«Майтөбе» ет комбинатында

Таяуда «Нұр Отан» партиясы Кербұлақ аудандық филиалының ұйымдастыруымен Қазақстан Республикасы Тәуелсіздігінің 26 жылдығына орай «Ауылшаруашылық өнімдерін қайта өндеудің өзектілігі мен тиімділігі» тақырыбында «Майтөбе» ет комбинаты ұжымымен кездесу өтті. Аталмыш жиынға  аудандық мәслихат депутаты Еркебұлан Самылтыров, ауылшаруашылық бөлімнің басшысы Жалғас Қатжанов, аудандық партия сектор меңгерушісі Қарлығаш Менисова,  эксперті Айгүл Қуанышева, «Майтөбе» ет комбинатының төрағасы Баясыл Ақбасов және оның ұжымы қатысты.

«Майтөбе» ет комбинатының төрағасы Ақбасов Баясыл Ерасылұлы ұжымға қонақтарды таныстырып, Тәуелсіздік мерекесімен құттықтап, алтын уақыттарын бөліп келген қонақтарға ризашылығын білдірді. Жұмыс орнының күнделікті тыныс-тіршілігін айта келіп, дәмді шұжықтардың қалаларға тасымалданатынын, оның тапсырыс берушілердің көңілдерінен шығып отырғанын жеткізді. Сөз кезегін алған аудандық мәслихат депутаты  Еркебұлан Самылтыров: «Елбасының сарабдал саясатының арқасында еліміздің экономикасы күннен күнге өсіп-өркендеп келеді. Міне, ауылымызда ет комбинаты екі жылдан бері жұмыс істеп, жұмыссыздар санын қысқартуда. Бұл — еліміздің жағдайының жақсаруына көп үлес қосып келе жатқан бірден-бір мекеме» дей келе, Қазақстан Республикасы Тәуелсіздік мерекесімен құттықтап, «Нұр Отан» партиясы Кербұлақ аудандық филиалы төрағасының бірінші орынбасары Ж.Бозымбековтың Алғыс хатымен ет комбинатының еңбеккерлерін, атап айтсақ, Дүйсенбаева Гүлден Бейсенбайқызын, Закен Нұрсұлтан Әлібайұлын және Едегенова Данагүл Қасымханқызын марапаттады. «Нұр Отан» партиясының мүшесі  Баясыл Ерасылұлы да осы сәтті пайдаланып, өзінің ұжымындағы бірқатар азаматтарға ақшалай сыйлық тапсырып, аталмыш партияға мүше болу – игі іс екенін тілге тиек етті.

Ет комбинатының бухгалтері Оразхан Көпбаева жұмысшыларға барлық жағдайдың жасалғанын, жұмыс орнында үш уақыт ыстық тамақ берілетінін, таяуда үш азаматтың тұрғын үймен қамтамасыз етілгенін, осындай келелі істердің орын алуы – Елбасының сара саясатының арқасы екенін, сондай-ақ, «Жақсы басшы – жарты байлығың» демекші, іскер басшы Баясыл Ерасылұлының еңселі еңбегінің және ұтымды ұйымдастырушылығының арқасында екенін тілге тиек етіп, еліміздің тәуелсіздік мерекесімен құттықтап, марапатталған еңбеккерлерге жемісті еңбек, отбасыларына бақыт пен шаттық тіледі.

«Жақсының жақсылығын айт, нұры тасысын» демей ме, Сарыөзек ауылының жаңа құрылыс аумағында, «Болашаққа бағдар: рухани жаңғыру» мақаласындағы келелі істерді жүзеге асыру мақсатында «Туған жер» жобасы аясында «Майтөбе» ет комбинатының төрағасы Баясыл Ерасылұлы үш отбасын тұрғын үймен қамтамасыз еткені аудан, тіпті, облыс тұрғындарына аян. «Аз қайырымдылық жасаудан ұялма, өйткені, құралақан қайтару — одан да аз» деген екен. Жүрегі жомарт жан ауданымызда көмекке зәру жандарға қолынан келген көмегін аямай, қайырымдылық жасап, қамқорлық танытып жүргенін біреу білсе, біреулер біле бермейді. «Жамандар жақсымын деп айқайлайды, жақсылар жақсымын деп айта алмайды» дегендей, қайырымдылықты барша жұртқа жария етпей, ақ көңіл, адал ниетпен ұсынғанның өзі жүрекке жылу сыйлайды емес пе? Осындай бақытты сезінген Атымтай жомарт жан Тәуелсіздік мерекесі қарсаңында Астанаға барып, Елбасының Алғыс хатымен марапатталып, мерейі үстемеленіп қайтты.

Аудандық «Кербұлақ жұлдызы» газетіне де көңіл бөліп отыратын ет комбинатының басшысы Баясыл Ерасылұлы 2018 жылға газетке жазылу науқанынан тыс қалмай, жылдағы дәстүр бойынша он шақты газетке жазылып, бізді де қуантты.

Айнаш МӘМІЛЕНҚЫЗЫ.