Конституция – мемлекет тұрақтылығының темірқазығы

Қазақстан Республикасының қолданыстағы Конституциясы 1995 жылғы 30 тамызда бүкілхалықтық референдум арқылы қабылданды. Бұл күн – ел тарихындағы маңызды белес, себебі дәл осы құжат тәуелсіз Қазақстанның құқықтық негізін айқындап, жаңа мемлекеттік модельдің қалыптасуына жол ашты.

Конституцияда адам және оның өмірі, құқықтары мен бостандықтары ең қымбат қазына ретінде танылды. Бұл қағида – еліміздің демократиялық, зайырлы, құқықтық және әлеуметтік мемлекет ретіндегі басты ұстанымы. Негізгі заң билік тармақтарының бөлінуін, заң үстемдігін, сот тәуелсіздігін бекітіп, мемлекеттік басқару жүйесінің тұрақтылығын қамтамасыз етті. Уақыт талабына сай Конституцияға бірқатар өзгерістер мен толықтырулар енгізіліп келеді. Бұл – қоғамның дамуы мен саяси жаңғыру үдерісінің заңды көрінісі. Себебі Конституция  қатып қалған құжат емес, ол заман ағымына бейімделе отырып, ел мүддесіне қызмет етуі тиіс.

Конституцияның өміршеңдігі – оның қағидаларының нақты жүзеге асуында. Заң үстемдігі салтанат құрған жерде ғана әділет орнайды, ал әділет бар жерде тұрақтылық пен даму болады. Сондықтан Конституцияны құрметтеу – әрбір азаматтың парызы. Ол – мемлекетіміздің беріктігінің кепілі, болашаққа бастар айқын бағдар.

                              15 наурыз – ел тағдырын бірлесіп белгілейтін тарихи күн

2026 жылғы 15 наурыз – Қазақстан үшін тек күнтізбелік дата ғана емес, елдің болашағын анықтайтын тарихи белес. Осы күні елімізде республикалық референдум өтеді – азаматтар Қазақстан Республикасының жаңа Конституциясын қабылдау мәселесі жөнінде өз таңдауын жасайды.

Референдум – демократияның ең әділ әрі жауапты формаларының бірі. Ол халықтың еркінен туған нақты шешім. Бұл жолы да дауыс беру – әрбір азаматтың ел тағдырын айқындауға тікелей қатысуының айқын көрінісі. Референдумға заң бойынша 18 жастан асқан барлық Қазақстан азаматтары қатыса алады. Олардың әрқайсысы өз учаскесін алдын ала тексеріп, дауыс беру күні таңертеңнен кешке дейін – белгіленген мерзімде өз ойын білдіре алады.

Жаңа Конституция жобасы кең көлемде талқыланып, қоғамның әртүрлі салаларындағы пікірталастарға себеп болды. Бұл құжатта мемлекет басқаруының негізгі қағидалары, азаматтардың құқықтары мен бостандықтары, сондай-ақ мемлекеттік институттардың рөлі нақты көрсетілген. Референдумның халықаралық маңызы да зор: дауыс беру тек ел шегінде ғана емес, 62 шет мемлекеттегі сайлау учаскелерінде де ұйымдастырылады, онда Қазақстан азаматтары да өз таңдауын білдіре алады.

Әрбір дауыс – елдің заң үстемдігін нығайтуға қосылған үлес. Сондықтан бұл күні белсенді азаматтық ұстаным таныту – тек жеке парыз ғана емес, келешек ұрпақ алдындағы жауапкершілік. Ел болашағын бірге анықтайтын тағдырлы күнге әрбір қазақстандықтың қатысуы маңызды.

                                                                                                                                                                          Қолдасбаева Ләзат