Ауылдардың жай-күйімен танысты

Аудан әкімі Махаббат Бигелдиев өзінің алғашқы іс сапарын Алтынемел ауылдық округінен бастады. Әруақ аттамайтын атаның ұрпағы екендігін танытқан аудан әкімі ат басын Тезек төре басына барып құран бағыштаудан бастады.
Алтынемел ауылдық округіне қарасты Қызыл мектеп, Байғазы, Қарлығаш, Тастыбастау елді мекендерін және Алтынемел ауылдық округінің әр көшесін аралап, мектебін, дүкен ,дәрігерлік пункт, мәдениет ошақтарымен яғни ауыл тұрғындарының тұрмыс-тіршілігімен танысқаннан кейін, аудан әкімі Алтынемел ауылдық округінің әкімдігі ғимаратында ауылық округтің активімен танысты. Өзінің осы ауданды 24 мамырдан бері басқарып отырғанын, Қарасай ауданымен Кербұлақ ауданын салыстыруға келмейтінін көптеген мысалдармен келтірген жаңа басшы ауылдардың бүгінгі жай-күйін сөзбен естігеннен көрі бір рет өз көзімен көргендей болмайтындығын, сондықтанда барлық ауылдық округті өзі аралап шығатынын жеткізді. Шешілмей отырған күрделі мәселелер болса жасырмай айтуларын, сұраған әкім «ауруын жасырғанды өлім әшкерелейді» дегендей, шешімін таппай отырған мәселелерді бірден шешіп тастаймын деп айта алмаймын, жасайтын шаруаның көп екендігін де көріп отырмын. Қазіргі кезде талапта күшті, әйтсе де қолдан келгенше бірлесіп жұмыс жасалық»-деді.
Алтынемел орта мектебінің директоры Айнұр Ахметова қыста қатты желден мектептің терезесінің ұшып кеткендігін, өздерінің күштерімен қайтадан салғандығын айтып, мектептің терезелерін ауыстыруға көмек сұраса, Майтөбе орта мектебінің директоры Еркін Нүсіпбеков өзі басқарып отырған мектептің салынғандығына 5 жыл болғандығын, алайда қабырғаның сылақтарының құлап жатқандығын айтты. Ауылдық Мәдениет үйінің директоры Мәдина Сламбекова өзінің осы ауылға «Дипломмен ауылға» бағдарламасы арқылы жас маман болып келгеніне 9 жыл болғандығын, мәдениет үйінің бүгінгі таңда сын көтермейтінін айта отырып, күрделі жөндеуден өткізуге көмек сұрады.Ауылдық дәрігерлік амбулаторияның меңгерушісі Мәншүк Нұрсапаева өздері отырған ғимараттың адам төзгісіз суықтығын, жылыту жүйелерін ауыстырғанмен нәтиже болмағандығын, айтты.
Бірқатар аудандарда және Талдықорған қаласында әкім болып, сонымен қатар, біраз жыл облыс әкімінің бірінші орынбасары лауазымын абыроймен атқарған, біздің ауданға әкім болғанға дейін қазыналы Қарасай жерін басқарып, іскер азамат, білікті маман ретінде өзін көрсете білген жаңа басшы,ауылдық округтің ауыз су, жол, мектеп, балабақша, дәрігерлік амбулатория сияқты барлық күрделі мәселелерін жазып алып, болашақта осы мәселелер бойынша мүмкіндігінше жұмыс жасайтындығын жеткізді.
Ләйлә Оңалбаева