Жастарға арналған кеңес беру пунктінің салтанатты ашылу рәсімі өткізілді

Іс-шара барысында өңірдегі жауапты тұлғалар сөз сөйлеп, жастар саясатының маңыздылығына тоқталды. Сонымен қатар қатысушыларға жаңа ақпараттық пункттің мүмкіндіктері таныстырылып, оның жұмысы жан-жақты көрсетілді. Атап айтқанда, пункт бірнеше негізгі бағыттар бойынша қызмет көрсетеді. Мәселен, білім беру саласында – мамандық таңдау, оқу орындарына түсу және білім бағдарламалары бойынша кеңес беру, құқықтық бағытта – жастардың құқықтары мен міндеттерін түсіндіру, заңгерлік кеңес беру және құқық бұзушылықтың алдын алу, NEET санатындағы жастар бойынша – жұмысқа орналасу, мемлекеттік бағдарламаларға қатысу, түйіндеме әзірлеу және сұхбаттан өту дағдыларын дамыту, еңбекпен қамту бағытында – бос жұмыс орындары туралы ақпарат беру, кәсіби бағдарлау және еңбек нарығына бейімдеуді атап өтуге болады.

— Біздің бастамамызбен жастарды жан-жақты дамытуға бағытталған кеңес беру пункті ашылып отыр. Мұнда жастардың өзіне қажетті бағыт бойынша кәсіби мамандардан тегін әрі сапалы кеңес алу мүмкіндігі бар. Бұл нысан тек ақпарат беру орталығы ғана емес, сонымен қатар жастар мен мемлекеттік қолдау тетіктері арасындағы байланысты нығайтатын маңызды алаңға айналады деп сенемін, — «Jetisu jastary» КММ директоры Шамиль Ванкеев.

Шараға қатысқан жастар да өз пікірін білдірді.

— «JASTAR INFO» пунктінің ашылуы мен үшін қуанышты жаңалық болды. Себебі біз сияқты жастарға болашақ мамандықты дұрыс таңдау, оқу орындары мен білім бағдарламалары туралы нақты әрі сенімді ақпарат алу аса маңызды. Осы пункт арқылы өзіме қажетті бағыттар бойынша толыққанды кеңес алып, болашағыма деген сенімділік пайда болды. Мұндай орталықтардың көбейгенін қалаймын, — деді Аида Карабаланова.

— Мен үшін ең маңыздысы жұмыспен қамту бағыты болды. Осы жерде бос жұмыс орындары туралы нақты ақпарат алып, еңбек нарығының талаптарын түсіндім. Бұрын бойымда сенімсіздік болса, енді қай бағытта даму керектігін түсіндім. Осындай пункттер жастардың жұмыс табуына лң ықпалын тигізеді деп ойлаймын, — деді Данияр.