Өнерді сүймеген елдің, өнегесі өрге баспайды

«Өнер — ұлттың жаны» дейді халық даналығы. Осы орайда, ғасырдан ғасырға өтіп, атадан балаға мұра болып келе жатқан асыл қазынамыз — өнеріміз бен мәдениетіміздің өркендеуіне үлес қосып, аянбай еңбек етіп жүрген мәдениет және өнер қызметкерлері туралы қанша айтсақ та артық болмайды деп ойлаймын.
Ауданда өткен қандай іс-шараның болмасын басында алдымен осы мәдениет және өнер қызметкерлерінің жүретіні де анық. Күннің ыстық- суығына да қарамай, жұмыс күні немесе демалыс деп бөлмейтіндер де сол мәдениет саласының қызметкерлері. Адамзат баласының рухани дамуына үлкен үлес қосып, еліміздің рухани құндылықтарын дәріптеп, әрбір жанға шексіз қуаныш сыйлайтын да мәдениет саласында жүрген жандар. Бүгінгі таңда өтіп жатқан іс-шараның қай-қайсысын болмасын өнер адамдарынсыз елестету мүмкін де емес.
Жуырда Ә.Сарыбаев атындағы Мәдениет үйінде адамзат баласына қуаныш сыйлайтын, өнерлерімен-ақ бірде мұңға батырып, бірде шаттандыратын — мәдениет және өнер қызметкерлерінің кәсіби мерекесі аталып өтті. Халқымыздың мәдени талғамы мен танымын қалыптастырып, еліміздің әлеуметтік-рухани құндылықтарын дәріптеп жүрген өнер адамдарына құрмет көрсетілді.
Мәдениет және өнер қызметкерлерінің құрметіне орай өткен салтанатты жиынды аудандық мәдениет және тілдерді дамыту бөлімінің басшысы Әділжан Әділхан ашып, жүргізіп отырды.
Құттықтау сөз аудан әкімі Б.Алиевке берілді.
— Құрметті мәдениет және өнер қызметкерлері! Бүгінгі кәсіби мерекелеріңіз құтты болсын! Ауданымыз қай сала болмасын жақсы жетістіктерге қол жеткізіп, алдыңғы саптан көрінуде. Солардың бірі — өнер саласы. Рас, аудандар арасында өтетін мәдениет күндерінде бір жылдары ынталандыру сыйлығын місе тұтқан кезіміз де болған. Одан кейін өзімізді өзіміз қайрап, І орынды алдық. Басты мақсатымыз — Бас жүлде болғандықтан, сіздердің қажырлы еңбектеріңіздің арқасында ол биікті де бағындырдық. Бас жүлдеге қол жеткізіп, автокөліктің кілтін алып, қуанышқа кенелген кезімізде артта қалды. Әрине жетістікті айта салу оңай, ал оған жетудің оңай емес екеніні бастарыңыздан өткерген сіздер жақсы білесіздер. Ауданымыздағы мәдениет саласындағы жеткен жетістіктердің барлығы Сіздердің еңбектеріңіздің арқасы, маңдай терлеріңіздің өтеуі. Биылғы жылы «Үздік ауыл клубтары» арасындағы байқауға қатысқан Шанханай ауылдық округіндегі мәдениет үйі мен Доланалы өтті. Мұның бәрі үлкен еңбекті қажет етеді,-дей отырып, мереке иелерін бүгінгі қуаныштарымен құттықтады.
