Жолдаудағы жаңа даму үрдістері туралы

«Нұр Отан» партиясы Кербұлақ аудандық филиалы төрағасының бірінші орынбасары Ж.Бозымбеков жұмыс сапарымен Шанханай ауылдық округінің Қоянкөз және Қызылжар ауылдық округінің Шилісу, Басши ауылдық округінің Нұрым, Ақтөбе ауылының тұрғындарымен жиналыс өткізді. Аудан орталығынан шалғайда орналасқан ауыл тұрғындарына Елбасы Н.Назарбаевтың биылғы халыққа жолдаған Жолдауының негізгі мақсатымен, оларды жүзеге асырудағы партияның атқаратын шаралары туралы жан-жақты түсіндірді.

Жолдаудың басты бағыты – әлеуметтік дамудың барлық салаларына енетін экономиканың жалпы цифрландырылуы. Әлемнің дамыған елдерінде үрдіс алған цифрлық технологиялардың, оның ішінде на-на технологияның, 3D принтердің экономиканың барлық саласындағы (аэрокосмос, медицина, өнеркәсіп, құрылыс жарнама, киноиндустрия т.б) қолдану тәсілдерін нақты мысалдармен түсіндірді. Осы жаңа келе жатқан инновациялық технологияларды игеру үшін жаңа веб-программист, веб-дизайнер, интернет-коуч, копирайтер, маркетолог тағы да көптеген мамандықтар дамып келе жатқанын айта келіп, әлемді шарпыған осындай жаңа үрдістерден шет қалмас үшін  өскелең жастарды аталған мамандықтар бойынша білім алуға бағыт беру қажеттігін айтты.

Цифрлық теxнологиялар биліктің ашықтығын, яғни қабылданып жатқан шешімдердің ашықтығын қамтамасыз етеді. Халық пікір-таласқа қатысып, өз ұсыныстарын жасай алады. Мемлекеттік шешімдер қабылданғанда xалықтың пікірі ескеріледі. Қазіргі кезде біз анықтаманың бәрін электронды жүйе арқылы аламыз. Ал «ашық диалог» арқылы министрлерге сұрақ қойып, сан алуан мәселелерді талқылай аламыз. Міне, цифрлық экономиканың халыққа тиімділігі, — деп сөзін тұжырымдады лектор.

Ж.Бозымбеков тұрғындардың сұрақтарына жауап берді. Жиналыс пен кездесуге келген ауыл тұрғындары көкейкесті сұрақтарына жауап алғандарына ризашылықтарын айтып, тарасты.