Ұлттық ойындар – ұлттық дәстүр

Таяуда Алматы облысы Панфилов ауылдық округінің Табак совхозында ұлттық ат спорты ойындарынан облыстық чемпионат өтті. Алматы облыстық ұлттық ат спорты мамандандырылған жасөспірімдер спорт мектебінің ұйымдастыруымен аударыспақ, теңге ілу, жамбы ату, қазақша күрес ойындарынан өткен жарысқа біздің де ауданның спортшылары қатысып қайтты.
Аудандық ат спортының жаттықтырушысы, Қаспан ауылдық округі әкімдігінің спорт нұсқаушысы Нұрлан Қыдырбай: «Біздің ауданнан барған ат спортының командасы осы ойында да жақсы нәтиже көрсетіп, жүлделі орындарды иеленіп қайтты. 1999-2002 жылдары арасында туылған жасөспірімдер — қазақша күрестен І.Жансүгіров атындағы Жетісу мемлекеттік университеті заң факультетінің студенті, қоғалылық Санжар Серікұлы Әбдікәрімов 80 кг салмақта І орынды, 50 кг салмақта заң колледжінің студенті талдыбұлақтық Рахатұлы Мейіржан ІІ орын, сондай-ақ, теңге ілуден Алматы қаласындағы темір жол колледжінің студенті, қаспандық Жандос Асанұлы ІІ орынды иеленді» деп, қуанышты хабармен бөлісті.
Келешек ұрпақтың ұлттық ойындарды дәріптеп, оны бойларына сіңіріп өсуі – ұлттық құндылықтарымыздың жоғалмауының бірден бір себі деуімізге болады. Икемділікті, зеректікті, шапшаңдықты, жылдамдықты игертетін қазақтың ұлттық ойындарынан өз қатарластарынан оза шауып, жеңімпаз атанған жерлестерімізге сәттілік тілейміз.
Айнаш ҚАСЕНОВА