ЖЫЛЫ ЖҮЗДЕСУ

Елбасымыз Нұрсұлтан Әбішұлы Назарбаев: «Кәсіподоқтар әрқашанда жалдамалы еңбекшілердің құқықтары мен мүдделерін қорғаудағы нақты институт болған және бола береді» деген еді. Кәсіподақ ұйымдары азаматтардың еңбек қатынастарында да, жұмыспен қамтылу барысында еңбек тәртібінің, еңбек құқығының бұзылмауын қадағалап, туындаған мәселелерді шешуде елеулі рөл атқарады.
Осы арайда жақында облыстық білім саласы қызметкерлері территориалдық комитетінің төрағасы Әбдіқадыров Садық Нұрсапаұлы ауданымызға атбасын тіреп, Д.Қонаев атындағы орта мектебінің ұстаздар қауымымен жүздесті.
Жүздесуге аудандық білім саласы қызметкерлері, кәсіподақ ұйымының төрағасы Дуанаев Жақан Ноғайбайұлы, аталмыш мектеп директоры Самылтыров Еркебұлан Амантайұлы, мектеп ұжымы мен аудандық БАҚ өкілдері қатысты.
Алғашқы сөз кезегін Садық Нұрсапаұлы алды.
— Құрметті ұстаздар! Ең алдымен осы қара шаңырақ саналатын үлгілі, тарихы терең білім шаңырағында сіздермен қауышқаныма қуаныштымын. Осы мектепте алғашқы еңбек жолымды пионервожатый боп бастап, мектеп директорлығына дейін көтеріліп, абыроймен қызмет атқарып, құрметті демалысқа шыққан Күләш Ілебайқызы Меренбаеваны еске алмай кетуге болмайды. Мектептің көп жылғы тарихы ол кісінің өмірімен тығыз байланысты. Ұстаздар қауымының құқығын, мүддесін қорғайтын кәсіподақ ұйымына жаңадан төраға боп тағайындалған Жақан Ноғайбайұлын қызметімен құттықтаймын.
Бәріңізге белгілі кәсіподақ ұйымының басты мақсаты – ғылым және білім қызметкерлерінің, осы саладан құрметті демалысқа шыққан зейнеткерлердің құқықтары мен мүдделерін қорғау. Атқарылып жатқан ауқымды істер кәсіподақ кеңес мүшелерінің еңбегінің арқасында екені сөзсіз. Республикалық федерацияда кәсіподақ саласына үлкен жаңалықтар енгізіліп отыр. 2014 жылы қабылданған кәсіподақ заңына биыл біраз өзгерістер енді. Елбасымыз биылғы Жолдауының кіріспе сөзін мұғалімдерден бастауы кездейсоқ емес. Өйткені, ұстаздар қауымына үлкен жауапкершілік жүктеліп отыр. Кәсіподақ Заңының өзгеруіне байланысты жұмысты жаңаша жандандыруымыз қажет. Кәсіподақ негізі – бастауыш кәсіподақ ұйымында. Сондықтан кәсіподақ өз қаулысын қабылдап, соған сәйкес бастауыш кәсіподақ ұйымдарында есеп беру – сайлау науқаны басталады» дей келе, жазда кәсіподақ жарнасынан демеушілік көрсетіп, 30 ардагер ұстаздың, 25 оқушының ЭКСПО-ға жіберілгені туралы тілге тиек етіп, тұрмысы төмен, көпбалалы ұстаздар отбасы балаларына жолдама беру туралы болашақта облыс орталығынан “Ұстаздар үйін» салу жөнінде Парламент депутаттарымен келіс сөз жүргізіліп жатқаны туралы баяндап, ұстаздар қауымын қуантты.
Аталмыш мектептің биология пәнінің мұғалімі Кәмшат Базарбаева мектепте 10 әдістемелік бірлестік жұмыс жасайтынын, білім реформасына көп өзгерістер енуіне байланысты атқарар жұмыстар көп екенін, осыған байланысты бірлестік жетекшілеріне төлемақы төленсе деген ұсынысын айтса, аталмыш мектептің ұстазы Айнабеков Марат Нұрмұханұлы Садық Нұрсапаұлына ұстаздармен жүздесу өткізіп, маңызды мағлұматтар мен кеңестер бергені үшін алғыс айтса, Жақан Ноғайбайұлының жаңа қызметіне табыс тілеп, болашақта көп жыл еңбек еткен ұстаздар марапаттарға ұсынылса деген тілегін жеткізді. Бастауыш әскери дайындық пәнінің мұғалімі Руслан Нұрбеков жылы жүздесу үшін ризашылығын жеткізді. Садық Нұрсапаұлы өз кезегінде айтылған ұсыныстардың ешқайсысы жауапсыз қалмайтынын айтты.
Сөз тізгінін алған аудандық білім қызметкерлері кәсіподақ ұйымының төрағасы Жақан Ноғайбайұлы өзіне артылған сенімді ақтайтынын, білім саласы қызметкерлерімен қоян-қолтық араласып, жұмыс жасауға дайын екенін, көтеріліп отырған мәселелерді бірлесіп орындау қажеттігін және ұстаздар мәртебесін көтеру үшін атсалысатынын айта келіп, Садық Нұрсапаұлына алғысын жеткізіп, жаңа бастамаларға сәттілік тіледі.
Кездесуде Д.Қонаев атындағы орта мектебінің директоры Самылтыров Еркебұлан Амантайұлы қорытындылап, Садық Нұрсапаұлына барлық ұстаздар атынан алғысын білдіріп, жаңадан тағайындалған Дуанаев Жақан Ноғайбайұлының қызметіне табыс тіледі.
Елбасымыз жыл сайынғы халыққа Жолдауында еңбек қатынастарын жан-жақты дамыту туралы айта келіп, бұл мәселелерде Қазақстандағы Кәсіподақтар федерациясының алдына нақты міндеттер жүктеген болатын. Нұрсұлтан Әбішұлы кәсіподақтардың рөлін заң жүзінде күшейту қажеттігі жөнінде тың жобалар мен ұсыныстар енгізген болатын. Осыған байланысты кәсіподақ жұмысының жауапкершілігі де артпақ. Ендеше біз ауданымыздағы білім қызметкерлерінің мүддесін қорғап, мәртебесін арттыратын кәсіподақ ұйымының төрағасы Жақан Ноғайбайұлының еңбегіне жеміс тіледік.
Дина АМАНҚЫЗЫ.