Көрісу күні атап өтілді

Таяуда Елбасының «Болашаққа бағдар: рухани жаңғыру» мақаласы аясында аудандық Ә.Сарыбаев атындағы Мәдениет үйінде, аудандық Мәдениет үйінің ұйымдастыруымен «Ұлттық салт-дәстүріміздің бүгінгі қоғамдағы орны» атты мәдени іс- шара өтті. Қазақтың ұмыт болып бара жатқан салт-дәстүрі, бүгінде еліміздің батыс өңірінде сақталып қалған «Көрісу» дәстүрі Алматы облысында бастау алып, біздің ауданымызда да жалғасын табуда. Көрісу дәстүрінің негізгі мақсаты ғасырдан-ғасырға, ұрпақтан-ұрпаққа мирас болып келе жатқан салт-дәстүрлерімізді ұмытпай қайта жаңғырту. Іс-шараға Шанханай, Қарашоқы, Талдыбұлақ, Басши ауыл округтерінің көркемөнерпаздары қатысты.
Шанханай ауылдық окуругі қазақтың «Тұсаукесер» дәстүрін көрсетіп, көптің көңілінен шықты. Алдымен өзара төс қағыстырып, амандасып, хал-жағдай сұрасып, ақ дастархан басына отырып, жеті нанға құран оқып, салт бойынша үш түрлі әдіспен баланың тұсауын кесті.
Бірінші «ешкімнің ала жібін аттамасын» деген ырыммен баланың тұсауын ауыл ақсақалы ала жіппен кесті. Екінші тоқ ішекпен кессе, үшінші жуырда ғана Дубайдан Бас жүлдемен оралған ауданымыздың әнші қызы Қожақанова Сәуле Қасымбекқызына ырымдап, күміскөмей әнші болсын деп шөппен тұсауын кестірді. Бұдан әрі Қарашоқы ауыл округі жалғастырып, баланы бесікке салу рәсімін көрсетті. «Тұлпардай жүйрік болсын» деп бесікке жүген ілсе, «ақсақалдың жасын берсін» деп шапан жапты және «батыр болсын, ержүрек болсын» деген мақсатпен көрпесінің астына бәкі салды. Басши ауылының тұрғындары «Сүндетке отырғызу», «ашамайға мінгізу» дәстүрін ұсынды. Бұл қойылымда баланы сүндетке отырғызып, балаға туыстары ат мінгізіп, шашу шашты. Талдыбұлақ ауылы салттарымыздың бірі — «Қыздың қалауы» жайлы көрініс қойды. Бұл қойылымда қыз жолдасымен, баласымен нағашы жұртына келіп, қалаған нәрсесін сұрап, ұлы қырық серкешін алып, нағашы атасының ақ батасын алып қайтты.
Ауданымыздың, Алматы облысының Құрметті азаматы, аудандық ақсақалдар кеңесінің төрағасы Сарыбаев Төленді Оспанбайұлы салт-дәстүр жайлы көрсетілген көріністерге бағасын берді. Барлық қатысушылар аудандық Мәдениет үйінің Алғыс хаттарымен марапатталды. Іс-шара әжелер ансамблі мен Мәдениет үйінің әншілерінің ән шашуына ұласты.
Дидар АСҚАРҰЛЫ