Қызылжардағы палуандар белдесуі

Елбасының сарабдал саясатының арқасында еліміз талай жетістікке жетті, қазақстанды әлем мойындады

Мемлекет басшысының жыл сайынғы халқына жолданған Жолдауында еліміздің өмір сүру деңгейінің артып, орнықты дамып, алпауыт мемлекеттермен терезесі тең болып отырғаны – тайға таңба басқандай анық байқалады. Елі сүйген – елін сүйген Елбасына деген құрметтен 1 желтоқсан Президент күні болып бекітілген болатын.
Осы орайда жақында Қызылжар ауылында күрестен облыстық турнир болып өтті.
Аталмыш турнирге аудандық балалар және жасөспірімдер спорт мектебінің қызметкері, спорт ардагері Сапар Жұмабайұлы, спорт мектебі директорының орынбасары Қанат Чажабаев, спорт ардагері Құдайберген Төлекенов, Қызылжар өндірістік кооперативінің басшысы, көптеген іс-шаралардың демеушісі Ержан Күлшембаев, Қызылжар ауылының түлектері, ауыл жанашырлары Сембек Құсайынов, Нұрмұхамбет Қорғасбеков, облысымыздың әр ауданынан келген бапкерлер мен спортшылар, жарыс демеушілері – 2013 жылдың түлектері жалпы 12 команда 217 палуан қатысты.
Шараның ашылуы салтанатында алғашқы сөз кезегін спорт ардагері Сапар Жұмабайұлы алып, Президент күніне арнайы өткізіліп отырған жарысқа қатысушыларды құттықтап, ізгі тілегін білдірді.
Сөз тізгінін алған Қарашоқы ауылының тумасы, қазір Көксу ауданының бапкері, спорт ардагері Құдайберген Төлекенов, туған жерге туын тігіп жүрген азаматтар «Қызылжар ӨК басшысы Ержан Күлшембаев,Сембек Құсайынов, Нұрмұханбет Қорғасбеков, Жапаров атындағы орта мектебінің директоры Бағдат Шунетовтар ауылда өтіп жатқан турнирді ұйымдастырушы Әнуар Нысанбековке және демеушілік көрсеткен Әнуардың шәкірттері, 2003 жылдың мектеп түлектеріне алғысын білдіріп, кілемде мықтылар жеңсін деген тілектерін айтып, палуандарға сәттілік тіледі.
«Спорт деген — бір сиқыр» демекші, үш күнге созылған турнирде боз кілемде белдескен палуандардың әрқайсысы аудандарының намысын көтеруге тырысты. Турнирде баға беретін әділқазылар алқасының назары әр палуанның әдісін қалт жібермей қадағалап отырды.
Осы сәтті пайдаланып, бапкерлерді сөзге тартқан едік.
Сембек Құсайынов — ауыл түлегі, Алматы қаласының тұрғыны:
— «Дені сау ұлт – ел бәсекелестігінің факторы болып табылады» деген еді Елбасымыз. Өте дұрыс айтылған сөз. Айтулы мереке қарсаңында «жерлестерім жарыс ұйымдастырып жатыр» дегенді естіп, қуана келдім. Жалпы Қызылжар ауылынан талай чемпиондар шығып, еліміздің түкпір-түкпірінде Қазақстан туын желбіретіп жүр. Осы сәтті пайдаланып, жыл сайын жарыс ұйымдастырып жүрген ауыл азаматы, талай чемпион дайындаған бапкер Әнуар Бегалыұлына рахмет айтқым келеді.
Құдайберген Төлекенов – Көксу ауданының бапкері, спорт ардагері:
— Біріншіден жиналған қауымды келе жатқан Президент күнімен құттықтаймын.
Кеше ғана Қарашоқының тумасы, Гүлмарал Еркебаеваның Румыния мемлекетіндегі жеңісін естіп, қатты қуанып отырмын. Ауылдан шыққан қаршадай қыздың 76 кг салмақ дәрежесінде белдесіп, Ресейлік палуанды жеңсе, екінші айналымда 2017 жылдың Әлем чемпионатының жеңімпазы жапондық палуанды таза жеңіспен жеңді. Ширек финалда Қытай палуанынан жеңілсе де Румыния палуанын 9-0 есебімен жеңіп, жүлделі 3 орынды иеленді. Бұл — жерлестері үшін үлкен қуаныш. Бүгінгі турнирге де кішкентай спортшылар көптеп қатысып отыр. Бұл көңіл қуантарлық жәйт. Чемпиондарымыз көп болсын.
Әнуар Нысанбеков – жарыстың ұйымдастырушысы:
-«Ауылына қарап — азаматын таны» деген ғой. Қызылжар ауылында спорттың барлық түрінен турнирлер өтіп тұрады. Бұл орайда ауыл адамдарына рахмет. Осы облыстық турнирдің өтуіне демеушілік көрсеткен де осы мектептің 2003 жылғы түлектері:

