Кербұлақ ауданының тұрғыны 17 жасар Мағжан Голландиялық әдіспен жем өсіріп шықты

Білім – жастан! Кербұлақ ауданы, Қарашоқы ауылының тумасы 17 жасар Мағжан Ысқақ өз ауылында Голландиялық әдіспен жем өсіріп шықты. Биылғы мектеп бітіруші түлек 2017 жылы Алматы облысы әкімінің «Very Innovative People» атты инновациялар мен жаңа технологиялар байқауына қатысып, аталған жобада 2 600 000 теңге көлемінде грант ұтып алған.Айта кетерлігі, бесінші рет өтілген ғылыми жобада алғаш рет ауылдық округтен шыққан азамат жеңіске жеткен. Нәтижесінде жас ғалым бүгінгі таңда жылыжай салып, Голландиялық ботаник Хуго де Фриздің әдісін пайдалана отырып, күн сәулесін және топырақты қажет етпейтін, небәрі 7 күнде шығатын бидай өсіріп шығарды. Голландиялық ботаник 18 күнде өсірген өсімдікті жас ғалым 7 күнде өсіре алды. Ауыл тұрғындары арасында қызығушылық танытып, жемді өз үйлерінде өсіруге ниет білдірушілердің де аз емес. Оған бірден-бір себеп жыл мезгілін таңдамай өсетін жемді жеген мал тез қомданады. Сонымен қатар, жас ғалым аудан жастарын тарта отырып, семинар өткізу жоспарының бар екендігін атап өтті.
Болашаққа жоспарлары туралы Мағжан:
-Осыдан бес жыл бұрын бір ғалымның , «Нобель сыйлығын алғысы келген адам өсімдікті қолдан шығаруы қажет. Көміртек монооксидін сіңіріп,оттек шығаратын өсімдіктен басқа дүниені қашан ойлап табады?», деген сөзі мені қатты ойға қалдырды. Бұйырса, екі жыл ішінде биофизиканы оқып, көміртекті сіңіріп, глюкоза түсетін және нәтижесінде оттек шығаратын аппарат ойлап табуды мақсат етудемін. Осындай жаңаша идеям бар. Бұл болашақтағы үлкен жоспарларымның бірі. Сонымен қатар, қазіргі таңдағы жобаларымның ішінде бір реттік жөргектер (подгузниктердің) зиянын ғылыми тұрғыда зерттедім. Бүгінгі таңда ғылыми жұмысымды С.Асфендияров атындағы медициналық университетінің ұстаздарының демеушілігімен Денсаулық сақтау Министрлігіне жолдадым. Жолданған хаттың жауабын күтудемін. Болашақта медицина саласының қызметкері болуды мақсат етудемін. Жемді қыс мезгілінде жүйелі түрде өсіретін болсақ, 25 ірі қара малды еркін түрде қорекпен қамтамасыз етуге болады.Сан гектар жерге егін еккенше, кішкене ғана тақтайшаларға жем өсіріп алудың пайдасы ұшан теңіз. Мемлекетке өз пайдамды тигізгім келеді», деді. Мағжанның ізін жалғаушы інісі де ғылыми жобалармен айналысуда.