«Мәңгілік ел» ұландары

Жуырда Күреңбел қазақ орта
мектебінде Елбасымыз Нұрсұлтан
Әбішұлы Назарбаевтың “Болашаққа
бағдар: Рухани жаңғыру” мақаласының
1 жылдығына орай, «Жас Ұлан»
және «Жас Қыран» балалар ұйымы
қатарына қабылдау және мектептің
кадет сыныптарының «Біз — Мәңгілік
ел ұландарымыз!» атты салтанатты
жиыны болып өтті. Салтанатты жиынға
ауданымыздың әкімі Б.Алиев, аудандық
ардагерлер ұйымының төрағасы
Т.Сарыбаев, 29108 әскери бөлімінің
тәрбие жөніндегі орынбасарының міндетін атқарушы
Д.Жаныспеков, ауған соғысының ардагерлері, мектеп
директорлары, ата-аналар, БАҚ өкілдері қатысты.
Көпшілікке үлгі боларлық мерекелік іс-шара мектеп
оқушыларының «Шашу» биімен ашылды. Фанфар ойналып,
жүргізушілер:
-Ризамын деп осындай жастық шаққа,
Не жетер «Біз — Мәңгілік ел Ұландарымыз!» деген лайық
атқа.
Келеміз өрлеп егеменді ел төріне ,
Ашылып алдымыздан алтын қақпа, — деп — «Біз — Мәңгілік
ел Ұландарымыз!» атты патриоттық іс шараға арналған
салтанатты жиынға келіп отырған қонақтармен таныстырды.
Енді бір мезетте Қазақстан Республикасының Туы енгізіліп,
жиналған үлкен-кіші орнынан тұрып, еліміздің рәміздеріне
деген құрметін көрсетті. «Жас Ұлан» және «Жас қыран»
балалар ұйымының қатарына және “Кадет” сыныптарының
ант қабылдау рәсіміне арналған салтанатты жиын ашық деп
жарияланып, Қазақстан Республикасының Гимнін оқушылар
мен жиынға қатысушылар бірлесе шырқады.
“Жас ұлан” ұйымының президенті А.Тойғұлова
«Жасұлан», “Жас қыран” ұйымына «Қабылданушылар
түзел, тік тұр!» деп бұйырып, Күреңбел қазақ орта
мектебінің директоры К.Қыстаубаеваға Күреңбел қазақ орта
мектебінің республикалық бірыңғай «Жасұлан» және «Жас
қыран» балалар ұйымының қатарына қабылдауға дайын
екендіктері туралы баяндады. Бүгінгі жиынның ең жауапты
сәті республикалық бірыңғай «Жасұлан» және “Жас қыран”
балалар ұйымының қатарына қабылданушы оқушыларға
беріліп, олар кезекпен өз аты-жөндерін айтып:
-Мен, «Жас Ұлан» балалар ұйымының қатарына кіре
отырып: Өз Отаным — Қазақстан Республикасының патриоты
болуға; Мемлекеттік рәміздерді құрметтеуге, дәріптеуге;
туған елім, жерім, Отанымды мақтаныш етуге; ата-анамды
қадірлеуге; үлкенге құрмет, кішіге ізет көрсетуге; білімге
табандылықпен ұмтылуға; салауатты өмір салтын ұстануға;
табиғатты аялауға; «Жас Ұлан» Ережесін бұлжытпай
сақтауға және оны өз достарымнан талап етуге ант етемін.
Біздің жерлестеріміздің даңқты ерлігі өнегесі негізінде ерлікке
үйренуге және Отанға шексіз қызмет етуге салтанатты
түрде «АНТ ЕТЕМІН, АНТ ЕТЕМІН, АНТ ЕТЕМІН» деп ант
қабылдады.
Іс-шараға қатысушы қонақтар, ұстаздар, «Жас Ұлан»
және «Жас қыран» ұйымына қабылданушы оқушыларға
туымыз түстес көгілдір галстук және төсбелгілерін тағып,
оларға өздерінің жылы лебіздерін, тілектерін білдірісіп жатты.
