Бақ пен бәс сынға түсер уақыт таяу.
Мектеп бітірушілердің бағы мен бәсі сынға түсетін Ұлттық бірыңғай тестілеу сынағының өтетін уақыты да таяп қалды. Мектеп бітіруші түлектердің, олардың ата-аналарының, ұстаздарының сын сағаты таяған сайын жүректері лүпілдеп, қалай болады екен деген ойдың жетегінде жүргені де рас. Алтын ұя мектебінен ұшқалы тұрған түлек үшін ҰБТ оңай сынақ емес екені де айқын. Олардың болашағының бір кірпішінің осы сынақ арқылы қаланатыны да белгілі.
Показать полностью…
Жуырда аудан әкімдігінің мәжіліс залында аудан әкімі Махаббат Бигелдиев мектеп директорлары мен мұғалімдер қауымымен, қамқоршылық кеңесі мүшелерімен жиналыс өткізді. Аудан әкімі :
-Ұлттық біріңғай тесті тапсыратын уақыт жақындап қалды? Қандай жұмыстар жүргізіп жатырмыз? «Алтын белгі», «Үздік аттестат » алады деп сеніп отырған оқушыларымыз үмітті ақтай ала ма? Дайындықтары қалай? Ата-ана, мұғалімдер тарапынан оларға қандай көмектер жасалынып жатқандығын толық баяндап беру үшін сөзді өзінің орынбасары Болысбай Момбаевқа берді.
-Ауданымызда жалпы саны 8680 оқушы бар. 11 сыныпты 600 оқушы бітіреді. Олардың ішінен 414 оқушы ҰБТ қатысады. Тест алу 21 маусым күні өтеді. 44 оқушы «Алтын белгіге», 25 оқушы «Үздік аттестатқа» үміткер. Биыл 11 сынып бітірушілердің бірқатары ҰБТ Алматы, Талдықорған қалаларында дайындалды. Биылғы ҰБТ бойынша көрсеткіш 83,3 болады деп күтудеміз, — деген орынбасар мектептердегі дайындық барысына тоқталды. Кейбір үміт күтетін оқушылардың дайындығының әлі де жеткіліксіздігін де жасырмады.
Аудан әкімі алдын-ала алынған тестілеудің нәтижесін қарап, аудандағы көрсеткіші төмен мектептердің директорларын орнынан тұрғызып, көрсеткіштің төмендігінің себебін сұрап, көрсеткіштің жоғарғы деңгейде болуы үшін дайындалу керектігін қатаң ескертті.
-Көрсеткіш неге төмен, неден ақсап тұрмыз деген сұрақты қарастырдыңыздар ма? Жетістіктің үздіксіз еңбектенудің нәтижесінде келетіні белгілі. Осы жолда қандай іс-әрекеттер жасадыңыздар? Оқушылардың төмен баға алуына алдымен мына біздер кінәліміз. Шындыққа тіке қарамаймыз. Балалардың білімін саралап, қосымша сабақтарды жүйелі түрде өткізбейміз. Бір ізге түсіп алғанбыз . Сонымен кетіп барамыз. Сапалы білім беруді бастауыш сыныптан бастауымыз керек. Бір күн еңбек етсекте абыроймен қызмет жасалық. Кеше ғана келіп отырған мен үшін дәл бүгінгі күні осы сынақтан өткен үлкен белес жоқ, -деген аудан басшысы Махаббат Бигелдиев тест тапсыру кезінде мектеп бітіруші түлектің орнына өзгені кіргізу деген сияқты оқиғалардың болмауын, тест тапсыру ережесінің қатаң сақталуын талап етті. Мектеп бітіруші түлектердің тестке келген кездегі ары -бергі жол қатынасын , жатын орындарын , тамағын қадағалауды орынбасары Болысбай Момбаевқа тапсырды.Және мектеп директорлары мен ұстаздарға, ата-аналарға тесті дұрыс тапсыра алмаған балаларды да қадағалау керектігін ескертті.
-Қазақ болашағының жауапкершілігі сіз бен біздің мойнымызда,- деген аудан басшысы мектеп директорларына, ұстаздарға оқушылардың алдағы сынақтан сүрінбей өтуі үшін дайындықты күшейту керектігін баса ескертті.
Сол күні аудан әкімі Махаббат Бигельдиев ҰБТ өтетін орынды барып аралап, орынбасарлары Болысбай Момбаевқа, Серікбай …, білім бөлімі басшысының қызметін уақытша атқарушы Райгүл … тапсырмалар берді.
Ләйлә Оңалбаева