«Біз есеп үшін емес, ел үшін жұмыс істеп жатырмыз»

Мәселен, Панфилов ауданы Үлкеншыған ауылының тұрғыны Тойлыбай Домбағұлов аталған ауылдағы орта мектептің техникалық жағдайы сын көтермейтінін жеткізді.

– Білім ошағы сонау 1982 жылы салынған. Бүгінде нысанның жағдайы өте нашар, оқушылар үшін аса қауіпті. Тозығы жеткен мектепте 33 жыл бойы жөндеу жұмысы жүргізілген жоқ. Ауыл тұрғындары тарапынан арыз-шағым жиі айтылады. Күрделі жөндеу жүргізуге қажет жобалық сметалық құжат пен сараптама дайындалуда. Осыған байланысты, жөндеу жұмысына қажет қаражаттың бөлінуіне ықпал етуіңізді сұраймын, – деді ол.

Бұл ретте, Мәжіліс депутаты Руслан Қожасбаев кейінгі 3 жылда өңірде білім беру саласына қатысты 20 нысан салынғанын және олардың 15-і – білім ошағы екенін атап өтіп, Үлкеншыған ауылындағы мектептің қазіргі жағдайы да назардан тыс қалмайтынын жеткізді.

Ал Талдықорған қаласының тұрғыны – бірінші топ мүгедегі Гүлнара Мұхаметжанова «Отбасы Банк» АҚ арқылы бір бөлмелі пәтерге мақұлдау алғанын, алайда баспанасын барып көрген кезде оның ерекше қажеттілігіне сай келмейтінін байқайды.

– Өкінішке қарай, ерекше қажеттілігі бар адамның пәтерге кіріп-шығуына қажет жағдай жасалмаған. Пандусы жоқ, есіктері тар, яғни пәтер ішінде еркін қозғалуға мүмкіндік болмай отыр. Соның салдарынан, арбаға таңылған адамдар пәтерден бас тартуға мәжбүр. «Отбасы банк» АҚ ұсынатын пәтерлер болашақта мүмкіндігі шектеулі азаматтардың жағдайына қарай іріктеліп, кезекте тұрған мұндай азаматтарға пандусы бар, толық бейімделген тұрғын үйлер ұсынылса екен. Бұл – олардың конституциялық құқығын қамтамасыз ету жолындағы маңызды қадам болар еді, – деді ол.

Өз кезегінде, халық қалаулысы Руслан Қожасбаев былтыр «AMANAT» партиясының «Кедергісіз келешек» жобасы аясында ел аумағындағы әлеуметтік және көлік инфрақұрылымы нысандарының мүмкіндігі шектеулі азаматтарға қолжетімділігін қамтамасыз етуге талдау жүргізілгенін жеткізді. Соның аясында 4,8 мың инфрақұрылым нысандары мен 1,6 мың қоғамдық көлікті қамтыған 2,3 мыңнан астам рейдтік іс-шаралар ұйымдастырылды. Нәтижесінде 1040 заң бұзушылық анықталып, оларды жою бойынша тиісті мекемелерге ұсыныстар жіберілді. Депутат бұл бағыттағы жұмыс алдағы уақытта да жалғаса беретінін жеткізді.

Сондай-ақ өңір тұрғындары тарапынан Қаратал ауданы Тастөбе ауылы маңындағы Қаратал өзенінің арнасын тазалау және бөгетті қалпына келтіру, жедел жәрдем жүргізушілерінің жалақысын көтеру, орта буын медицина қызметкерлерінің әлеуметтік жағдайын жақсарту, жастарды баспанамен қамтамасыз ету сынды бірқатар мәселе көтерілді.

Осы орайда, Руслан Қожасбаев ел аумағында азаматтық қызметшілердің жекелеген санаттарының жалақысы 20%-ға артқанын айтты. Сондай-ақ биыл алғашқы алты айда «AMANAT» партиясының «Таза бейсенбі» акциясы аясында еліміздің барлық өңіріндегі 600-ден астам ластанған аумақ – саябақтар, скверлер, өзен-көл жағалаулары, тарихи-мәдени нысандар тазартылғанын мәлімдеді. Акцияға 14 мыңға жуық адам қатысып, 2 мың тоннадан астам қоқыс жиналып, қайта өңдеуге жіберілді.

– Мемлекет саясаты әркез халықтың тұрмысын жақсартуды, азаматтардың әл-ауқатын арттыруды көздейді. Жетісу өңірінде де осы бағытта жүйелі жұмыс жүргізілуде. Мәселен, былтыр «AMANAT» партиясының сайлауалды бағдарламасы аясында өңірде 19 362 адам тұрақты жұмысқа орналастырылды. Облыс аумағында 363,2 мың шаршы метр тұрғын үй пайдалануға берілді. Бұған қоса, 101,7 мың гектар жер мемлекет меншігіне қайтарылды. Ал күні кеше Ақсу ауданына қарасты Көлтабан ауылына барып, 120 орындық жаңа мектептің құрылыс жұмысымен таныстым. Мектеп құрылысы 2023-2024 жылдары қаржыландырудың болмауына байланысты уақытша тоқтап қалған еді. Биыл республикалық бюджеттен 1,9 млрд теңге бөлініп, жұмыс қайта жанданды. Қазіргі таңда нысанның 63 пайызы дайын. Шатыр жабылып, ішкі әрлеу, жарық жүйелерін тарту және аумақты абаттандыру жұмыстары жүріп жатыр. Мектеп ғимаратында 25 бүлдіршінге арналған шағын орталық та болады. Жоспарға сәйкес, мектеп биыл қазан айында пайдалануға беріледі, – деді депутат.

Айта кетейік, Руслан Қожасбаев Жетісу облысына сапары аясында Ақсу аудандық орталық аурухана ғимаратының құрылыс жұмысын да назарға алды. Аталған жобаның жалпы құны – 1,7 миллиард теңге. Бұл қаражат депутаттың тікелей араласуы арқылы республикалық бюджеттен бөлінді. Осылайша, биыл сәуір айында мердігерге 300 миллион теңге аванс ретінде аударылып, құрылыс қайта жанданды. Қалған қаражат кезең-кезеңімен бөлінеді.

– Бүгінде нысанның дайындық деңгейі – 40%. Алайда ашығын айтқанда, құрылыс қарқыны баяу, сапаға қатысты да ескертулер бар. Осының бәрін ашық әрі нақты айттым. Өйткені адам денсаулығы тұрғанда – ымыраға жол жоқ. Бұл жобаны соңына дейін жеке бақылауымда ұстаймын. Біз есеп үшін емес, ел үшін жұмыс істеп жатырмыз, – деді депутат.