Дәстүрлі ән – өнердің шыңы

Елбасымыз Нұрсұлтан Әбішұлы Назарбаевтың халқына арнаған Жолдауында әлеуметтік мәселелер қатарында мәдениет пен өнерді одан әрі қарыштата дамытып, пәрменді қолдау көрсету қажеттігін атап өткен болатын. Осы орайда біздің ауданымызда көптеген игі шаралар жүзеге асуда. Өнерпаздарымыз облыс, республикалық, халықаралық байқаулардан жүлдегер атанып, аудан намысын биік көтеруде.

Жақында Әбікен Сарыбаев атындағы Мәдениет үйінде Елбасымыздың «Болашаққа бағдар: Рухани жаңғыру» атты мақаласы аясында «Дәстүрлі ән – өнердің шыңы» атты дәстүрлі ән байқауы өтті.

Ұрпақтан – ұрпаққа жалғасып, қазақ халқының ән мұрасына айналған дәстүрлі ән өнерін дамыту, қасиетін жоғалтпай келешек ұрпаққа өнеге ретінде қалдыру, дарынды өнерпаздарға қолдау көрсету, дәстүрлі ән өнерін халық арасында кеңінен насихаттау мақсатында өткен бұл байқауға Талдыбұлақ, Қоғалы, Қарашоқы, Қоянкөз, Қарымсақ ауыл округтерінен  Санат Диханбаев,  Барабар Тұрсынғазы,   Фатима Кенжебекова, Дамира Тұрысбекова,  Молдағали Үмбеталинов  сынды өнерпаздар қатысып, бақ сынасты.

Үміткерлер бір дәстүрлі және халық композиторларының репертуарынан бір ән орындады. Қазақтың қара домбырасымен орындалған дәстүрлі әндер халқымыздың бүкіл болмысын, табиғи сұлулығын жеткізетіндей болды. Құрамында ауданымыздың мәдениетін асқақтатып жүрген аудандық мәдениет және тілдерді дамыту бөлімінің басшысы, әнші, термеші, ҚР «Мәдениет саласының үздігі» Әділжан Әділхан, әнші, сазгер Кербұлақ ауданының Құрметті азаматы Жексенбаев Жанғазы Жұманұлы, аудандық Мәдениет үйінің директоры, әнші ҚР «Мәдениет саласының үздігі» Өтегенова Гүлмира Аханқызы бар. Әділқазылар құрамы өнерпаздардың орындаушылық шеберлігіне, музыкалық өңдеу деңгейіне, сахна мәдениеті мен киім үлгісіне баға берді. Үміткерлер барларын аянып қалмады «Ән айтсаң да жаныңды жеп айтасың» дегендей, әр ауылдың намысын үкілеп алып келген өнерпаздар көпшіліктіңде, әділқазылардың да көңілінен шықты. Алайда байқаудың аты – байқау. Кейде бақ, кейде бап шабады. «Жүйріктен жүйрік озар жарысқанда» дегендей, топ ішінен оза шапқан Талдыбұлақ ауылының өнерпазы Санат Диханбаев болды. Ән бәйгесіне бабы келіп қосылған Санат Есенқұл Жақыпбековтің «Алдай-ау», Кеңес Дүйсекеевтің «Ойлан балам» әндерін орындап оқ бой озып Бас бәйгені талассыз қанжығасына байлады. Көп жылдар бойы құқық қорғау саласында қызмет атқарып, құрметті демалысқа шыққан өнерпаздардың өнері шынында да таңдай қақтырарлық болды. Жүлделі I орынды сыңғырлаған дауысы домбырамен үндескен, дәстүрлі әнді нақышына келтіріп орындаған Қарашоқы ауылының өнерпазы Дамира Тұрысбекова иеленді. Өнерден алшақ көп жылдар бойы «отбасы – ошақ қасының» қамын күйттеп жүрген Дамира да дауыс ерекшелігімен көрермендер көңілінен шықты. Үй шаруасындағы нәзік жандының домбыраны жанына  серік қылып жүргені көңілге қуаныш ұялатқаны жасырын емес. Майлықожаның термесімен «Көзіңнің мөлдірін-ай» әнін жүректен жеткізе орындады. Көптеген байқауларда бақ сынап жүлделі орындарды иеленіп жүрген Қоғалы ауылының өнерпазы Фатима Кенжебекова жүлделі II орынды көп жылдан бері ауыл, ауданның мәдениетіне өзіндік үлесін қосып жүрген қоянкөздік Молдағали Үмбеталинов «Дүрдараз», «Бекзатым-ай» әндерін орындап III орынды иеленді. Өмірінің өнермен байланысы жоқ, сахнаға қара домбырасымен енді-енді шығып жүрген Қарымсақ ауылының әуесқой әншісі Тұрсынғазы Барабар ынталандыру сыйлығына ие болды.

«Әнді сүйсең менше сүй» деп Абай атамыз айтқандай, талантарын тасада қалдырмай киелі сахнаға шығып, жиналғандарды рухани нәрмен сусындатқан өнерпаздарға көпшілік қошаметпен қол соқты.

Байқауды әділқазылар алқасының төрағасы, аудандық мәдениет және тілдерді дамыту бөлімінің басшысы Әділжан Әділхан қорытындылап жүлдегерлерді Дипломмен және бағалы сыйлықтармен марапатталды.

                                                                                                Дина АМАНҚЫЗЫ