Кезек марапаттауға беріліп, аудан әкімі аудандық Мәдениет үйінің жетекшісі Ж.Жексенбаевқа Қазақстан Республикасы мәдениет және спорт Министрлігінің «Қазақстан Республикасы мәдениет саласының үздігі» төсбелгісін, Шоқан Уәлиханов атындағы мемориалдық музейінің директоры С.Әбішеваға облыс көлеміндегі 22 музейдің ішінде 2017 жылдың қорытындысы бойынша «Ең үздік музей» номинациясы бойынша диплом және 100 мың теңге, Доланалы ауылдық клубының меңгерушісі А.Мұхамеджановқа облыстағы 238 мәдениет үйінің арасынан «Үздік мәдениет қызметкері» номинациясы бойынша диплом және 100 мың теңге көлемінде сыйлықты, сондай-ақ, Алматы облысы мәдениет, архивтер және құжаттама басқармасының дипломын және Ынталандыру жүлдесін Елбасы Н.Назарбаевтың «Болашаққа бағдар: рухани жаңғыру» бағдарламалық мақаласы аясында республикалық «Бір ел, бір кітап» акциясы бойынша облыстық кітапхана блок байқауында Сұлтанмахмұт Торайғыровтың шығармашылығын насихаттауда өзіндік ерекшелігімен көрінген Кербұлақ аудандық кітапханасына, директоры Б.Нұрбаеваға табыс етті. Облыстық кітапхана директорының Алғыс хатымен аудандық кітапхананың әдістеме бөлімінің меңгерушісі Г.Солтанқұлова тағы басқа қызметкерлер марапатталса, ауданымыздың мәдени-әлеуметтік дамуына қосқан үлесі және мәдениет және өнер қызметкерлерінің кәсіби мерекесіне орай аудандық Мәдениет үйінің менеджері М.Әбжапаров аудан әкімінің Құрмет грамотасына ие болды. Аудандық агроөнеркәсіп кешені кәсіподақ ұйымының Құрмет грамотасымен А.Мұйтынова, А.Жұмабекова, Б.Керімқұлова ие болса, аудандық мәдениет және тілдерді дамыту бөлімінің атынан бірнеше қызметкерге Алғыс хаттар, қаржылай сыйлықтар табыс етілді. Үйірме жұмыстарының біржылдық қорытындысы шығарылып, нәтижесінде Алтынемел ауылдық Мәдениет үйі Бас жүлдені иемденіп, алғашқы жүлделі үш орынды Қарашоқы, Қоянкөз, Талдыбұлақ ауылдық округінің Мәдениет үйлері өзара бөлісті.
Бүгінгі күн құдды бір марапат жауған күн болды дерсің. Ауылдық Мәдениет үйлері, кітапхана қызметкерлері, үйірме жетекшілері түрлі мадақтауларға ие болып, бірін-бірі құттықтап жатты.
Салтанатты жиында сөз алған Шоқан Уәлихановтың «Алтынемел» мемлекеттік мемориалды музейінің директоры С.Әбішева, аудандық кітапхана директоры, кітапхана ісінің үздігі, ардагері Б.Нұрбаева, мәдениет саласында 35 жыл еңбек еткен Ж.Жексембаев әріптестеріне жылы лебіздерін айтып, мерекелерімен құттықтап, аудан басшыларына алғыстарын білдірді.
«Бұлақ көрсең — көзін аш» деген. Ауылындағы жылт еткен жақсылықты қалт жібермей, бойында тарыдай таланты бар балаларды өнерге баулып, тәрбиелеп, әртүрлі конкурстарға жетелеп, сол кішкене ғана өнер иелерімен бірге қуанып, бірге уайымдап жүргенде осы мәдениет және өнер қызметкерлері, үйірме жетекшілері. Олардың еңбегінің қаншалықты дәрежеде екендігін көрсететін де сол шәкірттері. Бүгінде сол Мәдениет үйлерінде тәлім алған шәкірттердің бірқатары өнерге қанат қағып, біразы білім ордасында өнерлерін шыңдап жүрсе, енді біреулері еліміздің әр түкпірінде мәдениет саласында қызмет атқарып жүр.
Бүгінгі жиын сол еңбектің деңгейін анықтап, бағасын берген 2017-2018 жылғы үйірме жұмыстарының YI қорытынды есеп беру гала концерттік бағдарламасымен жалғасты.
«Құлақтан кіріп, бойды алар, әсем ән мен тәтті күй» деп Абай атамыз айтқандай, Жанғазы Жексенбаевтың жетекшілігімен домбыра үйірмесінің орындауында Хабидолла Тастановтың «Би күйі», халық әні «Еркем-ай», Бегалы Ералыұлының орындауындағы Махамбеттің күйі «Жұмыр қылыш», Әділхан Ұлжанмен бірігіп орындаған Құрманғазының «Адай», домбырашылар ансамблімен орындаған Нұрғиса Тілендиевтің «Әлқисса» күйлері орындау шеберліктерімен көрермен қауымды тәнті етті. Нұрай, Сезім Қадыровалардың орындауындағы «Әкетайым», Жанат Ақтілектің орындауындағы «Дудар-ай» әні, Мұқаш Мағжанның орындауындағы «Көзімнің қарасы» әндері нақышына келтіре орындалса, «Әдемі-ай», «Наз» би топтарының бишілерінің биі концерт көрігін қыздыра түсті.
