Өлі риза болмай, тірі байымайды

«Өлі риза болмай, тірі байымайды» деген, әрі әруақ сыйлап өскен халық емеспіз бе, жуырда «Қияда» повесінің, «Жала мен нала», «Жыр жолбарыс», «Жаңғырық», «Аяз би» сынды романдардың иесі, Халықаралық Жамбыл атындағы сыйлықтың лауреаты, ҚР Президентінің стипендиаты, ҚР Еңбек сіңірген қайраткері, Халықаралық «Алаш» сыйлығының лауреаты сияқты көптеген марапаттаулар мен мадақтаулардың иегері Жұмабай Шаштайұлы мен «Дарын» мемлекеттік жастар сыйлығының иегері,Халықаралық Түркі академиясының президенті, «Егемен Қазақстан» республикалық газеті» акционерлік қоғамының Басқарма төрағасы, тарих ғылымдарының докторы Қыдырәлі Дархан Қуандықұлы ауданымызда болып, Дос батырдың, сондай-ақ Тезек төре мен Шоқан Уәлихановтың кесенесіне арнайы ат басын бұрып, мал сойып,құран бағыштады. Тарих ғылымдарының докторы Қыдырәлі Дархан Қуандықұлы Дос батыр туралы деректерге тоқталып, жиналғандарға біраз мағлұматтар беріп өтті.
Абылай ханның ұлдарының бірі, Ұлы жүз елін басқарған Әділден тарайтын Нұралы сұлтанның баласы, Жетісу жерінде Ұлы жүздің аға сұлтаны бола отырып, ел үшін аянбай еңбек етіп, тарих сахнасында өшпестей із қалдырған Тезек төренің кесенесінің басында да біраз тарихи деректер айтылды. Атақты Сүйінбай, Түбек, Бақтыбай, Құлмамбет, тағы да басқа ақындарды барынша қолдаған, өзі де суырып салма ақын, күйші ретінде қазақ әдебиетінде айтарлықтай орын еншілеген төре туралы көпшілік біле бермейтін мәліметтер сөз болды.
Ұлы ағартушы-демократ, қазақтың ғұлама ғалымы, небәрі отыз жасында жарқ еткен жұлдыздай соңынан өлмес мұраларын еңбектерін қалдырған Шоқан Уәлихановтың зиратына барып құран оқыған олар, ағартушыға арналған музейді аралады. «Әруағын сыйламаған ел азады»деген деп өздерінің бұл келісіндегі мақсаттарын айтып өткен қонақтар музейдегі сақталған жәдігерлерді көріп, ризашылықтарын білдірісіп, қолтаңбаларын қалдырды.
«Шоқан Уәлиханов шығыстану әлемінің үстінен құйрықты жұлдыздай жарқ ете қалды. Орыстың Шығысты зерттеуші ғалымдарының бәрі де ерекше бір құбылыс деп танып, одан түрік халықтарының тағдыры туралы ұлы және маңызды жаңалықтар ашуды күткен еді. Бірақ Шоқанның мезгілсіз өлімі біздің бұл үмітімізді үзіп кетті» деп жазған еді академик Н.И.Веселовский деген Жұмабай Шаштайұлы Шоқан туралы, ғалымды зерттеушілер жайында әңгіме өрбітті.
— Елбасының «Болашаққа бағдар: Рухани жаңғыру» мақаласында «Мен халқымның тағылымы мол тарихы мен ерте заманнан арқауы үзілмеген ұлттық салт-дәстүрлерін алдағы өркендеудің берік діңі ете оты¬рып, әрбір қадамын нық басуын, болашаққа сенім¬мен бет алуын қалаймын»-деген еді, міне, бүгінгі біз жүріп өткен жолдар да сол тарихымыздың бір беті дер едім,- деген аудан әкімі Махаббат Бигелдиев қонақтарға ақ жол тіледі.
.
Ләйлә ОҢАЛБАЕВА