Рухани жаңғыру кілті — ұстаз қолында

Қаспан орта мектебінде Елбасымыздың «Болашаққа бағдар: Рухани жаңғыру» жолдауын алғы сөз етіп, «Рухани жаңғыру кілті-ұстаз қолында» тақырыбы аясында сынып жетекшілер онкүндігі болып өтті. Мақсаты-қазіргі қоғамдағы тәрбиенің рөлін арттыру, тәрбие үрдісін жетілдіру, тәрбие субъектілерінің құзырлылығын дамыту. Алғашқы күні «Рухани жаңғыру кілті-ұстаз қолында» тақырыбы барысында онкүндіктің ашылуы болып өтті. Ашылуы барысында оқушылар өлең шумақтарын жырға қосып, өз өнерлерін ортаға салды. «Сынып жетекші және Біз» тақырыбында сурет көрмесі ұйымдастырылды. Сынып жетекшілер оқушылармен тәрбиелік тақырыптарда ашық тәрбие сағаттарын өткізді. Оқушылардың бос уақытын тиімді ұйымдастыру мақсатында мектеп әкімшілігінің және сынып жетекшілердің басшылығымен «Қыс қызығы» атты шаңғы, шана ойындары өткізілді.
Сынып жетекшілер онкүндігі «Ұстазға тағзым!» атты кешпен аяқталды. Кеште оқушылар — ән айтып, би-билеп, мағыналы әзілдер қойып, образдық поэмалар оқып өтті. Кеш соңында мектеп директоры Ешкенов Дастан Есіркесінұлы сынып жетекшілер онкүндігін қорытындылап, тәрбиелік мәні мен тағлымы мол тәрбие сағаттарын ұйымдастырған ұстаздарымызды марапаттап, сурет көрмесінің жеңімпаздарын атап өтті.