БАЛАЛАР ШАТТЫҚҚА КЕНЕЛГЕН КҮН

Балаларымыздың ерекше қуанып тойлайтын мерекелерінің бірі — Жаңа жыл мерекесіне де аз ғана уақыт қалды. Әйтсе де, болашағымыз — балаларымызды қуанту мақсатымен ұйымдастырылып өткізілетін Жаңажылдық шырша мерекесі ауданымызда басталып та кетті.

Жуырда аудандық білім бөлімінің ұйымдастыруымен Сарыөзек орта мектебінде қатарынан оза шапқан озат және өнерлі оқушылардың, көпбалалы, әлеуметтік жағынан аз қамтылған отбасылардың балаларына арналған аудан әкімінің жаңажылдық шыршасы болып өтті.

Жаңажылдық мерекенің ерекшелігі де безендірілген жап-жасыл шыршасы мен Аяз Ата, Ақшақарында болса керек. Мектеп ішіне кіргеннен-ақ, жаңажылдық мерекелік көңіл-күйді сезінгендейсің. Ертегі кейіпкерлері, Ақшақар, балапан, мысық, түлкі, панда, мұрындары қып-қызыл аққала да, тіптен сыпыртқысын оңды-солды сілтейтін Мыстан кемпір де осы жерде жүр.

— Егеменді еліміздің иесі, осы жердің иесі, ол — сіздерсіздер. Сіздер аман болыңыздар. Сабақтарыңызды жақсы оқып, ата-аналарыңыздың сенімін ақтар ұл-қыз болып өсіңіздер. Оқуда озат болып, ойлы да өнерлі болыңыздар айналайындар,- деген аудан әкімі Б.Алиев балаларды Жаңа жыл мерекесімен құттықтады.

Аудан әкімі жағып берген жаңажылдық шыршаның шамы жан-жағын нұрға бөлеп, шыршаны айнала жүріп, ән салған балаларымыз балапандарын ертіп шыққан тауық жылын қарсы алды. Ортаға шыққан тауық бір жылда атқарылған шаруалардың көп болғандығын айтса, анасынан балапандары да қалыспай, еліміздің әлемдік аренада айрықша табыстарға қол жеткізгендігін, Алматы қаласында өткен қысқы универсиадада 25 мемлекеттің ішінен Қазақстанның екінші орын алғандығын айтса, екінші балапан Евроодақ мемлекеттерінің және Орта Азия мемлекеттерінің алдында тағы бір сатыға көтерілуге мүмкіндік тудырған «Болашақ энергиясы» тақырыбында өткен халықаралық мамандандырылған «ЭКСПО-2017» көрмесі, биылғы жылы Қазақстан Республикасы Рәміздеріне, Қазақстан Республикасының Қарулы Күштеріне 25 жыл толғандығы туралы әңгімеледі. Өтіп бара жатқан жылдың есебін берген Тауық жылы балалармен қоштасып жатты. Ескі жылмен қимай қоштасқан балалар күшіктерін ерткен ит жылын да қарсы алып үлгерді. Аяз Ата мен Ақшақар балалардың оларға арнаған ән-жырын тыңдап, балалармен шыршаны айналып6 би биледі. Ақшақардың ұсынған сыйлықтарын өнерлерін ортаға салған балаларға үлестірген Аяз Ата өзінің балаларға деген басқа да сыйлықтарының барлығын айтып, оларды ертегілер әлеміне, «Смурфики» қойылымын тамашалауға шақырды. Қойылымды көріп, ертегілер әлеміне енген оқушылар Аяз Атаға алғыстарын білдіріп жатты. Аталары да өз кезегінде бүгінгі іс-шарада өнерлі балалардың көп болғандығын айтып, ризашылығын білдірді.

Өздері сияқты балаларды асыға күтіп отырған өзге де балалардың барлығын айтып, кетуге жиналған Аяз Ата мен Ақшақарды қимастықпен шығарып салған оқушылар аудан әкімінің берген сыйлығын бір-біріне қуана көрсетіп, шара қызығын таласа айтып, көтеріңкі көңіл күймен тарқасты

Ләйлә ЕСКЕНДІРҚЫЗЫ.