ЖҮЗІНЕН НҰР ТӨГІЛГЕН

Қазақи болмысы, сабырлылығы, өз жұмысына берілген қасиеті Зәуре Сембайқызын көпшіліктен даралап тұратынын баспаханаға баратын кезекші журналистер әуелден аңғарып қойған. Оның жылы жымиысы адамдық келбетінің көрінісіндей көрікті.

– Жалпы Зәуре апаймен әріптес болғаныма 32 жылдан асыпты. Ол кісінің бір ашуланып, бұрқ-сарқ болған мінезін көремеген екенмін. Ұжымдағы қолынан іс келетін білікті маманның бірі. Ақжарқын, үнемі адамның көңіліне қарап жүреді. Біреу қиналса қол ұшын созып жәрдем беруге дайын тұрады, – дейді «Офсет» баспаханасының механигі Нұрахмет Бексейітов.

Зәуре Тәшенова Сарқан ауданы, қазіргі Ақтұма ауылының тумасы. 1988 жылдан бері Талдықорған қаласында тұрады. Негізгі  мамандығы – балабақша тәрбиешісі. Мамандық бойынша бірнеше жыл жұмыс істеп, кейіннен Екібастұзға ауысып, ол жақта құрылыс саласында қызмет етеді. 2 жыл өткен соң Талдықорғанға қайтып оралып «Офсет» баспаханасына жұмысқа орналасады.

– Менің осы баспаханада қызмет етіп жүргеніме биыл 35 жыл болды. Әуелде мұнда монтаждаушы болып жұмысқа кірген едім. Сол замандарда жұмыс ауыр еді. Ленталарды қиып, мәтін жолын жасайтынбыз, газеттің суреттерін орналастыратынбыз. Бұрынғымен салыстырғанда жұмыс қазір әлдеқайда жеңілдеді. Бұл жерде қазір кітап, журналдар шығару үшін тапсырыс қабылдап, газет шығатын күні сұрыптаушының жұмысын істеймін. Яғни ауыл, аудан, қалаларға кететін газеттерді есептеп, бөлемін. Газеттің жай келетін кездері болады, сол күндері сағат түнгі 12,1-ге дейін осында боламыз. Жалақымыз 90 мың теңге болғанымен  қолымызға 70 мың ғана тиеді, – дейді еңбекқор ана.

Кейіпкеріміз 4 ағайынды. Ол үйдің екінші қызы. Сәуле, Индира, Эльмира есімді әпке-сіңлілері бар. Әкесі кезінде ұжымшарда көлік жүргізуші, анасы қызылшада жұмыс істеген екен. Балалық шақтарында ата-анасына көмектесіп, жәрдемші болғандарын айтады.

Зәуре Сембайқызы мен жолдасы Айтжан Қанпиновтың Рауан, Елдар есімді ұлдары бар. Олар да бұл күні өз алдына үй болып, ата-анасына немере сүйдірген.