Қарашоқыдағы күй кеші

     Таяуда Қарашоқы ауылының тумасы Айбек Әрімбек елден жойылып бара жатқан асыл қазынамыз күй өнерін келешек ұрпаққа қайта жаңғырту мақсатында Елбасымыз Нұрсұлтан Әбішұлы Назарбаевтың «Болашаққа бағдар: рухани жаңғыру» мақаласы аясында аудан әкімі Алиев Бағдат Байшалұлының қолдауымен  Қарашоқы орта мектебінің мәжіліс залында «Туған жерге тарту» атты шығармшылық кешін өткізді.

Айбек Әрімбек 1995 жылы маусым айында Кербұлақ ауданы, Қарашоқы ауылында өнерлі отбасында дүниеге келді. 2001 жылы мектеп табылдырығын аттады. Мектеп қабырғасында оқып жүргенде ең алғаш домбыраға, қызығушылық танытты. Бұл жерде музыка пәнінің мұғалімі Умарова Бағдат Қадырбекқызынан дәріс алды. Тоғызыншы сыныпты бітірген соң П.Чайковский атындағы Алматы саз колледжіне түсті. 2015 жылы колледжді ойдағыдай аяқтап, Астана қаласындағы Қазақ Ұлттық Өнер университетіне түсті. Білім алу жылдарында жеткен жетістіктері аз емес, айтар болсақ Армения мемлекетінде өткен Халықаралық байқауда I орынды иеленсе, Алматы және Атырау қаласында өткен Республикалық байқауда дипломмен марапатталды. Астанада өткен «Шабыт» фестивалінде II орын, «Қос ішек» байқауында II орын, Нұрғиса Тілендиев атындағы байқауда  диплом, Ақтөбеде өткен «Қазанғап» атындағы  байқауда арнайы жүлде, Қостанайда өткен Сағын Жалмышев атындағы байқауда дипломмен марапатталып, үздіктер қатарынан көрініп келеді. Тек еліміздің 14 облысында ғана емес  Ресей, Тайвань, Қытай, Иран, Анкара АҚШ-тың Нью-Йорк қаласына қазақтың күйін дәріптеп жүр. Әкесі Иматаев Кенжебай Әрімбекұлы мен анасы Иматаева Айгүл Рақышқызы Қаскелең мәдени ағарту училищесін бітірген. Қазіргі таңда әкесі жеке кәсіпкерлікпен айналысады. Ал анасы «Балбөбек» бөбекжай балабақшасында жас бүлдіршіндерді өнерге бейімдеп, би үйретуде.

Айбек Әрімбек өнер кешін қазақтың әйгілі композиторы  Нұрғиса Тілендиевтің «Әлқисса», «Аққу» күйлерімен бастады. «Күй атасы – Құрманғазы» деген атақпен халықтың есінде қалған Құрманғазының  «Балбырауын», «Адай», «Терісқақпай»  күйлерін орындаса,  ҚР Халық әртісі, композитор, «Парасат» орденінің иегері, қазіргі заман композиторлары ішінен ойып тұрып орын алатын күйші Қаршыға Ахмедьяровтың «Мұнайшы Ақжелең», Тәттімбеттің «Сарыжайлау», Төлеген Момбековтың «Салтанат», Әбдімомын Желдібаевтың  «Ерке сылқым» күйлерін  орындап, көрермендердің  қошеметіне бөленді. Сондай-ақ Айбектің әкесі Кенжебай Иматаев «Сары бидай» әнін орындап, «Наз» бишілер тобы «Қазақ биі» биін биледі. Кеш аяқталған соң Қарашоқы ауыл округінің әкімі Ақбасова Дина Жанасылқызы, мектеп директоры Букабаева Гүльшат Сейдоллақызы ақ тілегін білдіріп, сыйлық табыс етті.  Сол ауылдың қариялары жасы тоқсан жетіге келген Әбділда ата мен Несіпбала апа ақ батасын беріп қазақтың дәстүрі бойынша Айбектің иығына шапан жапты. Кербұлақ ауданының жастар ресурстық орталығының жетекшісі Мыңбаев Алмас Асқарұлы, Алматы облысының жастар саясаты мәселелері басқармасы мен Алматы облысының жастар ресурстық орталығы және Кербұлақ ауданының жастар ресурстық орталығының Алғыс хатымен марапаттады. Кеш соңында  жиналғандар естелікке суретке түсті.

                                                                                               Дидар ДИХАНБАЕВ