледж оқушылары арасында самбодан Қазақстан Республикасының чемпионатында ІІІ орын, сондай-ақ, 2010 жылы мектеп және колледж оқушылары арасында самбодан Қазақстан Республикасының чемпионатында ІІІ орын, 2011 жылы самбодан Қырғыз Республикасында өткен халықаралық турнирде І орын, 2012-2013 жылдары жастар арасындағы самбодан Қазақстан Республикасының чемпионатында ІІІ орын, 2013 жылы 23 жасқа дейінгі спортшылар арасында Қазақстан Республикасының чемпионатында І орын, 2015 жылы 23 жасқа дейінгі спортшылар арасында Қазақстан Республикасының чемпионатында ІІ орын, 2015 жылы самбодан Т.Көмекбаевты еске алуға арналған халықаралық турнирде ІІІ орынды иеленді. 

Ақтөре Досымханұлы 2013 жылы самбо күресінен спорт шебері атанды. 2015 жылы аудандық балалар мен жасөспірімдер спорт мектебінің дзюдо бөлімінің нұсқаушысы болса, биыл дзюдодан жаттықтырушы қызметін атқарып келе жатқанына жылға жуық уақыт болды.

Әңгіме барысында:

— Менің алғашқы жаттықтырушым — Бақыт Жақетұлы Қоқыспеков. Ол — өз ісіне мығым, жауапкершілігі мол, спорт десе, ішкен асын жерге қоятын жан. Шәкірттерінің биік белестерден көрінуіне бар күш-жігерін салады. Бала тәрбиесіне көп көңіл бөледі. Бала кезімізден ол кісінің тәрбиесін алғандықтан, сол ағайымыз сияқты нағыз ер азамат болуды армандайтынбыз,-дейді ол өз ұстазы жайында. — Самбо күресінің шебері атану үшін мінез-құлық пен моральдық тұрғыдағы жан-жақты дайындықтармен қатар, күрестің әдіс-тәсілдерін, айла-амалдарын жетік білу керек. Самбо күресінің әдістері сан алуан.  «Армансыз адам – қанатсыз құспен тең» дейді ғой, менің жасым енді ғана жиырма төртке толды. Балаларды спортқа тәрбиелей отырып, өзім де биік шыңдарды бағындырғым келеді. Әлем, Азия, Олимпиада чемпионы болу – басты арманым. Қазір мен бірінші-үшінші сыныпта оқитын балаларды дзюдо күресіне баулып, тәрбиелеп келемін. Жаттықтырушы болғаныма көп уақыт бола қойған жоқ. Алдағы уақытта шәкірттерімнің жетістіктерін көру де – үлкен бақыт қой деп ойлаймын,-дейді күлімдеген ол.  

 «Спорт деген — бір әлем» дегендей, күн райының ыстық-суығына, жауын-шашындылығына қарамай, ерінбей, жалықпай таң бозынан жүгіріп, спортзалда шынығу – спорт сиқырымен сусындаған спортсүйер жандардың ісі. Олардың діттеген мақсатына қол жеткізудегі еңбектерін біріміз білсек, енді біреулеріміз біле бермейміз. Мақсаты биік, арманы таудай Ақтөре жерлесіміздің асар асуы, шығар биігі көп болсын дейміз.

Айнаш МӘМІЛЕНҚЫЗЫ.