Облыстың түкпір-түкпірінен келген спортшыларды ауылдың адамдары үйлеріне бөліп алды. Осы үрдіс өзгерген емес. Сырттан келген балалар үшін үй, тамақ дайын. Ауылымыз ауызбірлікті. Бақ берерде елге ырыс қонады, ұстанған жолы дұрыс болады екен. Мақсатымыз – еліміздің атын шығарып, туын көкке көтеретін чемпиондар санын арттыру.
Осы орайда біздің ауылымызда болып жатқан жақсылықтарымызды газет бетінде жариялап жүретін аудандық «Кербұлақ жұлдызы» газетінің ұжымына рахмет айтқым келеді. Қаламдарыңыз жүйрік болып, оқырмандарыңыз көп болсын.
Үш күнге созылған жарыстың қорытындысы бойынша 2005-2007 жылы туылғандар арасында:
29 кг. Исағали Елнар — Көксу ауданы
32 кг. Ершеев Мырзағали — Текелі
36 кг. Бақберген Азат — Қызылжар
39 кг. Мұхаметшен Есен — Қызылжар
42 кг. Талғат Нұрбек — Қызылжар
46 кг. Сағих Алмат — Спорт интернат
50 кг. Нұрғали Асанәлі — Сарыөзек
54 кг. Жақсылық Руслан — Спорт интернат
54 кг. Тоқтар Нұрсейіт — Спорт интернат
2008 – 2009 жылы туғандар арасында
21 кг. Әшім Еркебұлан — Байғазы
23 кг. Амирбай Әбсаттар — Көксу ауданы
26 кг. Ержан Шынғыс — Ескелді ауданы
29 кг. Кәрім Санжар — Қызылжар
32 кг. Сүлеймен Абдулла — Ескелді ауданы
35 кг. Абықас Ернар — Ескелді ауданы
35 кг. Абдрахманұлы Ақытқажы — Көксу ауданынан жеңіске жетті.
Турнирдің жабылу салтанатында жеңімпаздар марапатталды. Сонымен қатар, аудан, облыс, республика спортына үлкен үлес қосып және түрлі шараларға демеушілік көрсетіп жүрген Құдайберген Төлекенов, Сембек Құсайынов, Нұрмұханбет Қорғасбеков, Ержан Күлшембаев, Ерлан Қалиев, Бақыт Есембаев, Қайрат Қашағанов сынды азаматтарға ұйымдастырушылар атынан қазақтың салтымен шапан жапты.
Адамның анасынан басқа 4 тамыры болады екен. Олар – туған жері, тарихы, тілі мен мәдениеті. Ал осы қасиеттерді ұрпақтың санасына сіңіру үшін, өз елінің патриоты болуға тәрбиелейтін осындай шаралар ауадай қажет.
Боз кілемге шыққан кішкентай палуандардың көзінен от көріп, күреске күштен бұрын жүрек керек екенін түсінгендей болдық.
«Жақсының жақсылығын айт – нұры тасысын» дегендей, жарыстың өтуіне мұрындық болып, демеушілік көрсеткен 2003 жылдың түлектеріне, Айдар Ақшолақов, Қанат Сүттіқожанов, Сабыр Айнабеков, Абзал Бестерековке, жаттықтырушы Қанат Бүркітбаевқа ел атынан адами алғысымызды білдіреміз.
Дина АМАНҚЫЗЫ.