Қасиетті құт мекенім!

Туған жер… Туған ел… Осы екі ғана сөзде қаншама мағына, қаншама ой жатыр десеңізші?! Туған жердің қадірін әр адам әрқалай түсінетін шығар. Ал мен үшін Туған жер қадірі дүниедегі ең ұлы деген нәрсемен пара-пар. Себебі, ол – менің әлпештеген анам, аялап өсірген әкем, туған-туысым, аға-әпкелерім, мені білім жолына жетелеген ұстаздарым, сол білімге ұмтылу жолындағы тай-құлындай тебіскен жора-жолдастарым дүниеге келген жер. Менің Туған жерім, Отаным – кішкентай болса да, мен үшін аса қымбат әрі киелі Қызылмектеп ауылы. Осы мекенде менің көңілді де шаттыққа толы, уайымсыз да бейкүнә балалық шағым өтіп жатыр. Мен өзге ұлт өкілі болсам да өзімнің туған аулымды қатты жақсы көремін. Ауылымызда қазақ, шешен ұлттары тұрса да, біз, тату-тәтті өмір сүріп жатырмыз. Қызыққа толы балалық шағым өткен туған ауылдың ауласын еш уақытта ұмытпақ емеспін. Мектеп табалдырығын алғаш аттаған күн, сыныптас достарыммен алғашқы таныстық, бәрі-бәрі қазіргідей көз алдымда. Ауыл дегенде мына бір өлең шумақтары ойыма оралады да тұрады:
Ауыл десем, мал елестер көзіме,
Ауыл десем, дән елестер көзіме.
Ауыл десем, ер саламын құр атқа,
Ауыл десем, ән естілер құлаққа.
Бүгінгі таңда Қызылмектеп ауылында Майтөбе орта мектебінде 4-сыныпта оқып жатырмын. Сынып жетекшім — Дүйсебаева Назым Нуртаевна. Бізге әрдайым білім мен тәрбиені қатар беріп, үлкенге құрмет, кішіге ізет көрсетуді үйретіп, әрқашан кеңесшіміз бола білген жан. Мектебіміздің директоры Еркін Немеребайұлы өте мейірімді жан. Әрдайым бізге қамқор болып жүреді. Мектебіміздің мұғалімдері өте мейірімді. Білім нәрін сіңдіріп, болшағымызға үлкен жол ашып жатқан ұстаздарымызға мың алғыс айтамын.
Туған елге, туған жерге, туған тілге деген ыстық сезімнің үздік үлгісі мен үшін осындай болмақ. Отан туралы ой толғасаң, жан толғанысын айтып тауыса алмаспыз, сірә. Туған жердің – қазақ елінің қадірін біле жүрейік дегім келеді.
Мухамад ХАСАНОВ,
4-сынып оқушысы,
Майтөбе орта мектебі.