Ерлік намыстан туады

Елбасымыз Нұрсұлтан Әбішұлы Назарбаевтың «Болашаққа бағдар: Рухани жаңғыру» атты бағдарламасы халқымыздың қызу қолдауына ие болған маңызды жоба.
Көптің көңілінен шыққан бұл бағдарламада «Белгілі бір мақсатқа жету үшін біздің санамыз атқарар істерден озып жүруі, одан барып жаңғырып отыруы тиіс» деген жолдар әр қазақстандыққа оймақтай ой салып, ерекше әсер берді.
Сонымен қатар мемлекет басшысы рухани жаңғыру – елді елең еткізетіндей тосын жаңалық жасау емес, бабаларымыздан мирас болып қалған ізгі қасиеттерді қайта түлетіп, ұлттық қазыналарымызды қастерлеп, ұрпағымызға игілік пен адамгершілік әкелетін дәстүрлерімізді өркендету екенін баса айтады. Бұл бағдарламада Елбасы өскен өңіріне қызмет жасап, туған жерге туын тігіп жүрген жас өскіндердің есімін елге жариялау туралы баса айтылған еді.
Осындай кіндік қаны тамған жерінің ғана емес, Қазақстан атты тәуелсіз еліміздің атын шет мемлекетте шығарып, туымызды желбіретіп, Гимнімізді асқақтатып жүрген жерлесіміз Еркебаева Гүлмарал Мененбайқызы.
Еркін күрестен Халықаралық дәрежедегі спорт шебері, Кербұлақ ауданының Құрметті азаматы, Қазақстан Республикасы чемпионатының 3 дүркін жеңімпазы, Азия чемпионатының 3 дүркін жүлдегері, 2015 жылы жастар арасындағы Рио-да Жанейрода өткен әлем чемпионатының қола жүлдегері, 2018 жылы Ресей мемлекеті Мәскеу қаласында әскери қызметкерлер арасында өткен әлем чемпионатының күміс жүлдегері, 2017 жылы Түрікменстан мемлекетінің Ашхабад қаласында өткен Азия ойындарының күміс жүлдегері Гүлмарал Еркебаева осы жылдың 15-16 қарашасында Румыния мемлкетінің Бухарест қаласында 23 жасқа дейінгі жастар арасында өткен әлем чемпионатында қола жүлдеге ие болып жерлестерін қуантты.
Бұл қуанышты хабарды естіген жерлестері Гүлмаралды сапардан күтіп алып, өзі

білім алған Қарашоқы орта мектебінде кездесу өткізді.
Кездесуге ауыл әкімі Ақбасова Дина Ерасылқызы, аудандық спорт бөлімінің басшысы Дуанаева Еркебұлан, аудандық жастар ресурстық орталығының жетекшісі Мыңбаев Алмас Асқарұлы, аталмыш мектептің ұжымы мен оқушылары, ауылдық «Ақсақалдар кеңесі» мүшелері, Гүлмаралдың анасы Мәрия Оразбайқызы, ең алғашқы спорт әлеміне жетелеп әкелген бапкері Қайрат Ипанов, бүгінгі таңдағы үлкен додаларға дайындап жүрген бапкері Күреңбаев Мәди Жұмаханұлы, ауыл тұрғындары және аудандық БАҚ өкілдері қатысты.
Мектеп алдындағы алаңда ине шаншыр жер болмады.

Жақсылыққа куә болуға асыққан ауылдың кәрі-жасы түгел жиналды.
Шараны ауыл әкімі Дина Ерасылқызы ашты:
-Құрметті ауылдастар!
Қадірлі қонақтар!
Бүгінгі жылы жүздесуіміздің себепкері болып отырған ауылымыздың мақтанышы, спортшы қызымыз Гүлмарал Мененбайқызы.
Елбасымыз Нұрсұлтан Әбішұлы Назарбаев «Рухани биік,еңбегі ерен, бірлігі мығым Мәңгілік Ел болу үшін бізде бәрі бар. Біздің тірегіміз – тәуелсіздік, тілегіміз – тұрақтылық білегіміз бірлік!» деген еді. Осындай тәуелсіз еліміздің туын желбіретіп жүрген Гүлмаралға қандай тілек айтса да артық болмас. Аудан халқының атынан аудан әкімі Бигелдиев Махаббат Сәдуақасұлының құттықтауын жеткізуге рұқсат етіңіздер, – деп Елбасымыздың халқына арнаған Жолдауына сәйкес бұқаралық спортты дамыту, халықтың спортқа деген қызығушылығын арттыру және салауатты өмір салтын

