Жаңа үйлердің кілттері тапсырылды

Қазақстан Республикасының Тәуелсіздік күніне орай, аудан орталығының батыс жақ бөлігінде орналасқан жаңа құрылыс ауданында тағы да он бес тұрғын үй пайдалануға берілді. Бұл Қазақстан Республикасы Президенті Нұрсұлтан Әбішұлы Назарбаевтың «Болашаққа бағдар: рухани жаңғыру» мақаласын жүзеге асыру мақсатында «Туған жер» жобасы аясында жаңа үйлердің қатарынан бой түзеген әсем үйлер еді. Ауыл экономикасының жылдан жылға өркендеп, халқымыздың әл-ауқатының жақсарып келе жатқанын осыдан аңғаруға болады.

Сөз кезегін алған аудан әкімі Бағдат Байшалұлы Алиев:

— Қымбатты жерлестер, ардақты бауырларым. «Қанатсыз құс болмайды, армансыз адам болмайды» дегендей, арман да, ой да көп. Шамамыз келсе, үй саларлық күш болса, ауданның үйсіз жүрген тұрғындарының барлығына үй салып берер едік. Осы ауылды қалаға айналдыру – арман. Бірақ, әр нәрсенің өзінің шегі, жоспарлы уақыты болады. Бүгін, міне, соның үлкен бір куәсі – осы. Осы бір жазықта мемлекеттік жоспар бойынша елу бес үйдің орны бар екен. Елу бес үйден құралған әдемі де көрікті шағын аудан жасағым келіп еді. Тендердің арқасында былтыр жиырма үйдің қаражатынан ажырап қалдық. Сол жиырма үй былтыр салынғанда шағын аудан құрылған болар еді. Әйтсе де «Орнында бар оңалар» дегендей, келесі жылы тағы да он сегіз үй салынады. Сонда Сарыөзектің көркін келтіретін әдемі шағын аудан болады деп ойлаймын.

Аманатқа қиянат жасамайын. Кешегі облыста өткен жиынның алдында Елбасымыз Нұрсұлтан Әбішұлы облыс әкімі Амандық Ғаббасұлына телефон арқылы «Елге, жұртқа менен сәлем айт!» деп ұлық мерекемен құттықтағанын, сонымен бірге елдің амандығын, жұртының тыныштығын тілеген облыс әкімі Амандық Ғаббасұлы Баталовтың «Осы елдің, осы жердің көгеріп-көктеп, өсіп-өркендеуіне үлкен үлес қосып келе жатқандарың үшін үлкен рахмет. Ел-жұртқа менің атымнан сәлем айтыңдар» деген сәлемдемесін сіздерге жеткізгім келеді. Бүгін, міне, үлкен іс-шараның басында тұрмыз. «Жерде бір бала қуанса, көкте мың періште қуанады» дегендей, он бес үйдің кілтін табыстап, сол үйге кірген отбасыларының балаларының қуанышын көрсек, біз үшін үлкен бақыт сол болмақ. Комиссия мүшелерінің шешімімен бүгін он бас адамға үй берілмек. Кілттерді тапсыруға рұқсат етіңіздер,-деді.

Тізімде аудандық соттың төрағасы, аудандық соттың судьясы, аудан прокурорының орынбасары, аудандық экономика бөлімінің маманы, Чернобыль апатының ардагерлері –І және ІІІ топ мүгедектері, ауған соғысының ардагері, толық емес отбасы, көп балалы ана, аудандық ішкі істер бөлімінің қызметкері, мұғалімдер бар. Жалдамалы тұрғын үйлердің бірінің лента қию рәсімін аудан әкімі Бағдат Байшалұлы мен аудандық ардагерлер кеңесінің төрағасы Төленді Оспанбайұлы жасап, қуаныштарына ортақтасты. Шашу шашылып, жаңа қонысқа құтты болсын айтылып жатты.

А.Қасенова.