100 Есім

Қазақ  халқы қашанда жылқы малын құрметтеп, қасиетті мал деп есептеген. Жақсы көрген адамдарын «Жылқы  мінездес», «Тұлпардың тұяғы» деп мақтау ретінде айтып отырған.

Сондықтан шығар, табиғаты сұлу, қысы қатты болғанымен жазы жайлы Шұбар ауылының тумасы Бауыржан Бақытжанұлы кішкентайынан туған жерінің тау-тасына, орманы мен бұлағына ғашық болып өсті. «Жеріне лайық елі туады, еліне лайық ері туады» деген сөз осыдан шықса керек. Қай ауыл баласы атқа құмартпаған? Бауыржан да жастайынан атқа құмартып өсті. Өсе келе бұл жай ғана қызығушылық емес, белгілі бір мақсатқа айналды. Асыл тұқымды аттарға деген қызығушылығы, соларды баптап, бәйгеге қоссам деген бала арманы Бауыржанды 2009 жылы Шұбар орта мектебін бітіргеннен кейін Алматы қаласындағы «Жокейлер клубына» алып келді. Бұл жерде 1 жылдай оқып, кейін оқуын Чехияда жалғастырды. Емтихандарының бәрін өте жақсы деген бағаға тапсырып, мамандандырылған ат жарысына қатысу үшін арнайы лицензия алды. Алғашқы ат жарысында-ақ чемпион атанып мерейі үстем болды. 2015 жылы Чехияда өткен жарысқа Қазақстан атынан шығып, 14 мемлекеттің ішінен жүлделі I орынды жеңіп алып, шет елде еліміздің гимнын асқақтатты. 7атпен шауып, жоғары балл жинаған Бауыржан Чехия елінің күнтізбесіне шығып, ол туралы шетелдік баспасөз беттері жарыса жазды. 2016 жылы ат жарысы бойынша «Дэрби» кубогын ұтып алса, осы жылы Қазақстан Республикасының «Жокейлер» кубогын ұтып алды. 4 жыл қатарынан Шешен республикасының Президенті Рамазан Кадыровтың аттарын жаратты. Еңбегі ақталып барлық жарыстарда жүлделі орындарды иеленді.

2017 жылы Франция Мемлекетінде өткен жарыста «Окус» кубогын жеңіп алды. Осы жылы Германия мемлекетіне ауысып, бұл мемлекетте өткен ат жарыстарында да қатарының алды болып, I орындарды иеленді. Ат спортына қосқан үлесі мен жеткен жетістіктері үшін Германияда үлкен мәртебеге ие болған Бауыржан дүние жүзі бойынша өтетін ат жарыстарға дайындалу үстінде. Осы жылы Алматы қаласында 9 мамыр Жеңіс күніне арналған бәйгеде екі мәрте I орынды иеленді. Биыл Астана қаласында өткен ЭКСПО көрмесіне арнайы шақырту алып, өкінішке орай келе алмады. Бауыржан Хорватия, Славакия, Польша мемлекеттерінде де бәйгелерге қатысып, барлығында да жүлдемен оралды.

Бүгінгі күні Бауыржан Бақытжанұлының есімін бүкіл дүние жүзі таниды. Жүзден аса кубоктар мен бағалы сыйлықтардың және көптеген ақшалай сыйлықтардың иегері. Мұның бәрі тынымсыз еңбегінің арқасы. «Арғымақтың қуаты-шабысында, азаматың қуаты-намысында» деген ғой атамыз қазақ. Екі тізгін, бір шылбырды ірке тартып, сауырды қамшылап, атын болдырмай намысын қолдан бермей шет елде қазақтың атын шығарып жүрген Бауыржандай азаматты тәрбиелеген отбасы туралы айтпай кетпесе болмас. «Тәрбие басы-тал бесік» дегендей, Бауыржанды ес білгеннен тәлімді, намысты ғып тәрбиелеп, елін, жерін сүюге, мақсатқа қол жеткізу жолында ерінбеуге, талмай еңбектенуге үйреткен әрине ата-анасы.

Әкесі-Игібаев Бақытжан Қамсызбайұлы Шұбар аулының тумасы, еңбекқор адам. Жек шаруа қожалығының басшысы «Еңбек  етпегеннің қазаны қайнамайды» деген мәтелді өмірлік қағидасына айналдырған адам. Ұл, қыздарына да осыны үйретеді. Анасы Игібаева Сәуле Сансызбайқызы екеуі Бауыржан, Еламан, Гүлназ, Руфина атты ұғымды ұлдар мен бұрымды қыздар тәрбиелеп отыр. Екінші ұлдары Еламан да Чехияда, олда ағасының жолын қуып ат спортымен айналысады. Гүлназ Алматы қаласында колледждің студенті. Ал Руфина Шұбар орта мектебінің 4 сынып оқушысы.

Әр істің бағы-бастауында ғой. «Ұяда не көрсең ұшқанда соны ілерсің» дегендей, отбасын да жақсы тәрбие алған балалар қай жерде де өз биіктерін бағындырары сөзсіз.

Қазақ ықылым заманнан тұлпар мініп, ту ұстаған халық. Ал осы шабандоздардың өнерді шет елде танытып шашасына шаң жұқтырмай жүрген Бауыржан Бақытжанұлына біз өмірдің бар жақсылығын тіледік. Арғымақтарың сүрінбесін, бәйгенің алдын бермей, Қазақстанның туын биікте желбірете бер!

                                                                                        Дина АМАНҚЫЗЫ