Бірлігі бекем елдің еңсесі биік

 Біздің ең басты құндылығымыз – Тәуелсіздік. Ал 1 мамыр әр қазақстандық үшін Отанға деген сүйіспеншілік пен патриоттық сезімнің, азаматтық борыш пен жалпы ұлттық келісімнің мерекесі. Өйткені бұл мереке Отанымызда ұлтаралық келісім мен бейбітшілік, достық пен өзара түсіністікті сақтау және нығайтуға деген ұмтылысы мен тілегін білдірді.

Біздің ауданымызда бұл күні «Бірлігі бекем елдің еңсесі биік» атты мәдени іс-шара жоғары деңгейде аталып өтті. Мерекеге сай безендірілген орталық алаңға аудан тұрғындары түгел жиналып, салтанатты жиын ашық деп жарияланды.

Шараны аудандық Мәдениет үйінің әншілері Сәуле Қожаханова мен Мәулеш Әбжапаров:

Күтетұғын асыға әр күнін біз,

Арналатын ең тәтті ән-жырымыз.

Мерекелі, мерейлі айдың басы

Құтты болсын 1-мамырымыз,-деген өлең жолдарымен ашты.

Алғашқы сөз кезегін аудан әкімі Бағдат Байшалұлы Алиев алды.

-Құрметті Күреңбел өңірінің тұрғындары! Құрметті қонақтар! Қашаннан да бауырмал қазақ халқы соның ішінде біздің ауданымыздың халқы да әр кезендерде елімізден пана іздеп келген жандардың бәрін бауырына басып, төрінен орын беріп, бір үзім нанын бөліп жеді. Сол себепті де, бүгін де қаймағы бұзылмаған, өзара татулығы жарасқан еліміз көпұлтты мемлекет болып отыр. Ауданымызда барлық ұлттар татулық пен келісімде өмір сүруде. Баршамыз алаңсыз өмір сүріп, білім алып, еңбек етудеміз, табыстарға қол жеткізудеміз.

1995 жылдың наурызында дүниежүзіне үлгі болып отырған, ұлтаралық татулық пен тұрақтылықтың феномені – Қазақстан халықтары Ассамблеясы құрылды. Бұл ешбір елде болмаған саяси маңызы зор құрылым. Қоғамдық келісім мен саяси тұрақтылық – біздің ең маңызды байлығымыз. Ал бұл жетістікті бағалау, оны сақтау жолында аянбай еңбек ету — бәріміздің борышымыз. Баршаңызды 1 мамыр — Қазақстан халқының бірлігі мерекесімен шын жүректен құттықтаймын. Әр отбасына береке – бірлік тілеймін. Еліміз аман, жұртымыз тыныш болсын! Еліміз өркен жайып, мемлекетіміз молшылыққа кенелсін.

Бұдан соң сөз кезегін алған Д.Қонаев атындағы орта мектебі ағылшын тілінің мұғалімі Степанова Екатерина Юрьевна алып, жер жаннаты Жетісудың кіндігі саналатын киелі мекен Күреңбелде көптеген ұлт өкілдері мекендеп, тату- тәтті өмір сүріп жатқанын, Елбасымыз Нұрсұлтан Әбішұлы Назарбаевтың сарабдал саясатының арқасында елдің тыныштығы сақталып, ұйыған айрандай өмір сүріп отырғанын тілге тек етіп, осындай ауызбірлігі мен татулығы, достығы мен ынтымағы жарасқан елде өмір сүргеніне қуанатынын айтып, жиналғандарды мерекемен құттықтап, ізгі тілегін білдірді. Ұлтаралық ынтымақтастықтың жарқын келбетін сипаттап жүрген ауданымыздағы ұлттық мәдени орталықтары мүшелері осы жиналған жұртшылыққа Алтынемел ауылдық округінің шешен ұлт өкілдерінің, Қоғалы ауылдық округінің украин ұлт өкілдерінің өнерін көрсетіп, жиналғандарды тәнті етсе, «Ақтиін» балабақшасының ұжымы «Ұйғыр биін», «Ай-сана» балабақша ұжымы «Орыс биін» «Балдырған» балабақша ұжымы «Өзбек биін» нақышына келтіре орындады.

Сахнаға ұлттық киімдермен шыққан түрлі ұлт өкілдері бір шаңырақтың астында тату-тәтті өмір сүріп жатқандықтарын паш етті.

Д.Қонаев атындағы, Сарыөзек, №49 және Күреңбел қазақ орта мектептерінің оқушылары көрсеткен флешмоб көпшілік көңілінен шықты.

Жиналғандар алаң ортасына тігілген шатырлардан түрлі ұлт өкілдерінің ұлттық тағамдарынан дәм татысты. Шара соңы Ә.Сарыбаев атындағы Мәдениет үйі қызметкерлері дайындаған концерттік бағдарламасына ұласты.

Мереке ауданымыздағы түрлі ұлт өкілдерінің татулығының куәсі іспетті болды. Осының аясында мемлекеттік тілдің қолдану аясы кеңейіп, басқа да ұлттардың салт-дәстүрін құрмет тұту, сыйлауға қатысты игілікті істер жалғасын табары сөзсіз. Өйткені бұл — бір күндік мереке үшін емес, ғұмырлық татулығымыз бен бейбіт өміріміз үшін жасалған оңды істердің бірі.

Дина АМАНҚЫЗЫ