Нұрлы болашақ

Халықаралық балаларды қорғау күніне орай, Сарыөзек ауылының орталық алаңында, аудандық білім бөлімі мен аудан мектептерінің өнерлі балаларының дайындаған «Нұрлы болашақ» атты мерекелік концерттік бағдарламасы өз дәрежесінде өтті. Орталық алаң түрлі шармен, жалаушалармен безендіріліп, балалардың көңіл-күйіне ерекше әсер берді.
Алақай-ау, алақай.
Той тойлайық балақай.
Қызарғанша алақан,
Қол соғайық, балақай!-деген жүргізушілер «Құрметті күреңбелдіктер, ауыл қонақтары! Қымбатты бүлдіршіндер мен сәбилер! 1 маусым-Балаларды қорғау күні құтты болсын! Барлығыңызға ашық аспан, бейбіт өмір, сәбилерге бақытты балалық шақ, әрқашан сыңғырлаған шат күлкі тілейміз!» деп ақжарма тілегін айтып, ертеңгілікті одан ары жалғастырды. Балалар күніне арналған «Нұрлы болашақ» атты мерекелік ертеңгілікте мерекелік сыйлық тапсыру үшін сөз аудан әкімінің орынбасары Б.Момбаевқа берілді. Ол Бүкіл әлемде 1 маусымда Халықаралық балаларды қорғау күні аталып өтетінін, республикамызда 5 миллионнан астам бала тұратынын, бүгінгі таңда ел болашағы – балаларымыздың білімді, тәрбиелі, отансүйгіш, елжанды азамат болып өсулеріне барлық жағдайдың жасалғанын айта келе, балдәурен шақтың қызығына тоймай, бақытты болуларына тілектестігін білдіріп, әрбір ата-ананың үміт артқан, үкілеген бүлдіршіндерін мерекелерімен құттықтап, балаларға сыйлық үлестірді.
Аудан орталығындағы мектептердің шеруіне жол берілді. Күреңбел қазақ орта мектебінің музыкалық ансамбльдері, Д.Қонаев атындағы орта мектебінің облыстық, республикалық, халықаралық байқауларды бағындырған жеңімпаздары, № 49 орта мектебінің белсенділері, аудан, облыс көлемінде өткен олимпиада, спорттық жарыстар мен интеллектуалдық ойын жеңімпаздары, сондай-ақ, «Мәңгілік Ел» жалпыұлттық идеяны жүзеге асыру жағдайында рухани-адамгершілік, эстетикалық, патриоттық тәрбие алу аясындағы Кадет сыныбы, түрлі деңгейдегі фестивальдер мен байқауларда өз өнерлерімен көзге түскен оқушылары, сонымен қатар, Сарыөзек орта мектебінің аудан, облыс, республика көлеміндегі байқаулар мен жарыстардың жеңімпаздары мен генерал-лейтенант Бақытжан Ертаев атындағы кадет сыныбы жүріп өтті.
Шерудің соңынан “Би-Кур” тобының флешмобы, «Қайнар бұлақ» тобының өнері, “Балдырған” балабақшасы бүлдіршіндерінің “Тауыс” биі, Қарашоқы орта мектебінің оқушысы Қазына Уәлиханның «Домбыраның күмбірі», Жоламан орта мектебінің оқушысы Нұрай Қынаятқызының «Ана-Әке» әні, Жоламан орта мектебі оқушыларының “Кербез” биі, «Ақтиін» балабақшасы тәрбиешілерінің «Аңдар» ертегісі, Сарыбұлақ шағын орталығының бүлдіршіндерінің «Құстар» биі, Ш.Уәлиханов атындағы орта мектептің 10 сынып оқушысы Қарлығаш Қожабекованың «Атамекен» әні, Д.Қонаев атындағы орта мектептің оқушысы Айкүміс Бердімұраттың «Тәуелсіз Қазақстанның қызымын» әні, Қарашоқы орта мектебі оқушыларының «Наз» өзбек биі, Күреңбел қазақ орта мектебінің оқушысы Әсем Нұрланқызының “Ертегілер” әні, Ш.Уәлиханов атындағы орта мектептің «Жұлдызай» тобының «Күй шашу» биі тамашаланып, қошеметке ие болды.
Ертеңгіліктің соңында аудандық білім бөлімінің қызметкерлері балалар мерекесіне атсалысып, демеушілік көрсеткен аудан әкімдігіне, Білім беру және ғылым қызметкерлерінің кәсіптік одағының аудандық комитетіне, Кербұлақ ауданы бойынша мемлекеттік кірістер басқармасына, сондай-ақ, мерекелік іс-шараға атсалысқан Күреңбел қазақ орта мектебі, Д.Қонаев атындағы орта мектебі, Сарыөзек орта мектебі, № 49 орта мектебі, Қарашоқы орта мектебі, Жоламан орта мектебі, Сарыбұлақ орта мектебі, Ш.Уәлиханов атындағы орта мектептерге алғыс айтты.
А.ҚАСЕНОВА