Қоғамдық қабылдау

Жақында «Нұр Отан» партиясы Кербұлақ аудандық филиалы ғимаратында халық қалаулысы, Кербұлақ сайлау округінің Алматы облыстық мәслихатының депутаты Мұқанов Серік Мейірханұлы Қоғамдық қабылдау өткізді.
Қабылдауға аудандық мәслихаттың хатшысы Бөкен Қабиұлы Рысбеков қатысып отырды.
Серік Мейірханұлының халықтың көкейінде жүрген сұрақтарымен, түйіні шешілмей жүрген мәселелерімен бөлісу мақсатында өткізген бұл қабылдауына ауданымыздың тұрғындары келіп, көкейтесті мәселелерімен бөлісті.
Алғашқы сұрақпен келген ауданымыздың өнер саласына үлкен үлес қосып жүрген, Кербұлақ ауданының Құрметті азаматы Жексенбаев Жанғазы Жұманұлы аудан орталығынан болашақта өнер мектебін ашу туралы ойымен бөлісіп, көпшіліктің көңілінде жүрген мақсаттың жүзеге асырылуына көмек сұрады. Бұл мәселеге халық қалаулысы әзірге күрделі және ағымды жөндеудің кезегінде тұрған білім ошақтарының кіретінін, болашақта жаңа шағын аудандардың аймағынан жер телімін алып, өнер мектебін салуды жоспарға кіргізуді ойластыру керектігін айтса, Сарыбұлақ ауылы тұрғындарының атынан келген Сарыбаев Қадір Әбілғазыұлы күз, көктем кезінде ауыл тұрғындарына қиындық туғызып отырған жол мәселесін қозғады. Осы мәселеге жауапты адамдардың біріне хабарласқан Серік Мейірханұлы Сарыбұлақ ауылының 8 шақырымы жасалып басталғанын, қалған 4 шақырымы көпір біткен соң жасалатынын, бұл үшін жобаны қайта жасау қажеттігін түсіндірді.
Бұдан соң Сарыөзек ауылының тұрғыны болған, ІІ топтағы мүгедек, бүгінгі күні Талдықорған қаласында тұратын Жолдыбаева Дана Серғазықызының өтініші бойынша мәселе көтерілді. Дана Серғазықызының халық қалаулысына жазған өтініш хатында 2007 жылы Сарыөзек ауылы, Мақатаев көшесінен Талдықорған қаласына көшкенін, бірақ белгісіз себеппен Сарыөзектік тіркеуден шығарылмағанын, ал мүмкіндігі шектеулі адам ретінде үй кезегіне арада 5 жыл толмай тұру мүмкін еместігін, 2012 жылы БТИ шығарылғанымен, дерекқорда әлі есепте тұрғанын, қаладағы пәтердің жоғарғы қабатына шығып-түсу қиындық тудыратынын айтып көмек сұрағаны ешкімді де бей-жай қалдырмады.
Хат бойынша Қоғамдық қабылдауға арнайы қатысқан «Азаматтарға арналған үкімет мемлекеттік корпорациясы» коммерциялық емес акционерлік қоғамының Алматы облысы бойынша жер кадастры және жылжымайтын мүлікті техникалық тексеру департаментінің Кербұлақ аудандық бөлімшесінің басшысы Сәкимбеков Ержан Абдыбакиұлына Серік Мейірханұлы хаттың көшірмесін алып, мәселенің егжей-тегжейін тексеріп, жазбаша түрде хабар беруді тапсырды. Ал Шанханай ауыл округінің тұрғыны Қожаберген Толыбаев Шоқан ауылындағы жекешелендіру кезінде алған 100 орындық бала-бақшаны қайтарымсыз өткізіп беру туралы өтінішін айтты.
Халық қалаулысына өтінішпен, түйткіл мәселелермен келген тұрғындардың бәрі де қанағаттанарлық жауап алды.
Сонымен қатар, Серік Мейірханұлы Парламенттің қос палатасының бірлескен отырысында Мемлекет басшысы Нұрсұлтан Әбішұлы Назарбаевтың қазақстандықтардың әлеуметтік мәселелерін шешудің бес басым бағыттарын ұсынып, оны жүзеге асыру мақсатында мемлекет органдарына нақты тапсырмалар бергенін, кез келген адам үшін баспана ең басты мәселе болып табылатынын, Елбасының елді қуантқан бұл бастамасы жастарға деген шексіз қамқорлық екенін баса айтып, жоғары білім алудың қолжетімділігі мен сапасын арттырып, студент жастардың жатақханадағы жағдайын жақсарту мәселесі де Елбасының назарынан тыс қалмай, жоғары білім саласына қосымша 20 мың грант бөлу көзделіп отырғанын тілге тиек етіп, Елбасы Нұрсұлтан Әбішұлының бес бастамасын орындауға құлшына кірісуге шақырып, алдағы уақытта осы бес әлеуметтік бастама бойынша Кербұлақ ауданы тұрғындарымен кездесу өткізетінін айтты.
Қоғамдық қабылдауды аудандық мәслихаттың хатшысы Бөкен Қабиұлы қорытындылап, халық қалаулысы Серік Мейірханұлы Мұқановқа жиналғандар атынан алғыс білдірді.
Дина АМАНҚЫЗЫ