Ауданымызда май шығаратын зауыт ашылды.

Жаңа Жыл қарсаңында Сарыөзек ауылында  «Риза-май зауыты» жауапкершілігі шектеулі серіктестігінің  ашылу салтанаты болып өтті.Жиын барысында  аудан әкімі Б.Алиев   құттықтау сөз сөйлеп өзінің игі тілегін білдірді.

-Қымбатты жерлестер! Ардақты ағайын!Қазақстан Республикасының Президенті Н.Назарбаев

«Қазақ «Туған жерге туыңды тік» деп бекер айтпаған.Патриотизм кіндік қаның тамған жеріңе, өскен ауылыңа, қалаң мен өңіріңе,яғни туған жеріңе деген сүйіспеншіліктен басталады.Сол себепті, мен «Туған жер» бағдарламасын қолға алуды ұсынамын. Оның ауқымы ізінше оп-оңай кеңейіп, «Туған елге» ұласады»,- деп атап көрсеткен болатын өзінің «Рухани жаңғыру: болашаққа бағдар» бағдарламалық мақаласында.«Елбасы біреу-халық оған тіреу» деген әдемі қағиданы ұстана отырып,Елбасымыздың сарабдал саясатын, бағдарламалық мақаласындағы  «Туған жер» бағдарламасын жүзеге асыру мақсатында ауылымыздың  азаматтары 350 млн.көлеміндегі жеке қаражатына  май шығару  цехын ашып отыр.Күніне 50 тонна май шығарылып отырса,ауданымыздың  экономикасына да елеулі    үлес  болар еді.Ел бар жерде, ерде, ел қамын ойлаған азаматтар да  шығады.Бүгінде 40 адамға жұмыс істеуге мүмкіндік тудырып отырған азаматымызға  үлкен алғыс айтқым келеді.Жаңа жұмыс орнының ашылуымен құттықтай отырып,«Риза-май зауытының» жұмысының жандана беруіне тілектестігімді білдіремін.Ел игілігін көрсін, алға қойған мақсаттарымыз орындала берсін.

-Құрметті қауым! Сарыөзек ауылына келгендегі басты мақсатымыз осы ауылдан  зауыт ашып,ел-жұртымызға кішкене болса да көмегіміз тисе деген ой болған.Осы ауылға келгелі аудан басшыларынан болсын, қарапайым жұрттан болсын бірде-бір рет «Жоқ» деген сөз естіп көрмеппіз.Барлығы бастаған ісімізге оң көзбен қарап, қолдау көрсетіп отырды.Сол үшінде баршаңызға үлкен алғысымды білдіргім келеді.Азамат болғаннан кейін,ел-жұртымызға көмегімізді тигізсек дейміз. Ауылшаруашылығының қиын сала екенін білесіздер.Бизнестің айналысуға болатын оңай түрлері де бар.Десекте,ауылдан шыққаннан кейін, иісі қазақ болғаннан кейін ауылға келіп  көмегімізді тигізсек деп ойладық Содан осындай зауыт ашсақ деп бел шештік.Қанша шаруа қожалықтары жыл сайын өздерінің өндірген  өнімдерін көршілес елдерге шикізат түрінде сатуда.Тым болмаса соларға  септігіміз тиіп, май күйінде жіберсек деген оймен  осы жұмысты бастап отырмыз.Сіздердің көмек, қолдауларыңызбен жұмысты жандандырамыз деп ойлаймын,-деген «Риза-май зауыты» жауапкершілігі шектеулі серіктестігінің  бас  директоры Бегімхан Ержан сөзін қорытындылай келе, жиналған жұртқа шынайы алғысын білдірді.

Аудан әкімі Б.Алиев пен «Риза-май зауыты» жауапкершілігі шектеулі серіктестігінің  бас  директоры Бегімхан Ержан лента қию рәсімін жасап,  ауылдың ақ самайлы әжелері  шашу шашып, аудандық Ә.Сарыбаев атындағы мәдениет үйінің әншілері мерекені әнмен көмкерді.Жиналған  жұрт зауыт ішін аралап көрді.

-Биылғы жылы 10 гектар смақсары ектік. Енді мына зауыт ашылғаннан кейін мақсары егуді көбейтуді ойластырып отырмыз. Зауыт шаруаларға  жанар-жағар маймен, тұқыммен көмектеседі, олармен  келісім- шартқа отырып, тікелей жұмыс жасайды. Бағасы әрине нарыққа байланысты болады,әйтсе де шараларымызға  бұл зауыттың тигізер пайдасы мол болады деп ойлаймын. Болашақта  зығыр,  мақсары майымен айналысатын үлкен   кооператив ашу ойымызда,- дейді аудан әкімінің  орынбасары С.Қожахметов.

Жаңа ашылған «Риза –май зауыты »ЖШС бүгінде 15 адам еңбек етуде.Болашақта жұмысшылар саны 40-қа жетпек.Зауытта мақсары тазаланып,сығылып, тағы бір рет тазаланып, үлкен температурада рафинациялау процесі жүргізіп,зығырды сұйық майға дейін жеткізіп, шыны ыдыстарға құяды.

Алматы облысының зығырмен,мақсарымен айналысатын барлық шаруашылықтарынан  өнімдерін қабылдауды жоспарлап отырған зауыт таза, экспортқа шығарылатын май дайындайды.Бүгінде  Қытай мемлекетімен  келісім шарт жасалыныпты.

Ләйлә Ескендірқызы