Парасат пен ізгіліктің ордасы
Жақсылықты іздеген, іздегенін тапқан, ізгілікті таныған — әрі қызық, әрі қуаныш емес пе? Осындай қуанышқа кенелгендердің бірі — мен, себебі Алматы қаласындағы Достық білім беру орталығының жас түлегі атанғалы отырмын. Табалдырығын алғаш рет жаз айындағы демалысымда аттаған білім ордасы мен үшін үлкен сенім мен үкілі үміт сыйлаған еді. Аз уақыттың ішінде осы ортаға бауыр басып, қайтып келуге уәде беріп, ақырында уәдемде тұрдым. «Санаңа сәуле түссе, басыңда ми қалады» демекші, бүгінгі күні Достықтан сәуле тапқандай бақытты болып жүрмін. Өз мектебімде алған білімді осында келіп шыңдай бастадым. Мұндағы ұстаздарымның әр ақылы — нақыл, нақылы — мақұл екеніне көзім әбден жеткесін, өзімді жаңа қырларымнан танып, алдағы сынақтардан сескенбеуге, сенімді арттыруға барынша талпындым. Санамызға тек білімді емес, тәрбие мен тәртіпті, өнер мен өнегені, иман мен инаббаттылықты қоса сіңіруге күш салып жүрген мұғалімдердің арқасында сабырмен саналы шешімдер қабылдауды үйрендім. Осы тұрғыда өз тарапымнан орталық директоры Мейрамбай Сәбитов ағайға, кураторым Әйгерім Кенжебаева апайға, ұстаздарым Әсел Жақсылықова апайға, Ғабит Сәбитұлы сынды ағайларға үлкен алғысымды білдіргім келеді.
Шынымды айтсам, Достықтың беймағлұм атмосферасы көпбалалы үйді есіме салады. Барлығы бір-бірі үшін жанашыр, үлкендер кішіге үлгі бола білген, ешкім ешкімнен ештеңесін аямайтын ортада ілім үйренгеннің өзі бақытқа кенелтері сөзсіз. Іс-шаралар мен қуанышқа толы күндердің көптігі көңіл қуантады. Мұнда білімді іздесең — табасың, тәрбиені көрсең — аласың. Қас-қабақ, жүріс-тұрыс, сауалға жауап іздеп жүріп, үлгі-өнеге аласың. Достық өз шәкірттері үшін барлық жағдайды қарастырып қойғанын атап өтпекпін. Ұлдар жатақxанасы мен қыздар жатақxанасындағы арнайы қосымша сабақтар мен түрлі іс-шаралардың өткізілуі, оқушылардың қатаң бақылауда болып, қажетті кеңестермен танысуы кез келген түлекке ерекше мотивация береді. Тәрбиешіміз Құлпынай апайдың бұл тұрғыда бізге еткен ықпалы өте зор. Танымы ерек, талғамы бөлек Достық орталығының осылай қызмет етіп келе жатқанына биыл 14 жыл толыпты. Адам лебізін сөзімен қайтарады дегендей, осы сәтті пайдалана отырып, «Қазақ тілі, әдебиеті, тариx » тобының атынан Достықты туған күнімен шын жүректен құттықтағым келеді. Ұлттық құндылықтарды ұлықтап, салтты саралап, келбетті келістіріп, дәстүрді дәріптеп, әдебіңмен әдіптеп, тәртібіңмен тәптіштейтін, жүйеңмен жүйелейтін, билігіңмен бекітетін ордаңда біз де мәртебеңді көтеріп, парасатпен ізгілікке ұмтылатын боламыз! Шәкірттерің шаттық сыйлайтын, ұстаздарың ұлықталатын ұлы күндерің көп болсын. Мен сені жақсы көремін, Достық! Туған күніңмен!
Жанэля АЛИКОВА,
ДББО-ның ҚӘТ
тобының білім алушысы
