Экологиялық ахуалды жақсарту – алдымызда тұрған негізгі міндеттің бірі.

Бүгінгі таңда қоршаған ортаны қорғау басты мәселелердің бірі болып отыр.  Қазіргі кезде адамның қоршаған ортамен қарым – қатынасы ерекше маңызға ие. Жер шарындағы халық санының жедел өсуі және көптеген елдердің индустриалды дамуы табиғи ресурстарды пайдалануды еселеп арттырып, адамның табиғатқа әсерінің көлемін өсіре түсуде.

Табиғатқа ұқыптылықпен қарамаудың ащы мысалдары өте көп және олардың зиянды жақтары баршаға белгілі.
Халықтың қалада тұруға ұмтылуы, қаладағы тұрмысты ұнатуы урбанизация процесінің күшеюіне алып келеді. Мемлекетімізде дүниежүзілік урбанизация әсерінен тысқары қалған жоқ. Әсіресе, өнеркәсіп және қатынас кәсіпорындарын көптеп салу мен тың және тыңайған жерлерді игеру кезінде қалалар саны тез өсті.  Болжам бойынша, қалалар саны жақын арада көп өзгере қоймайды.

«Экологиялық ахуалды жақсарту – алдымызда тұрған негізгі міндеттің бірі. Біз қоғамда қоршаған ортаны қорғаудың мән-маңызын кеңінен дәріптеуіміз керек. Халықты экологиялық факторлардың жағымсыз әсерінен сақтау қажет. Бизнес өкілдері табиғатты қорғау ісіне зор жауапкершілікпен қарауы керек. Үкімет пен «Атамекен» палатасы осы бағытта нақты шаралар қабылдауға тиіс. Бұл салаға озық технологияларды кеңінен енгізу жұмысын жалғастыру қажет. Табиғатты ластайтын қалдықтарға мониторинг жасайтын озық жүйе ойдағыдай жұмыс істеуге тиіс», — деді Қасым-Жомарт Тоқаев.

Осы орайда, Мемлекет басшысының тапсырмасымен республика бойынша «Таза Қазақстан» экологиялық акциясы басталған болатын. Қызығы әр аптаның өзіндік тақырыбы мен нақты мақсаты болды.

1. «Таза өлке». Бірінші аптада елді мекендердің тұрғындары, қоғам қайраткерлері, ұйымдардың қызметкерлері өз аумағындағы аулаларды тазалады.
2. «Киелі мекен». Екінші апта тарихи-мәдени ескерткіштердің аумағын абаттандыруға арналды.
3. «Жасыл аймақ». Үшінші аптада көшет отырғызу, ағаштарды әктеу жұмыстары жүргізілген болатын.
4. «Өнегелі ұрпақ». Акцияның төртінші аптасында ардагерлердің аулаларын тазалау және абаттандыру көзделді.
5. «Мөлдір бұлақ». Акцияның қорытынды, бесінші аптасында өзендер мен көлдер қоқыстан тазартылды.

2024 жылдың 6 сәуір күні Кербұлақ ауданында «Таза Қазақстан» Республикалық экологиялық акциясы бастау алды.
Науқан бес аптаға созылды. Ерекшелігі — әр апта белгілі бір тақырып аясында өтті. Науқанның алғашқы аптасы «Таза өлке» тақырыбында өрбіді.
Осы орайда «Таза өлке» тақырыбында аудандағы мәдениет ошақтары өз ғимараттарының аулаларына тазалық жұмыстарын жүргізді.
Таза ел болу, таза болашақ болу – бірлігі жарасқан елдегі осындай бір үлкен игі іс-шараның басында болуды мәртебе санайтын ерекше экологиялық шараға аудан бойынша 180 мәдениет саласының өкілдері қатысты.

