Өнерім — өмірім байқауы өтті

Егемендігімізді алып, Тәуелсіздігіміздің таңы атқан кезде, Елбасымыз Нұрсұлтан Әбішұлының сарабдал саясатының арқасында жаңа мемлекетте жаңа Астана дүниеге келген болатын.
Еуразияның жүрегінде орналасқан Астана қаласының жаңа тарихы – бұл тәуелсіздік тарихы боп саналады. Бұл күнде көркіне көз тоймайтын әсем астанамыз ата-бабаларымыз ғасырлар бойы аңсаған азаттық пен қайта түлеудің символы іспетті.
Биыл Астанаға – 20 жыл толды.
Осы орайда жақында Әбікен Сарыбаев атындағы Мәдениет үйінің ұйымдастыруымен аталмыш мерекеге арналып, «Өнерім – өмірім» атты вокалды – хореографиялық байқау болып өтті. Туған жерге, елге деген патриоттық сезімді қалыптастыру, еліміздің жүрегі – Астана қаласының мәртебесін арттыру, халық шығармашылығының деңгейін көтеру мақсатында өткен бұл байқауға ауданымыздың 15 ауылдық округінен 15 жастан – 25 жасқа дейінгі үміткерлер қатысып, бақ сынасты.
«Ән номинациясы» бойынша қоғалылық Мөлдір Қожабекова, қаспандық Тұнық Әділхан, қарашоқылық Жанат Ақтілек, шанханайлық Мәрлен Нұрахмет, жайнақтық Рамазан Айдана, талдыбұлақтық Инна Лысоченка, басшилік Әйгерім Алсейітова, сарыөзектік Динара Жұманова, алтынемелдік Зәкір Әсем, қоянкөздік Алмат Мусиралиновтар қазақтың халық әнін Қазақстан композиторларының және алыс-жақын шетел композиторларының шығармаларын орындады. Ал «Би номинациясы» бойынша сайысқа түскен Басши ауылының «Еркеназ», Жайнақ ауылынан «Томирис», гарнизондық Офицерлер үйінің «Данс Стар», Шұбар ауылынан қыздар би тобы, шанханай ауылының «Айару», сарыөзектік «Әдемі – ай», Талдыбұлақ ауылының «Аруназ», Алтынемел ауылынан «Айару» би топтары қатысып, байқаудың талабы бойынша ұлттық билер мен қазіргі хореографиялық үлгідегі немесе қазіргі заман билерін (модерн, хип-хоп) орындады. Үміткерлердің өнерін әділқазылар алқасының төрағасы, әнші-термеші, «Қазақстан Республикасының Мәдениет саласының үздігі», аудандық мәдениет және тілдерді дамыту бөлімінің басшысы Әділжан Әділхан, аудандық Мәдениет үйінің директоры, «Қазақстан Республикасының Мәдениет саласының үздігі» Өтегенова Гүлмира Аханқызы, әнші, сазгер, Кербұлақ ауданының Құрметті азаматы Жексенбаев Жанғазы Жұманұлы, аудандық «Кербұлақ жұлдызы» газетінің тілшісі, Қазақстан Республикасы журналистер одағының мүшесі Дүйсенбаева Дина Аманқызы бағалады.
Әділқазылар алқасының шешімімен ән номинациясы бойынша Бас жүлдені қарашоқылық Жанат Ақтілек қанжығасына байласа, қаспандық Тұнық Әділхан жүлдені I орынды, қоғалылық Мөлдір Қожабекова II орынды иеленсе, шанханайлық Мәрлен Нұрахмет пен талдыбұлақтық Лысоченка Инна III орынды өзара бөлісті.
Ал би номинациясы бойынша Бас жүлдені талассыз гарнизондық Офицерлер үйінің «Данс Стар» би тобы, Алтынемел ауылының «Айару» би тобы жүлделі I, Басши ауылының «Еркеназ» би тобы II, ал, ІІІ орынды №49 орта мектебінің «Эверест» би тобы иеленсе, Сарыөзек ауылының «Әдемі-ай» би тобы Ынталандыру сыйлығын місе тұтты.
Байқауды аудандық мәдениет және тілдерді дамыту бөлімінің басшысы Әділжан Әділхан қорытындылап, жүлдегерлерді дипломмен және бағалы сыйлықтармен марапаттады.