Ауылымның үкілеген үміті

Самбо — «Самозащита без оружия» деген орыс тіліндегі сөздің  қысқартылған түрі, яғни қазақша қарусыз қорғану деген мағынаны білдіреді екен.  Самбоның тарихы Кеңестер Одағы тұсында 1938 жылдан басталады. Денешынықтыру саласының  бүкілодақтық комитеті сол жылы 16 қарашада самбоны бірауыздан спорттың бір түрі деп тіркеді. Осындай жиырма елдің ұлттық спорт түрлерінің жиынтығы деп саналатын спорт түрімен ауданымыздың спортшы қызы Ділдаш Күрішбаева айналысады. Спортшы қыздың  жетістіктері де ауыз толтырып айтарлықтай. Жуырда ғана ол Түрікменстанның астанасы Ашхабад қаласында жауынгерлік өнер түрлері бойынша жабық ғимаратта өткен V Азия ойындарында Алтын медальды қанжығасына байлап, жеңіспен оралды. Әрине спортта жоғарғы көрсеткішке қол жеткізіп, алтын медаль алу үшін жалпы самбо күресінің  шебері атану үшін ерік-жігер, қайтпас қайсар мінез, сонымен қатар самбоның әдіс-тәсілдерін жетік меңгеріп, жан-жақты дайындықтардан өту үшін еңбекқорлық қажет. Ділдаш Күрішбаеваның бойында бұл қасиеттердің барлығы бар десек артық айтқандық емес. Отбасында 4 баланың екіншісі болып дүние есігін ашқан Ділдашты  спорт деген әлемнің табалдырығына       әкесі жетелеп апарған екен. Ал табалдырықтан ары қарай жетелеп, спорттың қыр-сырын ерінбей-жалықпай үйретіп, қаршадай қыздың болашағынан зор үміт күтіп, сеніммен қараған жаттықтырушысы Бақыт Қоқысбеков болатын.

— Ата-анамның екінші баласымын. Алғаш мектепте болатын линейка дейді ғой, сондай жиындарда күреске қатысатын Феруза, Света, Анар сияқты қыздарды оқушылардың алдына шығарып, марапаттап жататын. Мен осылардай болсам-ау деп қызығатын едім. Мүмкін балалық қызығушылығымды байқаған болар, бір күні әкем  мені күрес залына ертіп барды. Сөйтіп мен спорт деген әлемнің табалдырығынан аттаған болатынмын, — деп еске алады бүгінде спортшы қыз.

 — 2016 жылдың қараша айында Болгарияда  әлем чемпионатына қатысып 3 орынды иелендім. Бір ай  демалып Рязань қаласына оқу-жаттығу  жиынына барғанмын. Өкінішке орай  тіземнен қатты жарақат алып үш айдай спорттан алыстап қалдым. Бір сөзбен айтқанда демалдым.  Кейіннен Астана қаласында өткен ҚР  Президенті Н.Назарбаевтың жүлдесіне арналған Әлем Кубогінің Кезеңі жарысында ресейлік Ольга Захарковадан жеңіліп екінші орынды иелендім. Ал жуырда Ашхабад қаласында жауынгерлік өнер түрлері бойынша жабық ғимаратта өткен  V Азия ойындарында Алтын медальды     иелендім. Менің жетістіктеріме алдымен қуанатын әрине жақындарым. Жарыстан оралған сәттерімде аудан басшылары да қуанышыммен бөлісіп жататын. Ал осы жолы аудан әкімі мен  орынбасарлары, аудандық мәслихат хатшысы, аудандық ақсақалдар Кеңесінің төрағасы, жанкүйерлерім Алматы қаласындағы әуежайдан күтіп алды. Әрине, мұндай құрметке қатты қуандым. ++++++++++++++һСол үшінде ол кісілерге үлкен алғысымды білдіргім келеді, -дейді спортшы қыз ризашылығын жасырмай.

   Иә, қандай жеңістің болмасын соңында қашанда тынымсыз жаттығулардың, маңдай тердің тұратыны белгілі. Ділдаштың жеткен жетістіктерінде де осындай үлкен ізденістердің тұрғаны айқын.

І.Жансүгіров атындағы университетте заң факультетінің екінші курсында сырттай  білім алып жатқан спортшы қыз бүгінде басшысы, бір жағы әріптесі болып жүрген Бақыт Қоқысбеков сияқты жаттықтырушы.   10-15  қыз баланы самбо  спортына жаттықтырып жүр.

— Менің әрбір жетістігіме алдымен қуанатын жаттықтырушым, екінші әкемдей болып жүрген Бақыт Қоқысбеков. Бүгінде жаттықтырушы ретінде менде ол кісінің  мен жеңіске жеткен кездегі күйін кешіп жүрмін. Шәкіртім Айнұр Төребай осы жылы Түркістан қаласында жасөспірім қыздар арасында   Қазақстан Республикасының чемпионатында екінші орын алып, спорт  шеберлігіне үміткерлікті ақтады. Ал Айдана Жарболова  дзюдо күресінен Республикалық жарыстарда ұтып, дзюдо күресінен спорт шеберіне үміткер атағын қорғады. Екі қызда бүгінде жақсы нәтиже көрсетіп жүр. Спорттағы өзің жасай алмаған әдіс -тәсілдерді шәкірттеріңе үйретіп, сол үйреткеніңнен  олар нәтиже шығарып, жетістікке жетсе ол үлкен қуаныш екен.  Шәкірттерімнің орын алғандағы өзімнің қуанышымды айтып жеткізе алмаймын. Еңбегімнің зая кетпегеніне масаттандым-дейді Ділдаш Күрішбаева шәкірттерінің әр қадамын мақтанышпен айтып.

— Қарашаның 9-13 күні әйелдер арасында Әлем чемпионаты өтеді. Бүгінде сол жарысқа  дайындалу үстіндемін-дейді Ділдаш Күрішбаева.

 Ділдаштың бүгінгі таңда алдына қойған үлкен мақсаты, арманы — Әлем чемпионы болу.

—        Әлем чемпионатында менің көбіне күшім жетпей қалады. Сондықтанда  түске дейін жаттығуларды физикалық түрде күш арттыруға бағыттаймын. Түстен кейін техникамды арттыру үшін жаттығулар жасаймын. Күніне 2-2,5 сағаттан дайындаламын. Әлем чемпионатының өтуіне 40 күн уақыт қалды. Әр күнді жоспарлап, дайындықтарды жүргізудемін. Мақсатым алдағы болатын әлем чемпионатында алтынды жеңіп алу, — деді спортшы қыз. Менің басты арманым сол және бұл мақсатыма жететінім анық деген. Бізде ауылының мақтанышына, жанкүйерлерінің сүйіктісіне, жасөспірімдердің үлгі тұтар спортшысына айналған қазақтың қарапайым ғана қара   қызына табыстар тіледік. 

Ләйлә ОҢАЛБАЕВА.