Тарих — өткеннің сабағы

Өткен ғасырдың отызыншы жылдары қатігез саясаттың нәтижесінде «Халық жауы» атанып, қуғын-сүргінге ұшыраған зиялы қауыммен бірге олардың жақындары да азап шеккені тарихтан белгілі. Саяси қуғын-сүргін құрбандарын еске алу күнінде Орталық алаңға ауыл тұрғындары көптеп жиылды. Бір минут үнсіздікпен құрбан болғандар еске алынды.
Аудан әкімі Бигелдиев Махаббат Сәдуақасұлы:
— Құрметті киелі мекен Күреңбел өңірінің тұрғындары! Қазақ елінің тарихында мәңгі өшпес кезеңдердіңұлтымыздың намысын татпаған, азаттықтың туын желбіреткен қайсар азаматтарымыз солақай саясаттың құрбаны болып, қуғын-сүргінге ұшырады. Еліміз егемендік алғаннан бері 31-мамыр күні Елбасының 1997 жылы 5-сәуіріндегі жарлығына сәйкес саяси қуғын-сүргін құрбандарын еске алу күні болып жарияланды. Тәуелсіздік жылдарында Елбасы Н.Ә.Назарбаевтың: «Тарих — өткеннің сабағы. Біз өткенімізге қарап, ертеңімізді түзеуіміз керек» деген сындарлы сөзі тарихи санамызды жаңғыртуға, ұлттық рухтың өрлеуіне жол ашты. Егемендіктің ширек ғасырында ел тарихының көмескілігі қайта ашылып, мемлекетіміздің соңғы жүз жылдықтағы оқиғаларына жаңаша баға берілуде. Кеңестік тотолитаризмнің зұлым саясаты мен зұлмат әрекеті ешбір елді таңдап, ешбір адамды таңдаған жоқ. 1920-1950 жылдары Кеңестер одағында миллиондаған адам саяси қуғын-сүргінге ұшырады. Қазақтың қаншама қабырғалы тұлғалары солақай саясаттың құрбандарына айналды. Қанды қасап жылдары қазақ жеріне тұтас халықтар жер аударылды. ХХ ғасырдың бірінші жартысында Қазақстанға миллиондаған адам күшпен көшіріліп әкелді. 1931-33 жылдары Қазақстан халқы үшін нәубет кезінде 6 миллион 200 мың қазақтың екі миллион жүз мыңы аштықтан көз жұмды. Бір миллионға жуығы атажұрттан шетелге көшуге мәжбүр болды. Бүгінгі еске алу іс-шарасының идеялық мазмұны — өскелең ұрпаққа ата-бабалардың өткен жолын мұра ету,-деп, нәубет жылдарында қуғын-сүргінге ұшыраған қазақтың белгілі үш бәйтерегі мен бес арысын, сондай-ақ, Күреңбел өңіріндегі жазықсыз жапа шегіп, қуғынға ұшыраған ата-бабаларымызды атап, өткеннен сабақ алып, тарихи тұлғаларды ұмытпайтынымызды, еске алып, тағзым ететінімізді, олардың мәңгілік халық жадында болатынын айтты.
Митингтен соң аудан әкімі Махаббат Сәдуақасұлы Бигелдиев бастаған топ саяси қуғын-сүргін құрбандарын еске алып, құран бағыштау ниетімен орталық мешітке атбасын бұрды. Құрбандыққа шалынған малға ауданның бас имамы С.Андақұлов бата жасады.
А.ҚАСЕНОВА.