Жайлы мектеп – жетістіктің баспалдағы
Адамзат баласының қол жеткізген үлкен жетістіктерінің бірі – білім қазынасы. Тәуелсіздік алған жылдан бері білім жүйесіне енгізіліп отырған реформалар біздің болашағымызға салынып жатқан даңғыл жол іспеттес. Себебі, қай мемлекеттің болсын даму жолы сол елдің білімінің дамуынан бастау алады. Яғни, болашақта бәсекеге қабілетті мемлекеттер қатарына ену міндеті бәсекеге қабілетті маман мойнына жүктелетін абыройлы да, жауапты міндет болып отыр. Бүгінгі жас ұрпақ – ертеңгі мемлекет тұтқасын ұстаушы білікті маман, ел тағдырын шешуші азамат. Ал осы жас ұрпақты тәрбиелеуші, білім мен білік дағдыларын дамытушы – біздер, ұстаздар. Ұстаздың қолында бүкіл бір ұлттың тағдыры тұр десем қателеспеймін. Қазіргі қоғам – білімді жастардың қоғамы. Жас буынға білім беру жолында еңбек етіп жүргендіктен білім саласында болып жатқан барлық өзгерістер мен жаңалықтар менің назарымнан тыс қалған емес. Соның бірі – Президент жолдауы. Ел дамуындағы маңызды деген мәселелерді атап айтып, шешу жолдарын ұсына келе, Президентіміз өз жолдауында бесінші мәселе ретінде білім беру саласына тоқталып өтті.
«Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін «Жайлы мектеп» ұлттық жобасы қолға алынды.» — деді Президент Қ. Тоқаев өзінің Қазақстан халқына жолдауында. Аталған ұлттық жоба аясында 2025 жылға дейін 800 мың баланың заманауи мектепте оқуына жағдай жасайтындығын, осылайша, апатты жағдайдағы және үш ауысыммен оқитын мектеп мәселесі толық шешілетіндігін атап көрсетті. Бұл ауыл және қала мектептерінің айырмашылығын едәуір азайтады. Қазіргі таңда ауыл мектептерінің деңгейі біртіндеп қала мектептерімен теңестіріліп келеді. Ғаламтордың қолжетімділігі, кітап қоры мол кітапханалар, мектеп ішіндегі арнайы дәретханалар, ішкі және сыртқы бейнебақылаудың болуы, жайлы оқу кабинеттерінің болуы, т.б. ауыл мектептерінің сапасын арттырып отыр. Сонымен қатар, Президент Қ. Тоқаев мектеп формасын барлық оқушыға қолжетімді ету аса маңызды екенін айтты. Әлеуметтік тұрғыдан әлсіз саналатын кейбір топтағы балаларға мектеп формасын бюджет есебінен беру де қарастырылған. Өз кезегінде бұл көптеген отбасыларға көмек болар еді.
Білім беру жүйесінің жаңартылған білім беру сатысына көшкелі оқыту мен оқуда біршама нәтижеге қол жеткіздік. Жаңа форматтағы оқулықтар, цифрлы оқыту жүйесі, жаңашыл әдіс-тәсілдер білім алушылардың қызығушылығы мен білім сапасын арттыруда. Әрине, әр мұғалім осы жаңашылдыққа қадам басса біздің бағындырар белесіміз, алар асуларымыз әлі алда. Сөз соңында айтарым, ең бастысы, біз, ұстаздар жаңа заманға лайықты білігі мен тірлігі жарасқан ойшыл, болашағынан үміт күттіретін патриот тұлға қалыптасуына дұрыс бағыт беру керекпіз.
Жетісу облысы, Кербұлақ ауданы, Шанханай ауылы,
Ш. Уәлиханов атындағы орта мектептің директоры
Ж. Б. Жұмажанова