Республикалық бірыңғай «Жасұлан» және «Жас қыран»
балалар ұйымының қатарына қабылданған оқушылар «Жас
ұландар» әнін бірлесе айтып, мектеп оқушылары Ұлжан
Әділхан мен Айдана Тойғұлова ант қабылдаушылардың
құрметіне «Батырлар ұраны» әнін әуелете шырқады.
Алғашқы әскери дайындық пәнінің мұғалімі Б.Сартаев
мектеп директоры К.Қыстаубаеваға рапорт бергеннен кейін,
кадет сыныптарының ант қабылдау рәсіміне кезек берілді.
Аудан әкімі Б.Алиев құттықтау сөз сөйлеп:
-Құрметті ата-аналар, қымбатты жас жеткіншек!
«Тәрбиенің басы-тал бесік» деген атам қазақтың кәделі
сөзі бар. «Тайдан -тұлпар, балапаннан-сұңқар, баладан-
азамат, ер өседі» деген. Міне, біздің сол ерлеріміз,
болашағымыз өздеріңізсіздер. Бүгін біздер сіздердің әр
іс-әрекеттеріңізден, қимыл-қозғалыстарыңыздан әдемі
үлгіні,тәрбиені көріп отырмыз. Сіздердің бойларыңыздан
Отанға, елге деген сүйіспеншілік сезімді айқын көріп, қуанып
отырмыз. Болашақ сіздердің қолдарыңызда. Алдағы уақытта
Сіздер алған үлгі-өнегені, тәрбиені өзгелер алатындай
жұмыстар жасап, жалғастыруымыз керек. Күреңбелдің туын
көтеретін сіздерсіздер. Сіздер болашақта Отанымыздың
абыройлы азаматтары болады деген сенімдемін! Аттаған
қадамдарыңыз қарышты болып, аталарыңыздың намысын
қорғайтын жүректі, намысты болыңыздар! — деген ақ жарма тілегін білдірді.
Келесі кезекте сөз алған мектеп директоры К.Қыстаубаева
«Мектеп – кеме, білім – теңіз» демекші, әрбір жас ұрпақ
мектепте білім негізін қалап, болашақ өмір жолына жолдама
алады. Мектеп баланы жан-жақты дамытады, оның рухани-
адамгершілік негізін қалайды.Біздің мектепте ата-аналар
комитетінің қолдауымен 3 кадет сыныптары жұмыс жасап
келеді. Онда 57 оқушы — кадеттер, оның ішінде 26 қыз бала,
31 ұл бала бар. Болашақта тәртіп сақшыларының қатарын
толтыратын балалар тәлім алуда» деп, мектебіндегі әр
оқушының өзіндік орны бар тұлға екенін айта отырып,
оқушыларына табыстар тіледі.
29108 әскери бөлімнің тәрбие жөніндегі орынбасарының
міндетін атқарушы Д.Жанысбеков алғашқы әскери дайындық
пәнінің мұғалімі Бейісбай Сартаевқа әскери патриоттық
тәрбиеге қосқан үлесі үшін «Қазақстан Қарулы күштеріне 25
жыл» медалін табыс етті.
Енді бір сәтте іс-шараға жиналған көпшілік кадет
сыныптарының шеруін тамашалады. Көрер көзге қуаныш
сыйлаған кадет сыныптары кәнігі бір әскери адамдардай
түп-түзу болып сап түзеп, пән мұғалімінің бұйрығын
бұлжытпай орындап, адымдап басып барады. Кадет
сыныптары оқушыларының жинақы киімдеріне, көз ілеспес
қимылдарына, жүріс-тұрыстарына сүйсінген жиынға жиналған
көпшілік қуаныштарын жасыра алмай: «Еліміздің болашағы,
ертеңіміз — осы балаларымыз ғой» десіп жатты.
Л.ЕСКЕНДІРҚЫЗЫ.