Жүзден жүйрік, мыңнан тұлпар

Қаспан ауылында Елбасының «Болашаққа бағдар: Рухани жаңғыру» мақаласы аясында, Астананың 20 жылдығы қарсаңында, ауыл округінің әкімдігі және ауыл азаматтарының ұйымдастыруымен ұлттық ат спорты ойындары өтті. Ұлттық спорттың мақсаты – ауыл жастарын салауатты өмір салтын ұстануға, ұлттық дәстүрді дәріптеуге, насихаттауға, жаңғыртуға баулу.
Жиын басында ақсақалдар алқасының төрағасы Қожаберген Әбдіқадыров, ауыл округі әкімінің міндетін атқарушы Жанар Умарова, аудандық ұлттық ат спорты федерациясының мүшесі Әбдірахман Күлгінбаев Рухани жаңғыру аясында және Астананың 20 жылдығына орай ұйымдастырылып отырған шараға қатысушыларға сәттілік тілеп, үлкендер жағы бата берді.
Тай бәйгеден қаспандық Еркін Бейбітовтың «Алауы» І орынды, сарыбастаулық Мұрат Бәзілбаевтың «Еркесі» ІІ орынды және Айдос Танабековтың «Желқанаты» ІІІ орынды иеленсе, Құнан бәйгеден қарашоқылық Мәлік Манбаевтың «Үміті» І орынды, қаспандық Бақкелді Қасымжанның «Айқасқасы» ІІ орынды, сарыбастаулық Айдос Танабековтың «Тасқыны» ІІІ орынды қанжығалады. Ал, Аламан бәйгеде малайсарылық Әбдірахман Күлгінбаевтың «Ақтанауы» І орынды, басшилік Талғат Асқарбековтың «Сұлтаны» ІІ орынды және Мұхтар Керімқұлдың «Шаңтимесі» ІІІ орынды, сондай-ақ, тоқ бәйгеден желдіқаралық Нұржан Ысқақовтың «Байторысы» І орынды, басшилік Махмуд ауғанның «Маралқасқасы» ІІ орынды, сарыбастаулық Ақжол Ібіннің «Желқанаты» ІІІ орынды иеленіп, жеңімпаздар ақшалай, заттай сыйлықтармен марапатталды. Соңынан жігіттер көкпар тартып, бір серпіліп қалды.
Ұйымдастырушылар – Еркін Бейбітов, Айдын Рамазан, Мақсат Мұхаммед, Нұрлан Қыдырбай, демеушілер — Өсербай Қарақойшынов, Хамит Молдабеков, Марлан Жаркинов, Нариман Қарақойшынов, Мұхит Асылхановтарға қатысушылар ризашылықтарын білдірді.
Нұрлан ҚЫДЫРБАЙ,
спорт нұсқаушысы.