Кеше мен бүгіннің өнегесі ұрпаққа мұра

Елбасы Нұрсұлтан Әбішұлы Назарбаевтың «Болашаққа бағдар: рухани жаңғыру» бағдарламалық мақаласы ел дамуының жарқын үлгісі мен нақты қадамдарын көрсететін келелі ой, салиқалы пікір, батыл шешімдерге құрылған маңызды құжат. бұл мақалада сананы жаңғырту, ұлттық болмыстан, ұлттық кодтан айырылып қалмай, оны әлемдік құндылықтармен үйлестіріп, Қазақстанның игілігіне жарату жолындағы мақсат-мүдделер туралы өзекті мәселе көтеріліп отыр. Онда ел Президенті Қазақстан үшін қайта түлеудің айрықша маңызды екі үдерісі – саяси реформа мен экономикалық жаңғыруды қолға ала отырып, Біртұтас Ұлт болу үшін болашаққа қалай қадам басатынын және бұқаралық сананы қалай өзгертетіні жөнінде алысты болжайтын көзқарастарымен бөліседі. Ел Президенті аталмыш тұғырнамасында білім, ғылымға ерекше басымдық беріп отыр. «Терең білім-тәуелсіздігіміздің тірегі» деген Н.Ә.Назарбаев «Мәңгілік ел» болуға қадам басқан тәуелсіз Қазақстанның ендігі жаһандану алдында ұлт ретінде жойылып кетпеуі үшін ұлттық кодын сақтаған, терең білімді, бәсекеге қабілетті, ұлттық құндылықтарын бойына сіңірген ақыл-ойы кемел тұлға болуына маңыз береді. Осы бағдарда ол бабалар ұлағатымен астасып жатқан зерделі ойы мен парасатты пайымын білдіреді: «Білімді, көзі ашық, көкірегі ояу болуға ұмтылу-біздің қанымызда бар қасиет».
Елбасымыздың мақаласын қолдау мақсатында Сарыбұлақ ауылдық кітапханашылары Т.Нурманова мен Б.Танкибаева оқырман залында Елбасымыз Нұрсұлтан Әбішұлы Назарбаевтың «Болашаққа бағдар: Рухани жаңғыру» мақаласының «Білімнің салтанат құруы» бағыты бойынша «Кеше мен бүгіннің өнегесі ұрпаққа мұра» атты оқырман конференциясын өткізді.
Конференциямызға ауыл әкімшілік қызметкерлері ауыл әкімі Б.А.Бектемиров, бас маманы Е.М.Конкышев, жастар нұсқаушысы С.Е.Рахимбаев, мектептің тәрбие ісі жөніндегі орыбасары Э.А.Жолмырзаева, ұйымдастырушы-педагог М.Таджиева, мектептің ағылшын пәнінің мұғалімі А.Н.Муслимова, мектеп кітапханашысы Ж.М.Мурзатаева, бастауыш сынып мұғалімі А.Н.Искакова және ата-аналар мен мектеп оқушылары қатысты.
Оқырман залы іс-шараға сай безендірілді. Іс-шара барысында «Болашағымыз-білімді жастар қолында» атты слайд көрсетіліп тұрды.
Кіріспеде Т.Нурманова Елбасы әрқашан жастарды еліміздің алтын қоры ретінде бағалап келеді, оған дәлел — Елбасының сындарлы саясаты. Аталмыш бағдарлама аясында өскелең ұрпақ үшін қолайлы жағдайлар қарастырылған. Нақтырақ айтсақ, білімнің салтанат құруы ерекше орын алды. Себебі, білімге деген құштарлық, көзі ашық, көкірегі ояу болуға ұмтылу-қазақ халқының қанында бар қасиет. Кітапханашы Б.Танкибаева келген оқырманға «Қазақ зиялыларының ең басты сіңірген еңбектері» атты баяндама оқыды.
Конференция барысында қатысқан ауыл әкімшілігі мен мектеп қызметкерлеріне Елбасымыздың «Рухани жаңғыру» мақаласының «Білімнің салтанат құруы» бағыты бойынша бүгінгі таңда «Ауылдық әкімшілігі тарапынан жастардың білім алуына қандай жағдайлар жасалынуда, ауылымыздың мектебінде балалардың тәрбиесіне байланысты қандай топтар құрылып, қандай іс-шаралар атқарылуда, соңғы екі жылда ауылымыздың мектеп мұғалімдері мен оқушыларымыз қандай жетістіктерге жетті, келешекте балалардың жақсы білім алуы мен тәрбиесіне қатысты қандай жоспарларыңыз бар?» сияқты сұрақтар қойылып, жауаптар алынды. Ағылшын пәнінің мұғалімі, мектептің дарынды балаларымен жұмыс атқаратын А.Н.Муслимова өз тарапынан екі жылдық мектептің мұғалімдері мен оқушылардың жетістіктерін тізбектеп айтып берді.
Мектеп оқушылары 7 сынып Абуталип Айтжан Рухани жаңғыру мақаласы негізінде жазылған «Жаңғырамыз! Көшеміз! Енеміз!» атты өлеңін оқып, 6 сынып оқушысы Аусынахын Камшат «Самға» атты әнін келген қонақтарға тарту етті.
Қорыта келе, кітапханашы Т.Нурманова: «Білімді жастар — ел келешегі. Бұған сәйкес мемлекетте жастардың тәрбиелі, білімді болуына күш салуы керек. Бірақ ата-баба салтынан, олардың салып кеткен сара жолынан таймау қажет. Елбасы Жолдауда атап көрсеткендей, «өзінің тарихын, тілін, мәдениетін білетін, сондай-ақ, заманға лайық, шет тілдерін меңгерген, озық әрі жаһандық көзқарасы бар қазақстандық қоғамның идеалына айналуы тиіс, жас буынға өткенімізді білетін, бүгінді түсінетін, ертеңімізге сеніммен қарайтын азамат болуы қажет» деп, қонақтарға ризашылығын білдіріп, конференцияны қорытындылады.

Тұрсын НҰРМАНОВА,
Сарыбұлақ ауылдық кітапхананың
меңгерушісі