Аудан әкімінің ауылдардағы іс-сапарында

Аудан әкімі Махаббат Бигелдиев кезекті іс-сапарын Басши ауылында жалғастырды. Актив жиналысын бастамас бұрын аудан әкімі ауылдық округтің әкімі Тоқтарбек Бекмұрзаевпен округтің Нұрым, Аралтөбе елді мекендерін аралап, әлеуметтік нысандарына зер салды.
Аудан әкімі ауылдық округтің әкімінің жұмыс кабинетінде ауыл активімен кездесіп:
Показать полностью…
— Ауылдарыңызды түгел аралап шықтым. Көз көрмеген соң көңіл сенбейді. Қай ауылда не барын жай сөзбен түсіндірсеңіздер де көрмегеннен кейін ол нәрсенің бұлыңғыр болып, қандай екен деген сұрақтың туындайтыны анық. Сол себепті ауылдың жағдайын өз көзіммен көріп, танысайын деп, ауылдық округтердің барлығын шетінен аралап келе жатырмын. Ауылдарыңызда күрмеуі қиын мәселелер болса айтыңыздар. Мен жазып алып отырайын. Бұдан мына әкім барлығын жасап тастайды екен деген ой тумауы керек. Сіздердің айтқандарыңыз бойынша жұмыс жоспарын құрып, сол жоспар бойынша кезегімен жұмыс жасамақ ойым бар,-деген аудан әкімі өзі туралы жиналғандарға қысқаша мәлімет беріп өтті.
Ауылдың ақсақалы Ғалым Тұрғамбаев ауылдың көшелерін асфальттау туралы және Ақтөбе ауылының ауыз су жүйесі сын көтермейтіні туралы сөз қозғаса, Жақыпбек Өмірбеков ауылдың жерінің жартылай шөлейт екенін айта келіп, бұрынғыдай мемлекеттік бағдарламалардың қолға алынбай отырғандығына тоқталды. Қалимолда Ахметбеков Райымбек орта мектебінің спорт залының төбесінен су ағып тұрғандығын, 2016 жылы смета жасалғанымен, қаржы бөлінбей жатқандығын айтып, көмек сұрады.
Аралтөбе орта мектебінің директоры Серік Қожаханов суға қаржының бөлінуіне ықпал етуін сұраса, ауылдық округтің әкімі Тоқтарбек Бекмұрза ауылға туристердің көптеп келетінін айтып, Ақтөбеге дейінгі жолды күрделі жөндеуден өткізу туралы ұсынысын айтты. Алтынемел ұлттық паркінің директоры Халық Баяділов: 100 гектар суармалы жерде екі платина бар, былтырғы жылы ақша бөлініп жөндеу жұмысын бастаған. Белгісіз себептермен жұмыс толығымен жасалмады. Толығымен күрделі жөндеуден өтіп, тазаланса, екінші мәселе ауылдың шыға берісінде сол жақта қоқыс тастайтын арнайы орын бар, сол қоқыстың орнын ауыстырса, себебі «Айғайқұмға» баратын туристер сол бағытпен өтеді. Осы мәселелерге назар аударсаңыз деген ұсынысын айтты.
Сарыөзек ауылдық округі:
Сарыөзек ауылында жалғастырған аудан әкімі Махаббат Сәдуақасұлы, Сарыөзек ауыл округінің әкімі Батырхан Ешметұлы, «Күреңбел Су құбыры» басшысы Жұмакүл Сейдахметқызы, Кербұлақ ауданының тұрғын үй-коммуналдық шаруашылық және тұрғын үй инспекциясы бөлімінің басшысы Бауыржан Нұрахимұлымен бірге Сарыөзек ауылының ауыз су мәселесі бойынша «Дос» бекеті, «Бес мыңдық», «Қарабақ» суқоймаларын аралады. Жұмакүл Сейдахметқызы сөз тізгінін алып:
— Негізінде Сарыөзек аулында су жетерлік, суды жеткізетін орындардың, құрылғылардың тозығы жеткен. «Су — тіршілік көзі», сондықтан ішіп отырған суымызды бір ретке келтірсек. Құрылғыларды ауыстырсақ, жер құбырларды тазалатып, ыңғайы келіп жастса ауыстырсақ. Бірақ, оның барлығын қаржының шешетіні анық. Дегенімен жасалған жұмыс та бар. Қолдан келгенше ауылды сумен қамтамасыз етіп, су қоймаларының жан-жағын тазалап, қоршап, былтырғы жылы күзетшіге арнайы орын салып, бейнебақылау орнаттық,-деп сөзін аяқтады.
Аудан әкімі Махаббат Сәдуақасұлы cөзінде: ауыз су ауылымыздың күрделі мәселесі екенін, Жұмакүл Седахметқызы мен ауыл әкімі Батырхан Ешметұлына арнайы тапсырмалар беріп, суқоймалардың картасын алып қарау керек екендігін, алдағы уақыттарда шешілетін мәселе, біраз еңбектенуіміз керек екендігін жеткізді. Жоғарыда айтылған мәселелерді жұмыс жоспарына кіргізетінін, қолыннан келгенше жұмысты орындайтынын айтты.
Ләйлә ЕСКЕНДІРҚЫЗЫ,
Дидар ДИХАНБАЕВ