«Таза Қазақстан» экологиялық акциясы аясында аудандағы барлық медициналық ұйымдар өз аулаларын қоқыстардан тазартты. Ауқымды экологиялық науқанға аудандық орталық аурухана бастаған ауылдық округтердегі барлық медицина ошақтары қатысып, өз аумақтарын тазарту бойынша сенбіліктер өткізді. Тазалықты қолдайтын ауданымыздың ақ халатты абзал жандары игі іс-шарадан қалыс қалмай аудан тұрғындары арасында қоғамдық мәдениет деңгейін арттыру арқылы республикалық деңгейдегі акцияға қолдау көрсетті. Аталған іс-шараға барлығы 1200 жуық денсаулық сақтау өкілдері қатысты.

«Таза Қазақстан» экологиялық акциясы аясында аудан тұрғындары, барлық аудандық мекеме және бөлімдер және Сарыөзек ауылы әскери гарнизонының әскери қызметшілері белгіленген орындарына тазалық жұмыстарын жүргізіп, қоқыстардан тазартты. Сондай-ақ, аудан орталығы Сарыөзек ауылында орналасқан «Ұлы даланың Ұлы даралары» саябағында 300 түб қарағай ағашы егілді. Бұл экологиялық шараға облыс аудан әкімі Қ.Есболатов бастаған барлық мемлекеттік мекеме мен бөлімдер, белсенділер мен еріктілер қатысып, облыс көлемінде насихаттау мақсатында Жетісу телеарнасы арнайы келіп қолдау көрсетті.

«Таза Қазақстан» экологиялық акциясы аясында екінші апта «Киелі мекен» тақырыбында өрбіп, тарихи-мәдени ескерткіштерді абаттандыру жұмыстарына арналды. Осыған орай, аудан орталығы Сарыөзек ауылында орналасқан Ауған соғысы ардагерлеріне арналған Интернационалист жауынгерлер саябағын қоқыстардан тазарту және ағаштарды ағарту жұмыстары жүргізілді.

Сондай-ақ, Шанханай ауылдық округіне қарасты Шоқан ауылында орналасқан Қазақтың бір туар азаматы Шоқан Уалиханов атындағы мемориалды музейіне тазалық жұмыстары жүргізілді.

Экологиялық шараға барлық ауылдық округ тұрғындары қатысып,                    іс-шараны облыс көлемінде насихаттау мақсатында Жетісу телеканалы арнайы келіп тазалық жұмыстарын түсірді, Сондай-ақ музей директоры Марал Оралбекқызы телеканал тілшісіне сұхбат берді. Сұхбат барысында аудан және ауыл тұрғындары «Таза Қазақстан» акциясы аясында елді мекендерді қоқыстан тазарту және көгалдандыруға бір кісідей атсалысып жатқандығын айтып, жұртшылықты тазалыққа шақырды.

Чернобыль апатын жоюға қатысушылардың ескерткішіне және Сарыөзек ауылындағы Социалистік Еңбек ерлері ескерткіштерінің аумағын тазарту және дезинфекциялау жұмыстары жүргізілді.

«Таза Қазақстан» экологиялық акциясы «Жасыл аймақ» тақырыбы аясында барлық ауылдық округтердегі стеллалар боялып, оларға тазалық жұмыстары жүргізілді.

«Таза Қазақстан» экологиялық акциясы «Өнегелі ұрпақ» деп аталған төртінші аптада ардагерлер мен қарттардың аулаларына тазалық жүргізіліп, оларды абаттандыруға көмек берілді.

«Таза Қазақстан» экологиялық акциясы «Мөлдір бұлақ» деп аталған бесінші аптада өзендер мен көлдер тазартылды. Атап айтсақ: Көксу өзенінің бойына, Басши ауылындағы Еңкөл-Аралтөбе су қоймалары және барлық ауылдық округтегі су арықтары қоқыстан тазартылды.

Қазіргі уақытта аудан бойынша әр аптаның бейсенбі күні «Таза бейсенбі» экологиялық бағдарламасы жүргізілуде.

Аудандық аналар кеңесінің төрайымы:

Ғалия Ақбасова