Рухани жаңғыру Қарттарын құрметтеген ел ардақты

Рухани жаңғыру

Қарттарын құрметтеген ел ардақты

Таяуда аудандық кітапханада «Алматы облысының мемлекеттік архиві» КММ Кербұлақ филиалы қызметкерлерінің ұйымдастыруымен «Қарттарын құрметтеген ел ардақты» атты дөңгелек үстел өтті. Аталмыш жиынға ауданымыздың ардақты қариялары  —  Ғалым Тұрғанбайұлы мен Өкен Әбілмәжінұлы, аудандық мәдениет және тілдерді дамыту бөлімінің басшысы Әділжан Әділханұлы, аудандық кітапхананың ұжымы және Д.Қонаев атындағы орта мектептің жоғары сынып оқушылары қатысты.

«Алматы облысының мемлекеттік архиві» КММ Кербұлақ филиалының директоры Гүлбану Мамиева төрдегі қонақтармен таныстырып, оның ішінде Алматы облысының және Ақсу, Панфилов, Кербұлақ аудандарының Құрметті азаматы Ғалым Тұрғанбайұлын мерейлі сексен жасымен құттықтап, қадірлі қариямен дөңгелек үстелде емен-жарқын әңгімелесудің сәті түскенін айтты. Архивист Ақжамал Тұяқбаева қазыналы қариялар жөнінде баяндама жасады. Алғашқы сөз кезектерін алған ауданымыздың ардақты азаматы Өкен Әбілмәжінұлы және аудандық мәдениет және тілдерді дамыту бөлімінің басшысы Әділжан Әділхан дария кеуде, тау мүсін қарияларымыздың бірі – Ғалым Тұрғанбайұлының өнегелі істері мен адами қасиеттерін әңгімелеп берді.

Кезек Ғалым Тұрғанбайұлына берілгенде, балалық шағына, әділдік үшін күреспен өткен өміріне көз жүгіртті. Оқушылар тарапынан түскен: «Адам бойындағы қандай қасиеттерді бағалайсыз?», «Өміріңіздегі қызықты оқиғаларды айтып берсеңіз?», «Бүгінгі жастардың тәрбиесіне көңіліңіз тола ма?», «Алтынемел» мемлекеттік ұлттық табиғат паркін құруда алдыңызға қойған мақсатыңыз?», «Елбасымыз Нұрсұлтан Әбішұлының ұлттық паркке келген кездерінен естелік айтыңызшы?», «1996 жылы Елбасымыздың қолынан американдық «Винчестер» мылтығын сыйға алғаныңыз жайында айтып беріңізші?», «Үш ауданды басқардыңыз, басшы қандай болуы керек?» деген сынды сұрақтарға тұщымды жауап беріп, қызықты оқиғаларымен бөлісті.

Гүлбану Мамиева отырысты қорытындылап, Ғалым Тұрғанбайұлына «Алматы облысының мемлекеттік архиві» КММ бас директоры Г.И.Кулмуханбетованың Алғыс хаты мен Алматы облысының құрылғанына 80 жыл толуына орай шыққан «Жетісу асулары» атты кітабын тапсырды. Тәрбиелік маңызы бар отырыстан өрелері биіктеген оқушылар осындай кездесулердің алдағы уақытта да жиі болып тұруын тілге тиек етіп, Ғалымдай аталарының батасын алып, көңілді тарасты.

А.ҚАСЕНОВА.