Әлеуметтік желінің жастарға әсері қандай?

Қазіргі қоғам — жаңа ақпараттық технологиялардың қоғамы және XXI ғасырдың бұл ағымы — қоғам дамуының жаңа дәрежесіне жеткізді. Ақпарат алмасу, қарым-қатынас орнату, жұмыс іздеу, білім алу мүмкіндігі және тағы басқа іс-әрекеттер шынайы әлемге қарағанда виртуалды әлемде жүзеге асатын болды. Интернет — жастардың ең сенімді құралдардың біріне айналды. Солардың бірі — әлеуметтік желілер.
Таяуда Сарыөзек ауылдық округі әкімі аппаратының жастар ісі жөніндегі әдіскер-нұсқаушысының және Кербұлақ аудандық орталық аурухана психологі Г.Мусаханованың ұйымдастыруымен №49 орта мектебінде «Әлеуметтік желінің жастарға әсері қандай?» атты еркін пікір алмасу аясында кездесу өтті. Іс-шараның мақсаты — әлеуметтік желінің пайдасы мен зиянын жастарға жеткізу, ой-пікірлерін ортаға сала отырып, мәселенің ортақ шешімін қалыптастыру. Әлеуметтік желілерді дұрыс мақсатта қолдануды үйрету.
Кездесу барысында арнайы бейнесюжет көрсетіліп, әлеуметтік желінің түрлері, пайдасы мен зияны жайлы жастар өз ойларын ортаға салды. Сонымен қатар, психолог Г.Мусаханова жастардың бірін-бірі қаншалықты дәрежеде түсінетінін анықтау мақсатында, «Бір-бірімізді түсінеміз бе?» атты тренинг-ойын жүргізіп, әлеуметтік желіге деген тәуелділік болмас үшін, салауатты өмір салтын ұстанып, күнделікті жұмыс жоспарын құру керек екендігін айтып өтті. Кездесу соңында жастар «Әлеуметтік желі және біз: ғаламтор — уақыт тынысы» атты сауалнама толтырды.
Әлеуметтік желіні бүгінде жұрттың бәрі дерлік пайдаланады. Дегенмен, оны шектен тыс пайдаланамын деп тәуелділікке түсіп, уақытыңызды, денсаулығыңызды құртып, айналаңыздағы адамдардан аулақтап, тұрмыста, отбасында қолайсыз жағдайларға тап болмайын десеңіз, оған көп үйір болмағаныңыз жөн. «Ең бастысы: әлеуметтік желі маған не береді?» деп, оның тек пайдалы жағына ғана назар аударған жөн,-деп Ә.Омарова кездесуді қорытындылады.
Әсемгүл ОМАРОВА,
Сарыөзек ауылдық округі әкімі

аппаратының жастар ісі жөніндегі нұсқаушысы.