-«Өнер — мінсең ат, ұшсаң — қанат, кисең — жанат, ішсең – тамақ» дегендей, ауданымызда 1 аудандық, 8 ауылдық мәдениет үйлері және 2 ауылдық клуб жұмыс жасайды. Аталған Мәдениет үйлерінде 63 клуб құрылымдары бар. Үйірмелерге қатысушы өнерпаздар саны 830. «Шөп өспейтін дала болмас, ән айтпайтын бала болмас» немесе «Әу» демейтін қазақ жоқ» демекші, ауданымызда жақсы өнерді жанына серік еткен, музыканың мәнін жете түсінетін, биші, күйші өнерпаздарымыз жетіп артылады. Жетістігімізді айтар болсақ, жаңа өзіңіз куә болдыңыз біраз қызметкерлеріміз Қазақстан Республикасы мәдениет және спорт Министрлігінің «Қазақстан Республикасы мәдениет саласының үздігі» төсбелгісімен, облыс көлеміндегі «2017 жылдың қорытындысы бойынша «Ең үздік музей», «Үздік мәдениет қызметкері» сияқты атақтар мен марапаттауларға ие болды. Бұл — біз үшін биылғы жылғы үлкен жетістік, үлкен қуаныш. Біраз жылдан бері дәстүрлі өтіп келе жатқан «Мәдениет күндері» екі жыл болды жаңа форматта «Үздік мәдениет үйі» деп аталып өтіп жатыр. Осы аталған «Үздік мәдениет үйлері» байқауына ауданымыздан Шанханай ауылдық Мәдениет үйі мен Доланалы ауылдық клубы қатысты. Бұл шараға екі ауылдың бүкіл тұрғындары атсалысты десем болады. Өте жақсы деңгейде өтті. Қорытындысы облыс көлемінде қазан айында шығарылады. Осы шараға қатысқан 34 Мәдениет үйінің екеуі біздің ауданнан,-дейді аудандық Мәдениет үйін 2007 жылдан басқарып келе жатқан аудандық мәдениет және тілдерді дамыту бөлімінің басшысы Әділжан Әділхан.
2007 жылы ауданымызда екі-ақ Мәдениет үйі болған еді. 2008 жылы тоғыз Мәдениет үйі ашылып, 11-ге жеткен екен. Іскер, ізденімпаз басшы ол көрсеткішпен тоқтап қалмай, 2013 жылы Талдыбұлақ ауылдық Мәдениет үйінің, 2010 жылы Шанханай ауылдық Мәдениет үйінің күрделі жөндеуден өтуіне, ал 2011 жылы Басши ауылдық Мәдениет үйінің салынуына ықпал етіпті.
— Сахна — адамның эстетикалық талғамын қалыптастырады. Көпшіліктің алдына шығып, өнер көрсету кез-келген адамның қолынан келе бермейді деп ойлаймын. Өнерді, сахнаны бағалай білетін халықпыз. Сондықтан да сахнаны киелі деп жатамыз,-дейді бала кезінен домбыра, сырнай, мондалиннің құлағында ойнаған, бүгінде сырлы әнімен көрерменін баурап алатын әнші, сырнайшы, домбырашы әрі басшы, яғни «сегіз қырлы, бір сырлы азамат» Ә.Әділхан. «Жақсы жер — жан тынысы, жақсы өнер — жігіт ырысы» деген, Ә.Әділхан басқарып отырған ұжым үшін тынысы да, ырысы да — өнерлері.
Қай ел болмасын, өнерімен, мәдениетімен танылып, бағаланады. Ал сол елімізді танытуда аянбай еңбек етіп жүрген жандардың алдыңғы легінде мәдениет және өнер қызметкерлерінің тұрары сөзсіз.
«Жақсылық жасасаң да өзіңе, жамандық жасасаң да өзіңе» демекші, адамға жақсылық, қуаныш сыйлап жүрген мәдениет және өнер қызметкерлеріне, өзгеге сыйлаған қуаныштарының өздеріне, отбасыларына еселеніп қайтуын, адамзат баласына рухани байлық сыйлар еңбектерінің әрқашан еленуін, шаттыққа толы қуанышты күндерінің көп болуын тіледік.
Ләйлә ОҢАЛБАЕВА