қалыптастыру мақсатында республика, Азия, Әлем чемпионаттарында Кербұлақ ауданының намысын қорғап, спорт саласына өзіндік үлесін қосқаны үшін аудан әкімінің Құрмет грамотасы мен бағалы сыйлығын табыстады.
Сөз тізгінін алған аудандық спорт бөлімінің басшысы Еркебұлан Дуанаев, Гүлмаралдың жеңісі тек ауданымыз емес, жалпы қазақстандықтардың қуанышы екенін айтып, спортшы қызды тәрбиелеген анасына, бапкерлеріне алғыс білдіріп, Гүлмаралға зор денсаулық, толайым табыстар тіледі.
Аудандық жастар ресурстық орталығының жетекшісі Алмас Мыңбаев өз сөзінде Гүлмаралдың өмір жолы, спорттағы жетістіктері өскелең ұрпаққа өнеге екенін айтып, аудан жастары атынан ақжарма тілегін жеткізді. Ауыл ақсақалдары атынан сөз алған Естемесов Өмірәлі қария аталық ақ тілегін айтып, ел-жұртына осындай қуаныш сыйлаған спортшы қызға ауылдастары атынан ат мінгізді.
Өз кезегінде сөз алған Қарашоқы ауылының азаматы, ауыл жанашыры, көптеген іс-шараларда демеушілік көрсетіп жүрген Азамат Нұрғалым Халықұлы, соңғы кезде ауданымызда, ауылдарымызда болып жатқан жағымды жаңалықтарды тілге тиек етіп, Қарашоқы ауылынан бой көтергелі отырған өнер мектебі ауыл тұрғындары үшін үлкен қуаныш екенін айтып, Гүлмаралға ағалық алғысын жеткізіп, бапкері Мәди Жұмаханұлына тай атады.
Гүлмарал білім алған мектептің ұстаздары атынан мектептің тәрбие ісі жөніндегі орынбасары Сәлімбаева Күлтәй Елтайқызы сөз алып, шәкірттері үшін мақтанатынын, әрдайым тілеуін тілеп жүретіндерін айтып, ізгі тілегін білдірді.
Гүлмаралдың анасы – Еркебаева Мәрия Оразбайқызы өз сөзінде қызына осындай құрмет көрсеткен аудан әкімі Махаббат Сәдуақасұлына, ауыл әкімі Дина Ерасылқызына, жалпы барлық ауылдастарына риза екенін, қызы үшін әрі қуанып, әрі уайымдап жүретінін айтып, еліміз аман, жұртымыз тыныш болсын деген жүрекжарды лебізін жеткізді. Ауылдастарының өзіне деген ақ көңілдерін, пәк ниеттерін, ризашылықтарын көріп көңілі толған Гүлмарал сөз алды.
— Құрметті жерлестерім!
Қай елде, қай жерде жүрсем де туған жерім жүрегімнің төрінде тұрады. Ауыл, аудан емес, Қазақстанның намысын қорғау – мен үшін әрі мақтанышы, әрі үлкен жауапкершілік.
Әр жеңісімді мен сіздерге арнаймын. Өйткені, мені әрқашан қорғап-қолдап жүретін сіздердің дұға-тілектеріңіз. Жеңісімді ескеріп, елеп отырған аудан әкіміне, ауылдастарыма алғысымды сөзбен айтып жеткізе алмаймын. 7 сыныпта домбыра үйірмесіне барып жүргенімде қабілетімді байқап, Алматы қаласындағы дарынды балаларға арналған «Шаңырақ» спорт интернатына орналастырып, өміріме бағыт-бағдар берген Ипанов Қайрат ағама, бүгінгі таңдағы дайындаған бапкерім, жеңіс тұғырына шығуыма үлкен үлес қосқан Күреңбаев Мәди ағама алғысым шексіз.
Шетелде жүріп Қазақстанның туы көтерілген кезде жүрегімде керемет сезім болады. Қуаныштан жылаған сәттерім де болады. Алда талай биіктер бар мен бағындыратын. Мені қолдайтын, демейтін ел-жұртым барда талай жеңіске жетемін, — деп толқыныспен аяқтады сөзін спортшы қыз.
Кездесу соңында ауыл ақсақалы Омаров Қадырбай бата берді. Шараны жүргізуші мектеп директорының тәрбие ісі жөніндегі орынбасары Самат Тугумбаев кездесудің аяқталғанын хабарласа да, жиналған қонақтар мен мектеп оқушылары Гүлмаралдан қолтаңба алуға асықты.
— Біз сізді мақтан етеміз!
— Қадамыңызға гүл бітсін!
— Биіктерді бағындыра беріңіз!
Жан-жақтан ел-жұрттың сүйіспеншілікке толы осындай дауыстарынан құлақ тұнды. Гүлмаралдың жеңісі ауылдастарын бей-жай қалдырмады. Жерлестері спортшы қыздың қуанышына арнап көкпар берді.
— Иә, «Ерлік – намыстан туады, еңбек – табыстан туады» деген жақсы сөз бар. «Жақсы адам болғаның қоғамға пайдалы адам болғаның» дейді Хадисте Алла Тағаланың берген нығметтерінің бірі тәуелсіздігіміз болса, сол тәуелсіздіктің туын желбіретіп жүрген қаршадай қыздың «елім» деп соққан жүрегінен айналдық. Өйткені рухы мықты ұланнан ғана – ұранды ұрпақ шығара сөзсіз.
Қазақтың қызы – намыстың шоғындай, садақтың оғындай, найзаның жүзіндей, жүзіктің көзіндей болуы керек болса, осы қасиеттің бәрі тал бойынан табылған Гүлмарал Еркебаеваға біз де бар жақсылықтарды тілеп, «алдағы белдесулерде шашыңа шаң жұқтырма» дедік шын жүректен.
Дина АМАНҚЫЗЫ.