Кітап — рухани құндылықтың қайнар көзі

Елбасымыз Н.Ә.Назарбаевтың «Болашаққа бағдар: рухани жаңғыру» мақаласы аясында, аудан әкімінің аудандық кітапханасы бүгінгі таңдағы жаңа ақпарат дәуірінде оқырмандарға жаңаша қызмет көрсетуде. Кітап-адамзат баласының жан әлемінің мөлдір бастауы екеніне ешбір дау жоқ. Дамыған осы заманда, электронды ақпарат құралдары, ақпараттың басқа да көздері қаншама көбейгенімен, оны кітаппен ешқашан ауыстыруға болмайды. Кітапты қолмен ұстап, көзбен көріп, оқығанға не жетсін? Кітап оқиғасының қызығына еніп, қызыға оқудың өзі — бір ләззат емес пе?
Елбасымыз Н.Ә.Назарбаев «Адам баласының бүкіл ғұмырындағы ең сенімді және ең сабырлы серігі — кітап» деген ұлағатты сөзін басшылыққа ала отырып, оқырмандарға жаңа бағытта қызмет көрсету — міндетіміз. Қазіргі таңда, оқырмандардың қолына түсе бермейтін, тұрғындардың жеке кітапханаларында сақталып, оқырманына жол таба алмай жатқан қаншама кітап бар? Сол кітаптарды өз оқырмандарына қауыштырудың бірден-бір жолы «Буккроссинг», қазақшаға аударғанда — «кітап сыйлау», «кітаптың айналыста жүруі», «кітап алмасу», деген мағынаны білдіретін «акция». Бұл акцияны алғаш рет ойлап тапқан ғалым — Рон Хорнбекер. Кітаптың өз оқырманын табуына ықпал ететін бұл қозғалыс Америкада 2001 жылы басталған еді. Ал, біздің Қазақстанда «Буккроссинг» акциясы 2005 жылы қолға алынса, бүгінгі күні біздің аудандық кітапханада өзінің жалғасын табуда. Оқырмандардың өз еріктерімен кітапханаға әкеліп тапсырған әдебиеттерінен «Буккроссинг» ұйымдастырылды. Абай Құнанбаевтың, Мұқтар Әуезовтің, Мұқағали Мақатаевтың, Мағжан Жұмабаевтың Жүсіпбек Аймауытовтың, тағы басқа да көптеген ақын-жазушылардың кітаптары насихатталды.
Іс-шараны кітапханашы Солтанқұлова Гүлмира мен Жүнісова Мақпал жүргізді. Шараға аудан әкімінің орынбасары Болысбай Тоғысбайұлы, мәдениет және тілдерді дамыту бөлімінің басшысы Әділжан Әділханұлы және оқырмандар қатысты.
Болысбай Тоғысбайұлы өз сөзінде: «Құрметті бүгінгі акцияға қатысушы кітапсүйер қауым, уақыт талабынан қалмай, сапалы қызмет көрсетудің жаңа жүйесі — «буккроссинг». Шара кітап пен оқырман арасын жақындатып, кітапханадан табыла бермейтін жеке даналарға қол жеткізудің бірден-бір жолы. Кітап — ғылым мен білімнің, ізгілік пен парасаттың дәнін себетін мол қазына. Қасиетті қазынамыздан оқырмандар, тың ойлар мен өз жан дүниесін байытып, қатпары терең білім нәрімен сусындасын, іздегендеріне ізгілікпен қол жеткізсін демекпін. Осы акцияға қатысушы қауымға, кітапхана қызметкерлеріне, еліміздің саясатын, алға қойған мақсаттарын, оқырмандарға насихаттауда салмақты үлес қоса берулеріне сенімімді білдіремін» деді.
Акцияға қатысуға зейнеткер кітапханашы Бекбергенова Сақыпжамал өзінің шағын кітапханасынан: Мұқағали Мақатаевтың «Поэзия, сен менімен егіз бе едің?» және Жетісу өлкесінің ақындарының «Тіл туралы толғау» атты кітаптарын оқырмандарға таныстыра отырып тапсырды.
Акцияға қатысушы Кербұлақ ауданы ішкі саясат бөлімінің бас маманы Зере Сайлау, ағылшын тілінде жазылған, өзі жоғары оқу орнында оқып жүргенде тіл мүшәйрасынан жүлделі орынға ие болғанда, сыйлыққа алған ағылшын тілін тереңдетіп оқуға жол ашатын бірден-бір құрал екендігін түсіндіріп, ағылшын тілі білімін жетілдірушілерге қажетті кітап екенін айтып, табыс етті. Сонымен қатар, акцияға қатысушы, Сарыөзек ауылдық округінің жастар ісі жөніндегі нұсқаушысы Омарова Әсемгүл өзінің жеке кітапханасында сақталған, жас талапкер ақындардың, дарын иелерінің шығармалары жинақталған «Жетісу жауқазындары» атты кітабын тарту етті.
Мәдениет және тілдерді дамыту бөлімінің басшысы Әділжан Әділханұлы: «Бұл шара келешекте ары қарай жалғасын табады деген сенімдемін. Акцияға тек кітапхана қызметкерлері ғана емес, барша қауым атсалысуы керек, сонда ғана нәтижесін береді. Кітапхана қызметкерлері, сүйсінер істеріңіз жалғасын тауып, қоғам дамуынан қалыспай ілесіп, оқырмандарға жаңаша қызмет көрсетіп, еңбектеріңіз жана берсін дегім келеді» деді.
Аталмыш «Акция» кітапханада жыл бойына жалғасын таба береді. Құрметті оқырман қауым, белесене атсалысуларыңызды сұраймыз.
Сақыпжамал БЕКБЕРГЕНОВА,
зейнеткер кітапханашы.