Кел, Жаңа жыл төріме!

Жаңа 2018 жылдың қарсаңында аудан орталығында Жастар алаңында Сарыөзек ауылының тұрғындары және қонақтары көптеп жиылды. Алаң мерекеге сай безендіріліп, ортада жаңажылдық шырша орын тепкен. Төрдегі сахна да әсем көмкеріліпті.

Сахнаға көтерілген қос жүргізуші: «Армысыздар, Жаңа жыл табалдырығын аттағалы тұрған Сарыөзек ауылының тұрғындары және қонақтар! Құрметті халайық! Жаңа Ит жылы құтты болсын!» деп, мерекелік шараны бастады.

Уа, халайық, құрметті,

Ит жылы да келіпті.

Жаңа жылды қарсы алып,

Өткізейік дүрмекті.

Уа, халайық, той бүгін,

Бақыт, шаттық мол бүгін,-деген жүргізушілер еліміздегі Тауық жылында жеткен жетістіктерді, атап айтар болсақ, Қазақстан Республикасы Рәміздерінің 25 жылдығының кең көлемде аталып өткенін, Астана қаласында «ЭКСПО-2017» Халықаралық мамандандырылған көрмесінің өз деңгейінде өткенін, Ішкі істер органының 100 жылдық мерейтойының аталып өткенін, сондай-ақ, ауданымыздағы толайым жаңалықтарды – «Туған жер» жобасы аясында «Майтөбе ет» комбинатының төрағасы Баясыл Ақбасовтың үш отбасын тұрғын үймен қамтамасыз еткені, аудан орталығында он бес тұрғын үйдің кілті тапсырылғаны, аудандық жұмыспен қамту және әлеуметтік бағдарламалар бөлімі ғимаратының күрделі жөндеуден өткені және тағы басқа да жаңалықтарды айтып өтті.

Бұдан соң мерекелік шараның сәні мен мәні болған Аяз ата мен Ақшақарды қамбасы астыққа толыққан, ел-жұрты ән мен күйге шалқыған киелі мекен — Күреңбелдің тұрғындары қошеметпен қарсы алды.

Сахнаға көтерілген аудан әкімі Бағдат Байшалұлы Алиев көпшілікті Жаңа Ит жылымен құттықтап, ит – жеті қазынаның бірі екенін, туар жылдың берекелі, қазыналы жыл болуын, бұл жылы да өткен жыл секілді жағымды жаңалықтардың көп болуын, деніміздің сау болуын, әр отбасында бақыт пен шаттықтың болуын, ел іргесінің бүтіндігін, ауызбірлік пен ынтымақтың салтанат құруын тілге тиек етіп, бар жақсылықты тіледі. Сондай-ақ, мекемелердің әсем безендірілуінің қорытындысы бойынша бірқатар мекеме басшыларын бағалы сыйлықтармен марапаттады. Атап айтар болсақ, Күреңбел қазақ орта мектебі Бас жүлдені, №49 орта мектебі мен аудандық жұмыспен қамту және әлеуметтік бағдарламалар бөлімі І орынды, аудандық орталық аурухана ІІ орынды, аудандық Ә.Сарыбаев атындағы Мәдениет үйі, Сарыөзек ауылдық округінің әкімдігі ІІІ орынды иеленсе, ынталандыру жүлдесін телеком, Қазпошта және «Жібек жолы» дүкені қанжығалады.

Жаңажылдық көріністерді дайындаған Күреңбел қазақ орта мектебі, Д.Қонаев атындағы орта мектебі, №49 және Сарыөзек орта мектептерінің ұжымы бар өнерін ортаға салды. Сонымен қатар, мерекелік костюмдер киген кейіпкерлер өз өнерлерін көрсетіп, сыйлықтарға ие болды.

«Ит жылы барлық шаңыраққа, елімізге бақ әкелсін, бақ-дәулет, қалықтаған ән әкелсін» деген жүргізушілер мерекелік концертке кезек берді. Онда Ә.Сарыбаев атындағы Мәдениет үйінің өнерпаздары — Әділжан Әділханұлы, Сәуле Қожақанова, Жанғазы Жексенбаев, Ләззат Құсайынова, Азамат Үмбетов, Мәулеш Әбжапаров, Оралбек Тұрысбеков, Құралай Ержігітова,  Айдана Мұсағұлова, Ақнұр Бекқасымова, Тілеужан Есерханұлы тамылжыта ән айтып, көптің көңілінен шықты.

Жиылған жұрт: «Жаңа Ит жылы берекелі де мерекелі болсын!» деп, бір-біріне тілек айтып, шат-шадыман көңіл-күймен тарасты.       

А.ҚАСЕНОВА.