Жаза бергім келеді…
Адам бір нәрсеге қуанып, көңілденген сәтінде бала сияқты болып кетеді-ау деп ойладым, бізді көріп, балаша қуанған Әнуарбек Сейітқазыұлына қарап тұрып. Ағамыз біз көліктен түсіп, үйіне кіргенімізше аңқылдап, талай әңгімені айтып тастады. Көп жылдар бойы газетіміздің қоғамдық тілшісі болып жүрген өзін газетке жазу мақсатымыз екенін, сол себепті, үйіне іздеп келіп жатқанымызды айтқанда, ағамыз қуанғанын жасырмады.
Показать полностью…
-«Кербұлақ жұлдызы» газеті шыққанға дейін республикалық, облыстық басылымдарға мақалаларым жарияланып тұратын. Аудандық газет шыққан алғашқы күннен бастап газетке мақала жаздым десем, өтірік айтқандық емес. «Әттең, оқымай қалғаның болмаса, бір жерден шығатын едің» дейтін таныстарым. Рас, ол кезде оқуға мүмкіндігім болмады. Әне-міне деп жүргенде өмір-өзен жылыстап өте берді ғой. Бүгінгі күнге дейін көңіліме сыймаған дүниелерді түртіп, газеттерге салып жіберетінім бар. Бірақ көп газет қазіргі таңда сын мақалаларды баспайды ғой,-деді үйге еніп, жайғасқан соң сырын шертіп.
Әр нәрсені бір ойлап,
Газетке жаздым мақала.
Редакцияға барған соң
Қалмасыншы тасада-деп қойып, ауылдағы жаңалықтарды, тіптен көңіліме сыймаған кем-кетіктерді де жазып тұрдым ғой, несін айтасың, қарағым. Бұрынғылардың «Адам қартайғанда бір бала» деген сөздерінің жаны бар сөз екендігіне енді көзім жетіп жатыр ғой. Кейінгі кездері неге екенін осы талай газетке мақала жазып тұрдым, солардың бірі мынадай қоғамдық тілшіміз болып еді-ау деп бір елемеді-ау деп іштей қамығып, ойлап қоятын едім. Сол ойымды оқып қойдыңыздар ма өздеріңіз келіпсіздер,-деген аға аңқылдап.
Әнуарбек Қырбасов 1965-1968 жылдары әскери борышын өтеп келгеннен кейін ауылында әртүрлі жұмыстарды атқарыпты. 1972 жылы Қапал ауданында ашылған жүргізушілер дайындайтын мектепте оқып,1973 жылдың наурыз айында автокөлік жүргізуші куәлігін алған ол өз ауылына келіп, жанар-жағар май таситын автокөлікке ие болады. Арнайы білімі жоқ азамат колхоздың қандай жұмысы болсын, бел шеше кірісетін еді. Ал қолы қалт еткенде жазу үстеліне отыратын…
«Ұқыптының уақыты мол» деген екен М.Әлімбаев. Ұқыпты адам, тәртіпті, тыңғылықты болатыны белгілі. Ондай адам өз іс-әрекетінде үнемі жинақылық танытады. Мақаламызға арқау етіп отырған Шанханай ауылдық округінің тұрғыны, газетіміздің қоғамдық тілшісі Әнуарбек Қырбасов сондай жандардың бірі. Тыңғылықты іс қашанда нәтижесін береді ғой. Әнуарбек Қырбасов та тыңғылықтылығының арқасында мақтау-марапаттардан кенде болған жоқ. Оған дәлел қатталып, рет-ретімен қойылған марапат қағаздары. Әнуарбек аға өзінің әр жылдарда республикалық «Қазақстан пионері», «Жетісу», облыстық, «Октябрь туы», аудандық «Кербұлақ жұлдызы» газеттерінде жарияланған мақалаларын да шашауын шығармай, сақтап қойыпты. 1986 жылы басталған қойын кітапшасында қай күні қай газетке қандай мақала салды, барлығы ретімен тізіліп жазылыпты. 1960-1962 жылдары шыққан, жарты ғасырдан артық сақталған мақалаларын оқып, ұқыптылығына таңғалғанымыз рас.
— Тарих қой бұл, оның үстіне күн-түн демей, жазған дүниелерім болғандықтан қимайды да екенсің. Әрі біз қашанғы жүреміз, соңымнан немере-шөберелерім атамыз осындай кісі болған екен деп жүреді ғой деп жинап жүргенім ғой,- деді ағамыз.
«Қорыққан адам тілші болмайды» деген. Кейбіреулердің қысыр сөздерін естіп, бір жағы реніштен де болар «Атақ үшін тілші емеспін», «Жаза бергім келеді», «Сенімнен шығу — міндетім» деген сияқты мақалаларды да жазғаным бар» деген ардагер тілшіміз:
-Қандай тілшің бар еді,
Газетті сақтап жинайтын.
Ағаңды ұмытпай жүріңдер,
Газетті тастауға қимайтын,
— деп өлеңін оқып берді қоштасарда.
— Бәрімізге ортақ мереке құтты болсын, аға! Жақсы күндеріңіз көп болсын. Журналист болмасаңыз да журналистерше еңбек еттіңіз. Біз сізді сол үшін де сыйлап, құрметтейміз. Талай қырды асқан уақыт сәйгүлігінде Алла әрдайым немерелердің қылығына тоймай, балаларыңыздың сый-құрметіне бөленіп жүруге нәсіп етсін,-дестік, кейбіреулер сияқты дүние-мүлік, ақша емес, өзі айтпақшы сүйікті «Кербұлақ жұлдызы» газетін жиған қоғамдық тілшіміз Әнуарбек Қырбасовпен қоштасып тұрып. Ал «Кербұлақ жұлдызы» газетіне арнап жазған өлеңін өздеріңізге ұсындық құрметті оқырман.
Аңқылдаған қоғамдық тілшіміздің аппақ көңіліне риза болған біздер ол кісі арнайы табыстаған, жылдар бойы жинаған «Кербұлақ жұлдызы» газетінің 1988-2015 жылдарға дейінгі тігінділерін газетіміздің мұрағатына қуана-қуана қостық.
Ләйлә ЕСКЕНДІРҚЫЗЫ.