Көктемгі егіс жұмысы

Көктем шуағы еніп, жер сызы кетісімен, дала төсінде көктемгі егіс жұмыстарына дайындық басталып та кетті. Бұл —
күзде орғанын кәдеге жаратқан егіншілердің тағы да қарбаласқа түсетін, қайнаған қызу еңбектің қызатын шағы. Егістік жерді
тазалау, жер жырту, тұқым себу, суару жұмыстары рет-ретімен жасалып, мол өнім алуға бағыт ұсталады.
Аудан аумағында ағымдағы жалпы өңделетін егістік жер көлемі – 132 931 гектар болса, оның 107 931 гектары
игеріледі деп күтілуде. Қазіргі күнде көктемгі жер жырту бойынша 3500 га жыртылған, жаздық дәнді және майлы дақылдар
3700 га себілді.
Көктемгі дала жұмыстарына қолда бар және қажетті жанар-жағар май көлемі, сонымен қатар, ауыл шаруашылығы
тауарын өндірушілерді операторлармен қамтамасыз ету мақсатында наурыз, сәуір, маусым айларына 3528 тонна
шамасында жанар-жағар май бөлініп, «Қарамай ПРОДАКТС» жауапкершілігі шектеулі серіктестігі бекітілді.
Зауытпен жасалған келісім-шарт негізінде бүгінде 1000 тонна дизель отыны жеткізілген. Литрі 146 теңгеге бағаланған
дизель отынының қазіргі күні 200 тоннасы таратылды.
Қазіргі кезде ауыл шаруашылығы техникаларынан 35 дана трактор, 20 дана соқа, 30 дана дән сепкіш, 30 дана тырма,
5 дана тегістеуіш, 5 дана қопсытқыш, 8 дана сыдырғыш көктемгі дала жұмыстарына тартылды.
Осылайша, күн санап, дала төсі қызу еңбектің дүбіріне толып, қат-қабат келген қалың жұмыстың сахнасына айналуда.
Ж.ҚАТЖАНОВ,
аудандық ауыл шаруашылығы бөлімінің бастығы