Апат құрбандарын еске алды

Чернобыль апаты  бүкіл адамзат қасіретіне айналғаны рас. Одан бері табаны күректтей 32 жыл өтседде,  әлі ұмытылған жоқ. Өткенге шегініс жасасақ Чернобыль атом электр станциясындағы 1986 жыл 26 сәуірдегі апатты жоюға 600 мыңға жуық адам атсалысқан. Оның ішінде химиялық полк құрамында 32 мың қазақстандық болған еді. Бұл оқиғадан біздің кербұлақтық жерлестеріміз де шет қалмады. 1986 жылы Украинада атом электр станциясында орын алған жағдайдан сол кезеңде жасы 25 пен 30-дың арасындағы, әскер қатарында борышын өтеген 34 күреңбелдіктің 11-і көз жұмды.

Биыл Чернобыль апатына 32 жыл толып отыр. Осы орайда ауданымыздағы Чернобыль ардагерлеріне арналған саябақта митинг болып өтті.

Митингке аудан әкімі Бағдат Байшалұлы Алиев, аудан әкімінің орынбасары Болысбай Тоғысбайұлы Момбаев, Сарыөзек гарнизонының бастығының орынбасары  Бақытжан Киргизалиев, «Чернобыль апатының ардагерлері мен мүгедектері» қоғамдық бірлестігінің төрағасы ауданымыздың «Құрметті азаматы»  Жұмәділ Рахимов, Чернобыль апатына қатысқан Іле аудандық Чернобыль апаты ардагерлер үйінің төрағасы Нұрғайып Мұхитдинов және мекеме басшылары мен қызметкерлері қатысты.

Аудан әкімі бастаған митингке қатысушылар Чернобыль ардагерлеріне арналған ескерткішке гүл шоқтарын қойып, алғашқы сөз кезегін аудан әкімі Бағдат Алиев алды.

-Құрметті жерлестер! Бүгін баршамыз Чернобыль атом стансиясындағы төртінші реактордың жарылысында қаза болған жерлестерімізді еске алуға жиналдық. Біз аудандағы Чернобыль апатына қатысқан ардагерлерімізге арнап 2016 жылы облыс көлемінде жоқ ескерткіш тұрғыздық. Екі адамға жаңадан салынған тұрғын үйдің кілтін тапсырдық. Жұмәділ Рахимовқа бәріңіздің  атыңыздан адами алғысымды айтамын. Ардагерлерге ескерткіш орнату, саябақты көгалдандыру барысында азаматтық танытып, үлкен үлесін қосқаны үшін ризамыз. Тілегім – еліміз тыныш жұртымыз аман болсын,-деп қайтыс болған азаматтарды еске алу үшін 1 минуттық үнсіздік жариялады.

Бұдан соң Сарыөзек әскери гарнизонының бастығы Мырзағали Дарбишев, Іле ауданының  азаматы, Чернобыль ардагері Нұрғайым Мұхитдинұлы, Кербұлақ аудандық Чернобыль ардагерлер кеңесінің төрағасы Жұмәділ Рахимовтар сөз алып, Чернобыль апаттарының салдарынан миллиондаған  адамның мұң шеккенін, апат салдарын жоюға қатысқандардың денсаулықтары ерекше  алаңдататынын тілге тиек етті. Әбдіқалов Ерлан Тоқтасынұлы:

Жапырақ ғұмыр…

Жаралы кеуде жан тылсым,

Жазайын бүгін

Чернобыль жайлы ел білсін

Тұншығып, У, мен

Тұнжырап жатты сары орман

Көрінбес жауды…

Жағадан алып, кім жыртсын

Жапырақ ғұмыр…

Жанарым сөнбе қазірше

Чернобыль, шерім…

Жүректің отын сөндірме,-деп, «Чернобыль жайллы ел білсін» атты арнауын оқыды.

Митинг соңы Сарыөзек әскери  гарнизонындағы Офицерлер үйінде жалғасты. Аудандық Мәдениет, Сарыөзек гарнизондық Офицерлер үйі әншілері мен бишілерінің күшімен дайындалған концерттік бағдарлама барлық жиналғандарға көтеріңкі күй сыйлады.

Дидар ДИХАНБАЕВ