Ұлт бірлігі — ұлттық спортта

Елбасымыз Н.Ә.Назарбаевтың «Болашаққа бағдар: рухани жаңғыру» мақаласы аясында ауданымызда көптеген іс-шаралар өтуде. Сонымен қатар, Елбасының «Саламатты өмір салты» бағдарламасына да баса назар аударылып отыр.
Осы орайда, жақында Қызылмектеп ауылында көкпар ұйымдастырылды.
«Ел ішінде жігіт көп, азаматы бір бөлек, жылқы ішінде тұлпар көп, қазанаты бір бөлек» демекші, қазақ халқы ежелден-ақ жылқының тектілігін сезіп, жанына серік еткен. Осынау ұланғайыр жерімізді де жылқының үстінде жүріп қорғап қалған болатын. Сол жаугершілік заманда жігітті шымырлыққа, ептілікке баулитын ұлттық ойынымыз көкпар болған.
Осы білекті де, жүректі жігіттердің ойыны көкпар бүгінде елімізде қарқынды дамып келеді. Ауыл азаматтарының қолдауымен, демеушілігімен өткен ойынға Кербұлақ ауданынан, Алматы қаласынан, Жаркент қаласынан және Текеліден келген палуандар тігілген жүлделерді өзара бөлісті. Келген атбегілер мен палуандар ең алдымен мерекелік дастарханнан, арнайы дайындалған наурыз көжеден дәм татты. Одан кейін қаз-қатар тізілген сәйгүліктердің шеруі өтті, жалау көтеріп шеруді Шоқандық ұлттық спорттың жанашыры, белгілі палуан Закиров Ғалымжан бастап жүргізді. Одан кейін сапқа тұрып, Қазақстан Республикасының гимні орындалды.
«Жаңбырменен жер, батаменен ел көгереді» деп, ауылымыздың ақсақалы Сатыбалды ата келген көпшілікке ақ батасын берді. Төрт сағатқа созылған додада шын мықтылар анықталды. Ең бірінші беташар салымды Шоқан ауылынан келген, 80 кг салмақта аударыспақтан ауданымыздың чемпионы атанған Рахмажиев Олжас салды. Одан кейін Шоқандық Мұрат палуан салымды болды. Осы додада Жайнақ ауылының палуандарының мерейі үстем болды. Көкпардан Алматы облысының чемпионы — Абдрахманов Талғат 9 салым салса, Жайнақтық Фархат 3 салым салды, Бақытжан палуан 1 салым салды. Сөйтіп салымды болған палуандарға ақшалай сыйлықтар табыс етілді. Көкпарды жүргізген белгілі атбегі, ұлттық спорттың жанашыры Қаспан ауылының тұрғыны — Нұрлан ағамыз болатын. Көкпар соңында жиналған көпшілікке, ауыл тұрғындарына өз атынан алғысын айтып, көкпардың жоғары деңгейде өткенін тілге тиек етіп, ақ батасын берді. Келген көпшілік салымды болған палуандарды құттықтап, арқа-жарқа болып тарқасты.
С.НҰРҚАСЫМОВ,
Майтөбе орта мектебінің қазақ тілі мен әдебиеті пәнінің мұғалімі