Бір ауылдан қос хабар

Қатымхана ел игілігіне ұсынылды

Нұрсұлтан Назарбаев, Қазақстан Республикасының Президентiнің «Болашаққа бағдар: рухани жаңғыру» бағдарламасы аясында Қаспан ауылдық округінің орталығында қатымхана салынып, ел игілігіне ұсынылды.

Алла деген сөз жеңіл,

Аллаға ауыз қол емес.

Ынталы жүрек, шын көңіл,

Өзгесі хаққа жол емес,- дегендей, ауылдың байырғы тұрғыны, ауылдың ардақты ақсақалы, «Мерей» шаруа қожалығының төрағасы Хамит Молдабеков жүз жиырма орындық қатымхананы өз қаржысына тұрғызып берді. Осы орайда, қатымхананың алдына жиылған ауыл тұрғындарымен әңгімелескен едік.

Қаспан ауылдық округі имамының міндетін орындаушы  Баймұхамет Уәйітхан: «Қаспан ауылында, ораза айының қарсаңында, мешіттің жанынан қатымхана ашылды. Ол барлық қажетті құрал-жабдықтармен жабдықталып, халықтың игілігіне берілді. Мәуліт айындағы шаралар осы қатымханада өтуде. Ауыл тұрғындары ас, құдайы тамақ, ауыз аштыру сынды дастархан нәзірін осы жерде беріп, риза болуда. Ауыл тұрғындарының мешітке келіп, мінәжат етуі жақсы. Жат ағым деген мүлдем аталмайды. Бәрі «Дінім – Ислам, кітабым – Құран» деген ұстаныммен келеді. Жұма намазда көптеп жиылады. Пітір, садақа беріп, бір Аллаға сыйынып, ел-жұртымыздың амандығын тілеп жатады. Ауыл тұрғындарының ауызбірлігі мығым. «Мерей» шаруа қожалығының төрағасы Хамит Молдабеков деген осы ауылдың тұрғыны «Алла жолында садақа» деп осы қатымхананы тұрғызып беріп, елдің алғысын арқалауда» десе, ауыл тұрғыны Сламбай Тоқабаев: «Тәуелсіздігіміздің көк туы желбірегелі бері әр ауыл, қалаларда Алланың үйі – мешіт тұрғызылып, есігін айқара ашқан болса, енді оның жанынан қатымхана салынып, ел игілігін көруде. «Келіннің аяғынан, қойшының таяғынан» демекші, ауылдық округтің әкімі Алмас Тоқтарбайұлы келгелі ауылда бірталай өзгерістер болып жатыр. Солардың бірі осы –қатымхананың салынуы. Жамағаттан жиылған зекет бар, садақа бар, содан түскен қаржыға қажетті ыдыс-аяқтар, дастархан, үстел, орындықтар алынды. Ауыл тұрғыны Тоқтар Оспанов деген азамат екі үлкен қазан сатып алып берді. Сұлтанғали Тогуреков деген азамат осы қатымханаға жауапты. Ас берілгенде ыдыс-аяқ жуатын, күріш басатын, ғимараттың тазалығына жауап беретін бес әйел бар. Бұларға ас, ауызашар, құдайы тамақ, нәзір өткізген адамдардың өздері еңбекақысын береді» дейді.

«Мерей» шаруа қожалығының төрағасы Хамит Молдабеков:

— Мен өзім осы Қаспан ауылында туып-өскенмін. Құдайға тәуба, жетпіс екіге келдім. Гүлсім, Қанат, Гүлмира, Қанағат атты ұл-қыздарымыз бар. Бәрі өсіп-өнген. Немерелеріміз бар. Алпыс жыл тау бөктеріндегі Шаған ауылында тұрдық. Кемпірім Базархан он екі-он үш жыл тракторшы болып еңбек етті. Мен әскерден келген соң трактордың оқуын оқып, трактор жүргіздім. Бригадир, шаруашылық меңгерушісі, омарташы да болдық. Осы Қаспанда онжылдықты тәмамдаған соң кәрі ата-анама қарап, қалаға оқуға бара алмадым. Әкемнің аты – Садуақас, анамның аты – Зағира. Мен отбасындағы жалғыз ұл едім. Мәрия атты әпкем бар еді. Қойбыш ауылына тұрмысқа шығып, сол жақта өмірден өтті. Сол кездерде совхоз атынан оқуға да жіберіп еді, бара алмадым. Ата-анамның батасын алып, Базарханға үйлендім. Ол кісілер жүз жасқа келіп, дүниеден өтті. Немере-шөбере сүйді.

Уақытпен санаспай еңбек еткенім үшін 1970 жылы КСРО Жоғары Кеңесі Президиумының Жарлығымен «За доблестную труд» медалімен, КСРО Жоғары Кеңесінің Президиумының 1972 жылдың 13 желтоқсанындағы  Жарлығымен «За трудовую доблесть» медалімен, 1976 жылы 24 желтоқсандағы КСРО Жоғары Кеңесінің Президиумы Жарлығымен  «Еңбек Даңқы» орденімен наградталдым. Таяуда Қаспан ауылдық округінің әкімі Алмас Мадығалиев Құрмет грамотасымен марапаттады. Бүгінгі таңда біздерді елеп-ескергеніне тәуба дейміз. Көп рахмет айтамын.

Шаруашылығымызда қырық шақты сиырымыз бар. Бордақылап, сатамыз. Сүтін сауып, өткіземіз. Техникадан екі трактор, ГАЗ-53 автокөлігіміз бар. Құдайға тәуба, біреуден ілгері, біреуден кейін өмір сүріп келеміз. Қартайған шағымызда артымыздан игілікті нәрсе қалдырайық деген оймен бала-шағамызбен ақылдаса келе, қатымхана салып бердік.  Тәуелсіз еліміз аман болсын. Елбасымыздың халыққа жолдаған Жолдауын қолдап отырамыз. Егемендігіміз баянды, тәуелсіздігіміз тұғырлы, еңбегіміз жемісті, денсаулығымыз зор болсын,-деп ақжарма тілегін айтты.

«Қайырымдылық – асыл қасиет» дегендей, өз басын ғана ойламай, өзгені де ойлаған қайырымды адамға Алла Тағала да ниетіне қарай, ырыздықты үйіп-төгетіні белгілі. Даналықтың алтын кілті – ақсақалды аталарымыз бен ақ жаулықты аналарымыз десек, ұрпағын жақсылыққа баулыған, ата жолын жалғап келе жатқан Хамит ата мен Базархан әжеге ауыл тұрғындарының айтар алғыстары зор.

Айнаш ҚАСЕНОВА.