Жаңа Конституция жобасын қолдауға шақырды

«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының өкілдері ҚР Парламенті Сенатының депутаты Амангелді Есбай өңірлік коалиция мүшелері Серік Мұқанов, Нұрбек Құдайберген мен Асхат Бәзіловтер Кербұлақ ауданындағы Өнер мектебінде кездесу өткізді.
Кездесу ашық форматта өтіп, қатысушыларға Конституциядағы жаңартулардың маңыздылығы қарапайым әрі түсінікті тілмен жеткізілді.
Спикерлердің айтуынша Жаңа Конституция әрбір азаматтың күнделікті өміріне тікелей ықпал ететін маңызды құқықтық тірек. Бұл құжат қоғамның нақты сұранысына жауап береді, азаматтардың құқықтары мен бостандықтарын қорғауда маңызды рөл атқарады және мемлекет пен халық арасындағы сенімді нығайтады.
Алғы сөз алған Амангелді Есбай жаңа Конституция жобасының әрбір нормасы қоғамның сұранысы мен ұсынысы негізінде әзірленгенін айтты. Айтуынша, Жаңа Конституция бұл – болашаққа жасалған батыл әрі тарихи қадам.
– Жоба Конституция деңгейінде Әділеттілік, Заң мен Тәртіп, табиғатқа жауапкершілікпен қарау қағидаттарын бекітеді. Білім, ғылым, мәдениет пен инновацияға басымдық беру – адам капиталына сүйенетін заманауи мемлекеттің бағдарын айқындайды. Құжаттың өзегінде – адам, оның қадір-қасиеті, құқықтары мен жеке жауапкершілігі қарастырылған. Дәстүр, бірлік пен рухани құндылықтар қоғамның орнықты дамуының негізі ретінде айқындалған. Конституция жобасында мемлекеттің зайырлы сипаты, сонымен бірге некенің ер мен әйелдің тең құқықты, ерікті одағы ретінде танылуы нақтыланған. Бұл – отбасы институтын, әйелдердің құқықтарын және ұрпақтар сабақтастығын қорғауға бағытталған маңызды норма, — деді Амангелді Есбай.
Келесі сөз тізгінін алған Серік Мұқанов жобаның негізгі бағыттары мен жаңашыл реформаларын таныстырып, цифрлық технологияларды қолдану, сот және құқық қорғау жүйесін жетілдіру мәселелеріне ерекше назар аударды. Оның айтуынша, Жаңа Конституция қоғамның нақты сұранысына жауап береді, азаматтардың құқықтары мен бостандықтарын қорғауда маңызды рөл атқарады және мемлекет пен халық арасындағы сенімді нығайтады.
– Жаңа Конституция жобасында адам құқықтары мен бостандықтарын мемлекеттің басты басымдығы ретінде айқындау – қоғам дамуы үшін аса маңызды қадам. Құжатта халықаралық құқықтық нормалар ескеріліп, азаматтардың жеке, әлеуметтік және саяси құқықтарын қорғау кепілдіктері айтарлықтай күшейтілген. Сонымен қатар, Конституция жобасы әділеттілік пен заң үстемдігі қағидаттарына негізделіп, отбасы құндылықтарын сақтау, әйелдер мен балалардың құқықтарын қорғауға бағытталған. Адам құқықтарына қатысты нормалардың айқынырақ белгіленуі – құқықтық мемлекеттің маңызды белгісі, — деді Серік Мұқанов.
Кездесу барысында қатысушылар конституциялық бастамаларды іске асыру мәселелері бойынша ұсыныс-пікірлерін айтты. Сонымен қатар, спикерлер ел ертеңі екшеленетін сәтте әрбір қазақстандық бей-жай қалмай, мемлекет тағдырын бірге жасауға шақырды.