Аудан әкімінің қорытынды есебі

Жуырда аудандық Ә.Сарыбаев атындағы Мәдениет үйінде аудан әкімі Бағдат Байшалұлы Алиевтің өткен жылғы ауданның әлеуметтік экономикалық дамуындағы жұмыстардың нәтижесі және 2018 жылға алға қойылған міндеттер туралы есеп берудің қорытынды жиналысы өтті. Алматы облысы мәслихатының хатшысы Сұлтан Мырзабекұлы және аудандық мәслихат хатшысы Бөкен Рысбеков  қатысты.

Сөз тізгінін аудан әкімі Бағдат Байшалұлы алып:

-Қымбатты ауылдастар және жерлестер, Елбасының Жарлығына сәйкес барлық елді мекендерде ауыл округтері әкімдерінің есеп беруі өтті. Енді   есеп беру мәселесіне келсек, жоспар бойынша айтылған уәденің барлығы орындалды. Ең бірінші өнеркәсіп саласы артығымен бір жарым есеге орындалды, бірақ өндірілген өндіріс көлемінің индекс көрсеткіші 61 пайыз болып қалды. Себебі, автожолдың біздің аумақтан өтуіне байланысты индекс көлемі аз болды. Екінші ауылшаруашылық саласы өткен жылы 102 пайызға  орындалса, биыл 104 пайыз артығымен  орындап отырмыз. Мал шаруашылығындағы Шадиевтің мал бордақылау комплексінде былтыр 10 мың бас мал бордақыланса, биыл 6 мың бас бордақылануда. Өсімдік шаруашылығындағы табыстарымыз жақсы, 136 мың гектар  жердің 132 мың гектар жері игерілді. Жалпы айтқанда, ине шаншыр жер қалмады. Олай дейтінім, 84 мыңның үстіндегі дәнді дақылдар, облыс көлеміндегі масақты дәнді дақылдардың 30 пайызын біздің аудан ұстап отыр. Майлы дақылдарды егу 10 гектардың үстіне шықты. Биылғы біздің жақсы жаңалықтарымыздың бірі — азаматымыз Марат Чуженовтың арқасында осы кісімен ақылдасып, биылғы Елбасының тапсырмасы бойынша облыс әкімі Амандық Ғаббасұлының тапсырмасымен Көктал өзенінің бойынан 100 гектар жерге қылша ектік. Бұл ауыл шаруашылығымыздағы үлкен жаңалығымыз болып отыр. Алдағы уақытта 300 гектарға жеткізу жоспарда бар.

Желтоқсан айының соңында «РизаМай» зауыты іске қосылды. Бұл жерде жоғарғы сапада шыны ыдыста құйылған, сыртында  «Кербұлақ ауданы Сарыөзек ауылы» деген жазумен шетелге экспортқа май шығып жатыр. 20-25 тонна май шығады. 35 адам еңбек етуде. Биыл алға қойған міндеттерге келсек, ауданымызға күн батареяларын орналастырып, наурыз айында жұмысын бастасақ, «АлаЦем» зауытын толықтай іске қосу  міндеті тұр. Сондай-ақ, биылғы жылы тұрмыстық қалдықтарды өңдеу зауытының құрылысы  басталды. Қоғалы, Жоламан ауылдарының жолдарын жасауға тиісті ақша бөлініп, күрделі жөндеуден өткелі тұр. Ең басты сала — білім саласын 78 пайызға орындадық. Былтырғы жылы жоспардың барлығы орындалды, алдағы жоспар аманшылық болса, ауызбіршілікте болып, талмай еңбек етсек, толықтай орындалады деген сеніммен айта алам деп,-сөзін аяқтады.

«Күреңбел» қазақ орта мектебінің ағылшын тілі пәнінің мұғалімі  Олеся Сергеевна сөз тізгінін алып, үш тілде еркін сөйлей алатынын жеткізіп, еліміздің өркендеуіне тілектестігін білдірсе, Ғалым Тұрғамбайұлы және ауданның бірқатар азаматтары аудан әкімінің атқарған ісіне қанағаттанарлық деген баға берді. Алматы облысы мәслихатының хатшысы  Сұлтан Мырзабекұлы межелеген жоспардың орындалғанын тілге тиек етіп, алдағы тұрған міндеттердің  орындалуы тиіс екенін жеткізді.

Аудан әкімі Бағдат Байшалұлы қорытынды есепке тұспа-тұс келген Алматы облысының және Панфилов, Ақсу, Кербұлақ аудандарының Құрметті азаматы Ғалым Тұрғамбайұлын мерейлі 80 жасымен құттықтап: «Қарты бар үйдің қазынасы, ырысы бар» дегендей, еліне елеулі, халқына қалаулы болған Еңбек ардагерлерін ардақтау – парызымыз» деп, біздің  ауданға еңбегі сіңгені үшін алғыс айтып, деніне саулық, отбасына амандық тілеп, шапан жауып, ат мінгізді.

Іс-шара соңы  аудандық Ә.Сарыбаев атындағы Мәдениет үйі өнерпаздарының шағын концертіне ұласты. «Береке» дәмханасында мерейтой иесінің құрметіне дастархан жайылып, Ғалым Тұрғамбайұлының замандастары мен бірге еңбек еткен әріптестері ыстық ықыластарын білдірді.

Дидар ДИХАНБАЕВ.