Өрендер рухани жаңғырды

Бәрімізге белгілі, Елбасымыз Нұрсұлтан Әбішұлы Назарбаевтың «Болашаққа бағдар: Рухани жаңғыру» атты мақаласында «Ескі дәуір түйіскен өліара шақта Қазақстанға түбегейлі жаңғыру жаңа идеялар арқылы болашағын баянды ете түсудің теңдесіз тарихи мүмкіндігін беріп отыр. Мен барша қазақстандықтар, әсіресе жас ұрпақ жаңғыру жөніндегі осынау ұсыныстардың маңызын терең түсінеді деп сенемін. Жаңа жағдайда жаңғыруға деген ішкі ұмтылыс – біздің дамуымыздың ең басты қағидасы деген болатын.
Осыған орай, ауданымыздың мектептеріндегі тәрбие жүйесі одан әрі даму үстінде. Мектепке дейінгі тәрбие, қоғамдағы әлеуметтік-экономикалық жағдайларға, еліміздің салт-дәстүрі мен мәдениетіне, аймақтық ерекшеліктеріне тікелей байланысты.
Әсіресе, Елбасымыздың «Болашақта еңбек етіп, өмір сүретіндер бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады» деген сөзі ұстаздар қауымына сенім артып қана қоймай, үлкен жауапкершілік жүктейді. Оқушыларды елін, жерін шынайы сүюге, тарихын білуге, рухани азықтануға тәрбиелеу мақсатында жақында Қазынсу бастауыш мектебінің мұғалімдері 1-4 сынып оқушыларын аты әлемге әйгілі «Айғайқұмға» апарды. Табиғаттың кереметіне таңданған балалар шаршамай қуана басына шықты. Бұдан соң танымдық жорығымыз Ш.Уәлихановтың мемориалдық-мұражайында жалғасын тапты. Шоқан аталарының бұлағын, Шыңғысханның «ошақ тасын» тамашалаған оқушылар әсерлерімен өзара бөлісті. Туған жерлерінің тарихына жасаған сапарлары туралы ойларын шығарма етіп жазуға уәделесті.
Жас ұрпаққа сапалы білім ғана емес, саналы тәрбие беру – ұстаздардың міндеті. Өздері танып білген тарих арқылы ұлттық құндылықтарды түсініп, рухани жаңғырған өрендер ертеңге еліміздің туған жеріне туын тігер азаматтары болып өсетініне сеніміміз мол.
Шынар АҚЫЛБАЙ,
Қазынсу бастауыш мектебінің мұғалімі